Dae-bafo Bebeu' 6

Bibi-lopo Ana' a buka segel sira esa-esa Segel masososa' a — parani musu a kalua mai

Basa de au ita Bibi-lopo Ana' a buka susura mana lulu' ria segel masososa na. Boe ma au amanene esa neme banda kahere' kahaa' sira, naloo nambera sama leo' tatas. Ana pareta nae, “Muu leo!” 2 Kekeneu te, au ita dara fula' esa. Lahenda esa sa'e nai lain, ana pake silaka parani musu, nana huu naseki naroo nai musu dale'. Besa' ia Ana homu o'ou' fo kalua neu naseki selu' musu nara rai dae-ina'.^a

Segel kadua a — kaco nai dae-ina'

3 Basa de Bibi-lopo Ana' ria buka segel kadua a. Boe ma au amanene banda kahere' kadua a pareta nae, “Muu leo!” 4 Boe ma dara pilas esa kalua mai. Lahenda fo ri' sa'e nai lain sipo tafa' bau-ina' esa. Ara fee ni kuasa fo tao kaco nai dae-ina', ela lahenda dae-bafo' a esa naisa esa.^b

Segel katelu a — fai laa-roe ina'

5 Bibi-lopo Ana' ria buka segel katelu a. Boe ma au amanene banda kahere' katelu a pareta nae, “Muu leo!” Kekeneu te, au ita dara keo' esa. Lahenda fo sa'e nai dara ria lain, ana homu tatai' esa, ela tai nanaa' fo mulai kurang.^c 6 Boe ma au amanene haraoe' esa neme banda kahere' kahaa' sira talada mai. Haraoe' ria nafada nae, “Neu' ko fai laa-roe ina' nai dae-ina'. Lahenda kadi na fai' esa, bisa asa noi isi' mok telu; isi malole, sona asa noi mok esa' a. Tehuu kalu fai laa-roes ria losa, lahenda ta bole tao ralutu ai saitun ma ai anggor rai oka' ara dale'.^d

Segel kahaa a — mate lahenda dodou'

7 Bibi-lopo Ana' ria buka segel kahaa a. Boe ma au amanene banda kahere' kahaa a pareta nae, “Muu leo!” 8 Kekeneu te, au ita dara mamasa' esa. Lahenda fo sa'e nai dara ria lain, nade ‘Mamates’. Esa tuka dea na boe, ria nade ‘Mamana' Lahenda Mana Mate' Ara’. Sira dua hapu kuasa fo raisa lahenda rai dae-ina' a pake tafa', fai laa-roes, hedi-raus ma pake banda ma'aa'. Kalu reke basa mana mate' sira, sona dedesi na sama no mate lahenda dae-bafo' a koar esa.^e

Segel kalima a — Manetualain lahenda nara rahani Ana naetu' sira dedean

9 Bibi-lopo Ana' ria buka segel kalima a. Boe ma au ita lahenda fo fai a ulu na raisa si a, sumane nara rai mei tutunu-hohotu' a fiki dale na. Ara raisa si nana huu ramahere Manetualain, ma tui-beka Hara-dasi Na nai basa mamana' ain. 10 Ara raloo rae, “Oo Manetualain! Ami Ramatua marela-masa'am! Ramatua' malalao-malalafu'! Manetualain dedea ubea', sona ami mamahere. Tehuu ami muste mahani losa fai hida', besa' ko Manetualain maetu' dedea' ela huku lahenda fo ri' raisa ami nai dae-ina'?”

11 Ara ratane rae leo' naa, boe ma sira esa-esa sipo badu fula' manaru. Esa nafada si nae, “Mahani selubai', losa' emi dedesi ma namadai. Huu fo bei hapu emi toranoom fo neu' ko raisa si sama leo' emi.”

Segel kanee a — soe a nai lalai ma dae-ina'

12 Bibi-lopo Ana' ria buka segel kanee a. Kekeneu te, au ita dae a natakeko naan seli. Ledo a dadi maiu' sama leo' tema' keo' ma bula' a dadi pilas sama leo' daa.^f 13 Ruu' ara rai lalai tuda leo dae-ina' a mai, sama leo' ai boa mafa' ara monu henis nana huu ani ina' a. 14 Boe ma au ita lalai lulu bati duan, sama leo' nea' a losa' mopo ni. Ma lete' ara ro pulu ra ratakeko losa' mopo si reme mamana nara mai.^g 15 Basa lahenda nai dae-ina' a rita leo' naa, boe ma mane' ara, mana pareta, komendaan soldadu, lahenda kamasu'i ma ata ra, basa si bii. Ara ralai reu tama' rai lea' ara dale', ma rai batu lela' nai lete' ara.^h 16 Ara radenu lete' ara ro batu bau-ina' ara rae, “Ela leo' bea na refa mai tatana ma ami leo! Mafuni ami ela Ria fo ri' natuu' nai kadera mana pareta bau-ina' ria lain, ta nita ami. Ma Bibi-lopo Ana' a ta huku ami.ⁱ 17 Adoo! Ami ta dadadi' so', huu fo fai soe a mai so! Manetualain ma Bibi-lopo Ana' a po'a sira nasa-bolii nara neu' ami. Tehuu ta hapu esa sili nala boe'!”^j