Susura mana lulu' manasegel naisa'
5
Boe ma au ita selu' Ria fo ri' natuu' nai kadera mana pareta, Ana homu lululu' esa nai lima ona Na. Lululu' ria, dea-dale' mana dui'. Ma ara segel raisa' ana nai mamana' hitu.a2 Ma au ita eila'o-limalope kahere' matetu' esa neme nusatetu-ikutema' a. Ana natane nambera-ina nae, “Bea ri' nanuu haak buka segel ma lees susura' ria?”
3 Ana natane nae leo' naa, tehuu ara ta hapu lahenda esa nanuu haak bisa buka lululu' ria ma lees isi na. Leo mae nai nusatetu-ikutema', do nai dae-ina' a, ta hapu esa nanuu haak boe'. Nai lahenda mana mate' ara mamanan, boe ta'a. 4 Au ita leo' naa, boe ma au dola, nana huu ta hapu lahenda esa nanuu haak bisa buka lululu' ria ma lees isi na. 5 Boe ma esa neme ketua kadua hulu haa' sira dedea no au nae, “A'a! Boso' dola. Huu fo mane' Daud tititi-nonosin esa kahere' naan seli, ara raloo Ni sona rae, ‘Singa, neme leo Yahuda mai’. Ana naseki basa tadalu' ara. De Ria ri' nanuu haak bisa buka segel ma lees susura' ria isi na.”b
6 Au amanene leo' naa, boe ma au ita Bibi-lopo Ana' esa napadei' nai kadera mana pareta fo ri' nai talada ma banda kahere' kahaa' sira ro ketua kadua hulu haa' ara ratuu' eo raan. Bibi-lopo Ana' ria, nonoo' parnaa raisa Ni. Ana nanuu susura' hitu, ma nanuu mata' hitu. Ria matan sira hitu, sama leo' Ria Dula-dalen fo ri' poon hitu, Ana fee ni leo dae-bafo' ia katema' mai.c 7 Au ita Bibi-lopo Ana' a hai naa susura mana lulu' a neme Ria fo ri' natuu' nai kadera mana pareta ria, lima ona Na.
8 Bibi-lopo Ana' a hai naan, boe ma banda kahere' kahaa' sira ma ketua kadua hulu haa' ara sunda' undulaka nara reu' mata Na fo do'o-taben. Sira esa' ko homu' hata malii' sama leo' sasandu, ma mako lilo pilas. Mako ria isi ai-nana maboo meni' mana hotu', masu na naboo meni. Ai-nana maboo meni' ria, ri' Manetualain lahenda Nara huhule-haradoin.d 9 Basa si soda sosoda' bebeu' esa rae:
“Bibi-lopo Ana' a, naraa sipo susura' ia.
Bibi-lopo Ana' a, nanuu haak bisa buka segel.
Huu fo ara hala Ni so.
Manetualain pake Ria daa Na,
fo soi-tefa na lahenda dae-bafo' reme basa leo ma nusa' ara,
ela sira ruma dadi Manetualain lahendan.
No ria naa, lahenda reme basa dedea' ma nusa' ara,
bisa dadi Manetualain kileo-bobokin.e
10 Bibi-lopo Ana' a nabubua na basa si,
dadi nusa' esa.
Bibi-lopo Ana' a teka-here na si,
dadi Manetualain lahenda malalau Nara.
Neu' ko ara pareta nai dae-bafo' a.
Neu' ko roi-tao fee Manetualain nai dae-ina' a.”f
11 Basa de au boti' laka ka, boe ma au amanene haraoe bau-ina' esa. Ma au ita banda kahere' kahaa' sira, ketua kadua hulu haa' ara, ma Manetualain eila'o-limalopen dodou' rai nusatetu-ikutema'. Eila'o-limalope sira dedesi na, losa kefu-kafun.g 12 Basa si soda rambera rae,
“Ami madedema Bibi-lopo Ana' fo ri' ara hala Ni.
Nana huu Ria naraa sipo ami i'io-o'oam!
Ria kuasa Na, bau na seli.
Ria hata-heton, dodou naan seli.
Ria dudu'a-aafin, tande na seli.
Ria bara'ai Na, kahere' naan seli.
Ami madedema Ria nade Na.
Ami hada-horomata Ni.
Ami io-oa Ni.”
13 Boe ma au amanene selu' sosoda feke' esa bali. Neme basa masoda' ara, nai nusatetu-ikutema', nai lalai, nai dae-ina' ma nai tasi' dale', basa si soda. Neme lahenda mana mate' ara mamana na boe, ara soda. Basa si soda bela' a rae,
“Ami io-oa Manetualain fo ri' natuu' nai kadera mana pareta ia.
Ami madedema Bibi-lopo Ana' ia.
Ami hada-horomata Si.
Ami do'o-tabe Si.
Nana huu Ara pareta losa doo na neu!
ma Sira kuasa Na manaetu-manabasa taa'!”
14 Banda kahere' kahaa' sira rataa raroo rae, “Tebe! Tebe ria!” Boe ma ketua kadua hulu haa' sira sunda' undulaka nara bali fo do'o-tabe Manetualain ma Bibi-lopo Ana' ria.