Segel kahitu a — Manetualain eila'o-limalope nara sipo saki hitu
8
Boe ma Bibi-lopo Ana' ria buka segel kahitu a. Kekeneu te, basa-basan fo rai nusatetu-ikutema' a roi nenee' a. Ta hapu esa nahahara boe', bate losa' jam seseri' esa. 2 Boe ma au ita eila'o-limalope hitu rai nusatetu-ikutema' a, rapadei rahere rai Manetualain mata Na, fo sadia ralalau' Ana. Sira esa' ko sipo' saki na.3 Eila'o-limalope feke' esa nai nusatetu-ikutema' a, napadei nai mei fo ri' hotu reni' ai-nana maboo meni' a mata na. Ana homu mako lilo pilas fo ri' biasa ara tao ai-nana maboo meni' neu' dale'. Ara fee ni ai-nana maboo meni' dodou-ina', fo ana epo' nabuan no Manetualain lahenda Nara huhule-haradoin. Ana neni mako lilo pilas ria, sama leo' tutunu-hohotu' maboo meni', de taon neu' mei lilo pilas ria lain, nai kadera mana pareta a mata na.a 4 Ana hotu ai-nana maboo meni' ria, boe ma boo meni na ae leo Manetualain mata Na neu, sama-sama no Manetualain lahenda Nara huhule-haradoin.
5 Boe ma eila'o-limalope a hai ai-pila' neme mei ria mai, de tao nahenu mako lilo pilas a. Ana tu'u mako ria leo dae-ina' a neu. Kekeneu te, au ita narela ii-ona' nai dae-ina' a. Natata natututi' lii na bau na seli, ma dae a natakeko naan seli.b
6 Boe ma eila'o-limalope kahitu' fo rai nusatetu-ikutema' a sadia saka' fuu sira saki nara.
Fuu saki masososa' a — ai-pila' a naa heni parusa ra
7 Fai fo eila'o-limalope masososa' a fuu ria saki na, boe ma uda es ma ai-pila' mana epo' no daa, po'a leo dae-ina' a mai losa ai-pila' a naa heni ai huu' ara ma nau mana momodo' nai basa mamana' ain. Kalu ita bati dae-ina' a neu' babati' telu, sona ai-pila' a naa heni a, nana babati' esa. Ma kalu ita bati basa ai huu' nai dae-ina' a neu' babati telu, sona ai-pila' a naa heni a, nana babati' esa.c
Fuu saki kadua a — mate tasi' a oe-isin
8 Fai fo eila'o-limalope kadua a fuu ria saki na, boe ma hata' esa sama leo' lete bau-ina' a pila, lokopiro leo tasi' dale' neu, losa' tasi' a babati' esa neme babati' telu dadi daa. 9 Boe ma basa banda fo rai tasi' dale', mate babati' esa neme babati' telu. Ma ofa' fo rai tasi' a rasosopu' heni babati' esa neme babati' telu.
Fuu saki katelu a — oe a dadi mali'
10-11 Fai fo eila'o-limalope katelu a fuu ria saki na, boe ma ruu bau-ina' esa sama leo' obor bau-ina' esa pila, tuda neme lalai mai. Ruu' ria nade ‘Mali'’. Ana tuda mai, boe ma lee ra oe nara ma oe mata' ara dadi mali'. Lahenda fo rinu oe ria, mate dodou-ina'. Kalu ita bati basa lee ra, ma oe mata' rai dae-ina' a reu' babati' telu, sona dadi mali' a, nana babati' esa.d
Fuu saki kahaa a — ledo a, bula' a ma ruu' ara dadi maiu'
12 Eila'o-limalope kahaa a fuu ria saki na. Kekeneu te, ledo a, bula' a ma ruu' ara hapu fefepa', de ara dadi maiu'. De leledo' sona ledo a babati' esa neme babati' telu maiu', nana huu ledo a ta nahaa matetu'. Ma hatu' sona bula' a ma ruu' ara babati' esa neme babati' telu maiu-ina', nana huu bula' a ma ruu' ara ta rahaa matetu'.e
13 Boe ma au boti' laka ka, te au ita parupua esa laa namemeto' nai lalai. Ana naloo nae, “Besa-besa! Huu fo eila'o-limalope feke' telu rai nusatetu-ikutema' a, bei ta fuu sira saki nara. Kalu fuu saki sira neu' ko basa lahenda fo rasoda rai dae-ina' a hapu soe bau-ina'.”