Ramatua Yesus haitua hehelu' fee jama'at nai Sardis
3
Lahenda Dae-bafo' Tetea' dedea selu' no au nae, “Yohanis, besa' ia o muste dui' susura feke' bali. Lii na leo ia':‘Soa-neu' jama'at nai kota Sardis:
Susura' ia neme Au, Yesus. Manetualain Dula-dale Na nai Au. Ma Dula-dale' ria nanuu poo' hitu. Au homu ruu' hitu rai Au lima Ka. Nenene Au dedea Ka.
Au ita emi nonoi-tatao mara nai Sardis. Lahenda ruma rae, emi tebe-tebe masoda tuka Au hihii-nanau Ki, sekonaa te emi sama leo' ta masoda. 2 De foa leo! Matetea emi namaherem, fo ri' hisadei na mopon. Au parisa' basa hata fo ri' emi tao, tehuu ta hapu esa natetu-naraa nai Manetualain matan. 3 Boso' mafarene heni basa nanori-nafada roo-tetu', fo ri' maulu na emi mamanene ma sipo. Tuka matetu' Manetualain hihii-nanaun ma saledale-tu'etei mara, fo matafali tuka Manetualain. Kalu emi ta malale foa fo tao leo naa', neu' ko Au mai akeke' a sama leo' na'o, de emi ta bubulu'.a
4 Tehuu emi nai Sardis, ruma bei rasoda roo-tetu', sama leo' lahenda fo ta nakekeo kakao-papaken. Huu no sira rasoda roo-tetu', de neu' ko naraa ara la'o sama-sama ro Au pake kakao-papake fula'. 5 Lahenda fo tuka nahere Au losa' mate, neu' ko ana pake kakao-papake fula'. Au ta ose heni nade na neme susura' fo ri' dui' lahenda naden, neu' ko hapu soda' mana basa taa'. Neu' ko Au manaku ni nai Papa Ka matan ma Papa Ka eila'o-limalopen rai nusatetu-ikutema' a ae, ria nana Au lahenda Ki.b
6 Nenene matalolole hata fo ri' Manetualain Dula-dale Na nafadan neu' Ria jama'at Nara.’”
Ramatua Yesus haitua hehelu' fee jama'at nai Filadelfia
7 Lahenda Dae-bafo' Tetea' dedea naroo nae, “Yohanis, besa' ia o muste dui' susura feke' bali. Lii na leo ia':
‘Soa-neu' jama'at nai kota Filadelfia:
Susura' ia neme Au, Yesus. Au Malalao-malalafu' ma Roo-tetu'. Au homu mane' Daud koe na. Kalu Au soi lelesu, ta hapu esa ena ni boe'. Kalu Au ena ni, ta hapu esa soi ni boe'.c
8 Au bubulu' basa-basan fo ri' emi tao. Au bubulu' emi bebe'i-bara'aim baiana'. Leo mae leo' naa, tehuu emi ta malena Au ma emi tuka maroo Au nanori-nafada Ki. Mafarerene' matalolole, huu fo Au soi lelesu fee emi, de ta hapu esa ena ni boe'.
9 Nenene matalolole! Huu fo lahenda ruma dedea fufudi' rae, sira nana Manetualain lahenda roo-tetun. Sekonaa te sira mana mapuputa' tuka nitu ra malaka na. Tehuu neu' ko emi mita! Huu fo Au tao aa si, sunda' undulaka nara nai emi mata mara ma manaku rae, tebe Au sue-lai emi.d 10 Huu no emi tuka Au pareta Ka fo tuka mahere Au, neu' ko Au anea atalolole emi neme doidoso fo ri' Manetualain feen mai, ela uji basa lahenda nai dae-bafo' ia.
11 Ta doo' a so' te Au mai. De homu mahere Au nanori-nafada Ki fo ri' emi sipo ni neme fai a ulu na mai. Boso' losa ruma ralea ra seseba-babae' fo ri' Manetualain fee emi. 12 Lahenda fo tuka nahere Au losa' mate, neu' ko ana leo naroo no Manetualain sama leo' dii toka' manasele naisa' nai Manetualain Uma Na. Neu' ko Au dui' Au Manetualain Ka nade Na, ma Manetualain kota Na naden, nai lahenda ria ao-ina na. Kota ria rae, ‘Yerusalem Bebeu'’, fo ri' Manetualain naondan neme nusatetu-ikutema' a mai. Ma neu' ko Au dui' Au nade bebeu Ka neu' lahenda ria ao-ina na.e
13 Nenene matalolole, hata fo ri' Manetualain Dula-dale Na nafadan neu' Ria jama'at Nara.’”
Ramatua Yesus haitua hehelu' fee jama'at nai Laodikia
14 Lahenda Dae-bafo' Tetea' dedea naroo nae, “Yohanis, besa' ia o muste dui' susura' mate'e oe' a. Lii na leo ia':
‘Soa-neu' jama'at nai kota Laodikia:
Susura' ia neme Au, Yesus, fo ri' lahenda raloo rae, ‘Roo-tetu'’. Au tebe-tebe tui-beka Manetualain Hara-dasin kose-kose. Ma basa-basan fo ri' Manetualain adu-tao reme Au mai.f
15 Au ita emi moi-tao ubea' nai Laodikia. Tehuu lahenda ta bubulu' kalu emi makate malalau' Au, do ta tao dale' neu' Au. Ita tararaa' ana no oe, sona ta nanaa' boe', ta masufu' boe'. Kalu emi makate, sona muste tebe-tebe makate. 16 Tehuu no emi dale poo seseri', neu' ko Au asapura heni emi meme Au bafa Ka sama leo' lahenda nasapura heni ape na.
17 Emi dedea koao' mae, ‘Ita lahenda kamasu'i. Ita tasoda no malole, ta parluu hata esa boe'!’ Sekonaa te, emi dale mara poke si, losa' emi ta bubulu' bea ri' malole. Huu ria naa, emi dadi sama leo' lahenda manato'a-manataa' ma po'irao'. 18 De malole lena' emi asa lilo pilas tea' neme Au mai, ela emi tebe-tebe dadi lahenda kamasu'i'. Ma asa papake fula' fo mapoti-mapalu' emi po'irao ma. Ma asa modo-aidoo fo lame neu' mata mara, ela mita-dae.
19 Kalu lahenda fo ri' Au sue-lai si tao sala', Au asa'ai ma huku si, ela ara dadi malole. De emi muste saledale-tu'etei mara, ela tebe-tebe emi makate tuka Au.g
20 Nenene matalolole, huu fo Au apadei nai lelesu a bafa na, ma Au aloo kose-kose. Kalu lahenda namanene Au hara Ka, de ana soi lelesu a, neu' ko Au maso' dale' uu fo ami mia-minu sama-sama. 21 Lahenda fo tuka nahere Au losa' mate, neu' ko Au feen haak, ela ana pareta sama-sama no Au. Huu fo Au tuka ahere Papa Ka, de besa' ia Au pareta sama-sama oo Ni.
22 Nenene matalolole hata fo ri' Manetualain Dula-dale Na nafadan neu' Ria jama'at Nara.’”