Fuu saki kalima a — lama' ara tao doidoso lahenda dae-bafo'
9
Basa de eila'o-limalope kalima a fuu ria saki na. Boe ma au ita ruu' esa tuda leo dae-ina' a mai. Ara fee ruu' ria koe' esa, ela ana soi lelesu bolo' doidoso fo ta hapu mate'e na. 2 Ana soi bolo' ria lelesu na, boe ma ai masu keo-ina' a kalua mai sama leo' ai-pila' a naa nura. Ai masu' ria kaboboa, losa' lalai ma ledo a dadi maiu'.a 3 Boe ma lama' dodou-ina' kalua reme ai masu' ria onda leo dae-ina' a mai. Manetualain fee si kuasa sama leo' ura'.b 4 Ana pareta si ta bole tao ralutu dae-ina' a nau na, ai huu' ma parusa feke' ara. Tehuu ara muste tao doidoso basa lahenda fo ri' Manetualain ee-dededen ta nai sira dedei nara.c 5 Manetualain fee lama' sira lela' fo tao doidoso lahenda ra losa' bula' lima, tehuu ta bole raisa si. Noi tao rahehedi' asa sama leo' ura' a dede. 6 Nai bula' kalima' sira dalen, lahenda ra doidoso raan seli, losa' ara hule mamates. Leo mae leo' naa, tehuu ara ta mate.d7 Au ita lama' sira, rupa nara sama leo' dara musu. Ara pake silaka parani musu lilo pilas. Sira mata-idun sama leo' lahenda dae-bafo'.e 8 Laka-doo nara, naru' a sama leo' ina' ara laka-doo na. Ma nisi nara tande' a sama leo' singa a nisi nara.f 9 Ara pake babaa ara' neme besi a, nonoo' leo ika une'. Sira dila nara lii na narulu, sama leo' soldadu batalion esa dara nara ralai hela kareta musu.g 10 Sira iko nara kahere', ma manuu raso' sama leo' ura' a raso na. Ara hapu kuasa tao doidoso lahenda reni' raso nara, losa' bula' lima. 11 Lama' sira mane na, ri' malaka neme basa eila'o-limalope fo ri' usi heni si leo bolo' doidoso fo ta hapu mate'e na. Ria nade na nai dedea Ibrani, Abadon, ma nai dedea Yunani, Apolyon. Sosoa na nae, “Mana Tao Malulutu'”.
12 No ria naa, soe masososa' a basa so. Tehuu besa-besa! Huu fo neu' ko bei soe dua mai bali.
Fuu saki kanee a — doidoso rupa' telu nai dae-ina'
13 Basa de eila'o-limalope kanee a fuu ria saki na. Boe ma au ita mei lilo pilas fo ri' ara pake ni ela hotu ai-nana maboo meni' nai Manetualain matan. Haraoe' esa kalua neme mei ria susuran haa si mai.h 14 Haraoe' ria nafada eila'o-limalope fo ri' besa' ko fuu ria saki na nae, “Eila'o-limalope haa mana heke' doo' a rai lee bau-ina' esa, nade Efrat. Muu po'i maa si leo!” 15 Boe ma ana neu po'i si, ela raisa lahenda dae-bafo' a natetu na teu', bula', fai' ma oras fo ri' Manetualain naetu' mema'. Kalu ita bati basa lahenda dae-bafo' a rai dae-ina' a reu' babati' telu, sona mana mate sira, nana babati' esa. 16 Ara rafada au rae, eila'o-limalope ra soldadun fo ri' sa'e dara musu, sira dedesi na juta natun dua. 17 Boe ma au ita soldadu sira ro dara nara. Soldadu sira pake babaa ara' rupa' telu, si': pilas makarela', modo' barakeo' makadila' ma uni' balerang. Dara sira laka nara sama leo' singa a laka na. Doidoso rupa' telu kalua reme dara sira bafa nara si', ai-pila', ai masu' ma balerang. 18 Doidoso katelu' sira tao ramate lahenda nai dae-ina' a babati' esa neme babati' telu. 19 Dara sira tao doidoso lahenda dae-bafo' a reni' bafa nara ma iko nara. Nai dara sira iko nara, ranuu laka' sama leo' meke a laka na.
20 Tehuu bei hapu lahenda feke' rai dae-ina' a, ara ta raisa si reni' soe sira. Leo mae leo' naa, tehuu ara ta nau foa ela sira nonoi-tatao tadalu nara. Ara soko raroo nitu, ma soko hata fo ara taon neme lilo pilas, lilo fula', riti, ai ma batu. Leo mae hata sira ta bisa rita dae, ta bisa ramanene ma ta bisa la'o, tehuu ara soko-taku si la'o naroo!i 21 Sira boe ta edi' ai nara reme sala feke nara, leo-leo' raisa lahenda, pake kuasa maiu', hohoke ma ramana'o.