Ara do'o-tabe Manetualain nai nusatetu-ikutema'
4
Lahenda Dae-bafo' Tetea' dedea basa Ria hehelu Na fee jama'at kahitu' ara, boe ma Manetualain fee au ita hihii-nanau' feke' bali. Kekeneu te, au ita lelesu esa mana soi' nai nusatetu-ikutema'. Boe ma au amanene selu' lahenda fo haraoe na bau-ina' sama leo' saki a nae, “Mai! Ae ia' mai leo, ela Au atudu o basa-basan fo ri' neu' ko dadi.”2 Hate mata' ria boe Manetualain Dula-dale Na noo au leo nusatetu-ikutema' a uu. Kekeneu te, au ita kadera mana pareta esa, ma Lahenda esa natuu' nai lain. 3 Ria haa na modo' ma pilas, sama leo' batu makadila' mabeli fo ri' rae, yaspis ma sardius. Elus a eo na Ria kadera mana pareta Na. Haa na modo' sama leo' batu makadila' samrud.a 4 Nai mamana' ria, kadera mana pareta aana' dua hulu haa eo ra kadera mana pareta fo ri' nai talada. Ketua dua hulu haa ratuu' rai kadera sira lain. Basa si pake kakao-papake fula', ma pake silaka mana pareta lilo pilas. 5 Neme kadera mana pareta fo nai talada kalua rela-tatas natututi'. Obor hitu pila rai kadera mana pareta ria mata na. Sira sama leo' Manetualain Dula-dalen nanuu poo' hitu.b 6 Nai kadera mana pareta ria matan, au ita nonoo' leo tasi' a makaneneun sama leo' kaca.
Au ita banda kahere ina' haa eo ra kadera ria. Ao-ina nara dea-mata' henu' no mata deke'. Banda sira ralalau' Manetualain.c
7 Banda masososa' a mata-idun, sama leo' singa. Kadua a mata-idun, sama leo' sapi mane'. Katelu a mata-idun, sama leo' lahenda dae-bafo'. Ma kahaa a mata-idun, sama leo' parupua a laa.d e 8 Banda kahaa' sira, esa na dila' nee. Dila' sira poo' dea-dale' henu' no mata deke'. Hatu-leledon ara soda la'o naroo rae,
“Ami io-oa Manetualain!
Ami madedema Manetualain nade Na!
Manetualain malalao-malalafu' naan seli!
Manetualain kuasa Na marela-masa'a.
Manetualain nasoda neme fai a ulu na.
Manetualain nasoda nai besa' ia.
Ma Manetualain nasoda losa doo na neu!”f
9 Soda leo naa', nana huu ara io-oa ma fee hada-horomata neu' Manetualain, ma hule makasi neu' Ana, huu fo Ria ri' natuu' nai kadera mana pareta ria lain, ma Ana nasoda losa doo na neu. Tepo' fo ara soda a, 10 ketua kadua hulu haa' sira sunda' undulaka nara reu' Manetualain fo ri' natuu' nai kadera mana pareta ria. Ara hu'a heni silaka mana pareta nara, de tao si reu' Ria kadera mana pareta Na matan, ela do'o-tabe neu' Ria fo ri' masoda' losa doo na neu. Boe ma ara io-oa Ni rae,
11 “Oo Manetualain!
Ami io-oa Manetualain!
Ami madedema Manetualain nade Na.
Manetualain nanuu haak pareta ami.
Manetualain nana ami Manetualain ma!
Manetualain naraa sipo ami i'io-o'oam.
Manetualain tebe muste sipo ami hada-horomatam.
Huu no Manetualain mana kuasa bau-ina'.
Ma Manetualain marela-masa'a.
Manetualain adu na basa-basan.
Manetualain fee basa-basan rasoda.
Basa-basan dadi,
nana huu Manetualain adu.
Basa-basan fo rasoda,
ranuu ani hahae', nana huu Manetualain fee.”