Ramatua Yesus haitua hehelu' fee jama'at nai Efesus
2
Boe ma Lahenda Dae-bafo' Tetea' pareta au nae, “Yohanis! O muste dui' susura' esa, lii na leo ia':‘Soa-neu' jama'at nai kota Efesus:
Susura' ia neme Au, Yesus. Au homu ruu' hitu rai Au lima ona Ka. Au la'o rule-feo memete dedede lilo pilas kahitu' sira esa-esa. Nenene Au dedea Ka.
2 Au ita emi leleo-lala'om nai kota Efesus, emi moi-tao sota maan seli soa-neu' Manetualain. Kalu lahenda tadalu' nai emi talada, emi ta fee ni lela'. Ma kalu lahenda mai napuputa' nae, ria Manetualain lahenda nadedenun, emi parisa' matalolole ria leleo-lala'on, ela bubulu' lahenda rupa leo naa' a lahenda mapuputa', do ta'a. Boe ma emi tipa-tola' ana ma ta mamanene ni. 3 Leo mae lahenda tao rasususa' emi, nana huu mamahere Au, tehuu emi manenete mahere ma ta heo'.
4 Tehuu Au ita emi tuda huu hihii-nanau' esa. Fai a ulu na fai fo emi besa' ko mamahere Au, emi masue-malai ao. Tehuu besa' ia, emi ta leo naa' so'. 5 De emi muste mafarene fai a ulu na dei! Besa' ia emi doo' a maan seli neme nonoi-tatao maulu' ria mai! Huu ria naa, emi muste saledale-tu'etei mara, fo masue-malai ao sama leo' maulu na. Kalu ta'a sona neu' ko Au atafali mai hai fali' dedede' lilo pilas sira reme emi mai. 6 Tehuu Au amaho'o bai', nana huu emi ta sipo' Nikolai nanori-nafadan fo ri' ana mana tuka dea nara tao tuka. Au boe ta sipo' sira nonoi-tataon.a
7 Nenene matalolole, hata fo ri' Manetualain Dula-dale Na nafadan neu' Ria jama'at Nara. Lahenda fo tuka nahere Au losa' mate, neu' ko Au fee isin ela ana bole naa ai boa' neme ai huu' fo nai Manetualain okan dale'. Huu fo lahenda bea naa ai huu' ria boa na, ana hapu soda' matetu' manaetu-manabasa taa'.’”b
Ramatua Yesus haitua hehelu' fee jama'at nai Smirna
8 Lahenda Dae-bafo' Tetea' dedea naroo nae, “Yohanis, besa' ia o muste dui' susura feke'. Lii na leo ia':
‘Soa-neu' jama'at nai kota Smirna:
Susura' ia neme Au, Yesus. Basa-basan reme Au mai, mulai neme masososa na losa babasan. Fai a ulu na Au mate, tehuu besa' ia Au asoda selu'. De nenene Au dedea Ka.c
9 Au ita emi doidoso ma nai kota Smirna. Tuka lahenda dae-bafo' a memete na, sona emi lahenda manato'a-manataa'. Sekonaa te, tuka Manetualain memete Na, emi kamasu'i. Lahenda fo ri' dedea ramumulu-ramamae' emi, manaku rae, sira nana Manetualain lahendan. Sekonaa te, Manetualain lahendan ta sira. Sira sama leo' jama'at fo ri' tuka nitu ra malaka na. 10 De nenene matalolole. Neu' ko emi bei hapu susa-lela, tehuu boso' bii. Sadi emi bubulu', nitu ra malaka na saka' hopu emi ruma fo tee emi leo bui dale' meu, losa fai' sanahulu. Ria maksud na, ela emi hiru masadea Au. Leo mae ara nau raisa emi, tehuu boso' mafarene heni Au. Lahenda fo tuka nahere Au losa' mate, neu' ko Au balas ria sosota na, ela ana hapu soda' manaetu-manabasa taa'.
11 Nenene matalolole hata fo ri' Manetualain Dula-dale Na nafadan neu' Ria jama'at Nara. Lahenda fo tuka nahere Au losa' mate, neu' ko ta doidoso nai tasi ai-pila' mana mate taa'. No ria naa, ana ta mate ka lai' dua na.’”d
Ramatua Yesus haitua hehelu' fee jama'at nai Pergamus
12 Lahenda Dae-bafo' Tetea' dedea naroo nae, “Yohanis, besa' ia o muste dui' susura' feke' bali. Lii na nae leo ia':
‘Soa-neu' jama'at nai kota Pergamus:
Susura' ia neme Au, Yesus. Au homu tafa tande' mahina dea-dale'. Nenene Au dedea Ka.
13 Au bubulu' emi kota Pergamus ma. Mana pareta fo nai naa, nana nitu ra malaka na. Leo mae leo' naa, tehuu emi homu mahere Au nade Ka, ma mamahere maroo Au. Fai a ulu na Au lahenda Ki esa nai naa, nade Antipas. Ana nanori-nafada roo-tetu' la'o naroo la'e-neu' Au eno masoda Ka, tehuu raisa ni. Leo mae leo' naa, tehuu emi ta malena Au.
14 Tehuu Au ita emi tuda huu hihii-nanau' esa-dua. Lahenda hida reme emi mai tuka Balaam nanori-nafadan. Fai a ulu na Balaam nanori-nafada Balak fo duduku-papau' lahenda Israel ara, losa' ara ralena-laka Manetualain hihii-nanaun. Ana fufudi-lele'o si soko-taku, raa nanaa' sosoko' ma hohoke.e 15 Lahenda hida reme emi mai, tuka Nikolai nanori-nafadan.f 16 De emi muste saledale-tu'etei mara. Kalu ta'a, sona ta doo' a so' te Au mai fo oi dedea' emi boe, tande na sama leo' tati pake tafa'.
17 Nenene matalolole hata fo Manetualain Dula-dale Na nafadan neu' Ria jama'at Nara. Lahenda fo tuka nahere Au losa' mate, neu' ko Au fee ni naa roti manna, mana peda matalolole' nai nusatetu-ikutema'. Neu' ko Au fee ni batu fula' esa, mana dui' ria nade bebeu na. Noi ria mesa' ana bubulu' nade' ria, tehuu lahenda feke' ta bubulu'.’”g
Ramatua Yesus haitua hehelu' fee jama'at nai Tiatira
18 Lahenda Dae-bafo' Tetea' dedea naroo nae, “Yohanis, besa' ia o muste dui' susura feke' bali. Lii na leo ia':
‘Soa-neu' jama'at nai kota Tiatira:
Susura' ia neme Au, Yesus, Manetualain Ana Na! Au mata Ka nahaa sama leo' ai-pila', ma Au ei Ka pilas sama leo' riti fo lahenda hotu ni nai ai-pila' dale'. Nenene Au dedea Ka.
19 Au ita emi leleo-lala'om. Emi sue-lai matetu' Au ma mamahere tebe-tebe Au. Emi tuka maroo Au pareta Ka, de malalau' lahenda ra. Leo mae lahenda tao doidoso emi boe, emi manenete maroo. Au bubulu', besa' ia emi moi-tao mahere soa-neu' Au.
20 Tehuu emi tuda huu hihii-nanau' esa: emi sipo' no malole ina' Isabel fo ri' nadedema aon nae, ria nana Manetualain mana nesi matan. Ma emi mataa' ana nanori-nafada pepeko' Au lahenda Kara. Huu no ria nanori-nafada napuputa na, de Au lahenda kara hohoke ma raa nanaa' sosoko'. 21 Au asa'ai ina' ria kokosen, ela ana foa ela sala' ria, tehuu ana ta nau.
22 De mete matalolole, te besa' ia Au aetu' huku ni neni' hedis esa, losa' ana ta bisa foa neme mamana susuku na mai. Leo' naa boe neu' basa lahenda fo ri' hohoke ni. Kalu ara ta foa ela ina tadalu' ria, sona ta doo' a so' te, Au huku si. 23 Neu' ko Au aisa ina tadalu' ria ana nara. No ria naa, emi basa fo ri' mamahere si a malela' mae, Au bubulu' lahenda dae-bafo' a dale ana boboko nara. Ma neu' ko Au balas emi tuka nonoi-tatao mara.h
24 Tehuu nai Tiatira, emi ruma ta tuka ina' ria nanori-nafada tadalu na. Emi ta sipo' nanori-nafada nino fo ara rae, ‘nitu ra kuasa maiu na’. Huu ria naa, ta parluu Au asa'ai emi, 25 sadi emi homu mahere namahere mara losa' Au mai. 26-28 Lahenda fo tuka nahere Au losa' mate, neu' ko Au fee ni kuasa. Kuasa ria bau-ina', sama leo' Au hapu neme Papa Ka mai, fo pareta basa lahenda nusa' rai dae-bafo' a neni' tete'e besi. Kalu bea nalena-laka neu' ana, neu' ko ana tao nalulutu' asa, sama leo' lahenda tao nalulutu' ure dae.i Neu' ko Au fee emi ruu' dulupila' a.
29 Nenene matalolole hata fo ri' Manetualain Dula-dale Na nafadan neu' Ria jama'at Nara.’”