Manetualain ee-dede' lahenda rifun natun esa haa hulu haa
7
Boe ma au ita Manetualain eila'o-limalopen haa reme nusatetu-ikutema' a ara rapadei rai dae-ina' a bukun haas fo ramakee ani a. De ta naani nai tasi' a, nai mada' lain ma ta naani nai ai huu' ara.a 2 Manetualain fee si kuasa tao ralulutu' mada' lain ma tasi' a. Boe ma au ita eila'o-limalope feke' esa nai nusatetu-ikutema' a, neme dulu mai neni Manetualain masoda' a e'ee-dededen. Ana naloo nafada eila'o-limalope kahaa' sira nae, 3 “Mahani dei! Boso' tao malulutu' mada' lain, tasi' a, do ai huu' ara. Mahani losa' ami ee-dede' basa Manetualain lahenda nadedenu nara dedein.”b4 Boe ma ara rafada au rae, eila'o-limalope ria ee-dede' basa Manetualain lahenda nara so. Sira dedesi na lahenda rifun natun esa haa hulu haa, reme basa leo Israel . Si':
5 neme leo Yahuda, lahenda rifun sanahulu dua;
leo Ruben, lahenda rifun sanahulu dua;
leo Gad, lahenda rifun sanahulu dua;
6 leo Aser, lahenda rifun sanahulu dua;
leo Naftali, lahenda rifun sanahulu dua;
leo Manase, lahenda rifun sanahulu dua;
7 leo Simeon, lahenda rifun sanahulu dua;
leo Lewi, lahenda rifun sanahulu dua;
leo Isaskar, lahenda rifun sanahulu dua;
8 leo Sebulon, lahenda rifun sanahulu dua;
leo Yusuf, lahenda rifun sanahulu dua;
ma leo Benyamin, lahenda rifun sanahulu dua.
Lahenda malalao-malalafu' ara io-oa Manetualain ma Bibi-lopo Ana'
9 Boe ma au ita lahenda dae-bafo' dodou-ina', losa' reke doa' asa. Ara reme basa leo ra, nusa' ara, dedea' ara, ma basa negara rai dae-ina'. Basa si tesa rasare ra kadera mana pareta ria ma Bibi-lopo Ana'. Ara pake badu fula' ma homu palam doo' nai lima nara. 10 Ara io-oa rame-rame rae,
“Ami io-oa ami Manetualain ma,
fo ri' natuu' nai kadera mana pareta ia.
Ami madedema Bibi-lopo Ana' ia!
Sira si' po'i-tata ra ami.
Sira si' soi fee ami eno masoda'.”
11 Ara dedea basa rae leo' naa, boe ma Manetualain eila'o-limalopen rai nusatetu-ikutema' a rapadei eo ra kadera mana pareta ria, sunda' undulaka nara losa mata-idu nara neta dae a rasare ra kadera mana pareta bau-ina' ria. Ketua sira ma banda kahere' kahaa' ara tao leo naa' boe. Basa si do'o-tabe Manetualain, 12 ma soda rae,
“Tebe! Tebe ria!
Ami io-oa Manetualain!
Ami madedema Manetualain nade Na!
Manetualain dudu'a-aafin, tande na seli.
Manetualain kuasan, bau na seli.
Manetualain bara'ai Na, kahere' naan seli.
Ami hule makasi la'o naroo neu' Manetualain.
Ami hada-horomata Manetualain ta etu-basan.
Tebe! Tebe ria!”
13 Ara io-oa basa rae leo' naa, boe ma neme ketua kadua hulu haa' sira, esa natane au nae, “O malela' lahenda makadoto' mana pake badu fula ia ra, do? Sira reme bea' mai?”
14 Tehuu au ataa ae, “Ta'a Papa. Au ta alela' sira nana bea. Papa ri' bubulu' dai lena.”
Boe ma ana nafada au nae, “Sira nana, lahenda fo kalua reme doidoso bau-ina' a mai.
Sira nana, lahenda fo ri' pake Bibi-lopo Ana' ria daa Na,
fo safe reni' sira kakao-papake nara,
ma tao fula makamoi sira badu nara.c
15 Huu ria naa, ara rapadei rai Manetualain kadera mana pareta Na matan.
Hatu-leledon ara ralalau' Manetualain nai Ria Uma Mamaso Na.
Manetualain no si la'o naroo.
Manetualain nanea nahere si.
16 Neu' ko ara ta ramalaa.
Neu' ko ara ta maamada-metihedu.
Neu' ko ledo a ta haa si.
Neu' ko rou nara ta olu huu ledo haa' si.d
17 Bibi-lopo Ana' fo ri' nanenea' kadera mana pareta,
neu' ko Ria dadi sira mana foo na.
Neu' ko Ana foo neni si,
reu rinu nai oe mata' masoda'.
Neu' ko Manetualain o'oe-nanasi si,
de ara ta dola-ramatani.”e