1-2 Soda-mole' neme au, Yohanis, Yesus Kristus ata Na.

Nai susura' ia, au dui' la'e-neu' hata fo neu' ko mori-dadi. Au bubulu' hihii-nanau' ia ra leo ia': Manetualain nafada mema' Yesus Kristus. Manetualain nadenu Yesus nafada Manetualain ata Nara. Boe ma Yesus nadenu eila'o-limalopen esa nai nusatetu-ikutema' a natudu basa hihii-nanau' ia ra, ela au dui' mema'. Huu fo ta doo' a so', te tantu basa hihii-nanau' ia ra dadi. De emi muste mamanene matalolole Manetualain Hara-dasin fo ri' Yesus nafada.

3 Basa lahenda fo lees susura' ia losa' lahenda bisa ramanene, sona ara raua-ranale raan seli. Ma lahenda fo ramanene susura' ria isi-liin, ma tao tuka hehelu na, sira boe raua-ranale. Huu fo ria ledo-fain nanenea' so.

4 Au haitua susura' ia fee Manetualain jama'at kahitu Nara rai propensi Asia.

Au hule fo Manetualain natudu dale malole Na, ela emi bisa masoda no tetu-tema', mole-dame ma tesatei-tamadale'. Huu fo Manetualain nasoda mema' neme fai a ulu na. Ana nasoda nai besa' ia, ma nasoda losa doo na neu. Au hule Ria Dula-dale Na natudu dale malole Na, ela emi masoda no tetu-tema', mole-dame ma tesatei-tamadale'. Au ita Ria Dula-dale Na, sama leo' dula-dale' hitu rasare ra Manetualain kadera mana pareta Na.^{a b} 5 Au hule Yesus Kristus natudu dale malole Na, ela emi bisa masoda no tetu-tema', mole-dame ma tesatei-tamadale'. Ana dedea leleka' la'o naroo la'e-neu' hata fo ri' Manetualain nafada Ni. Fai a ulu na Ana mate, tehuu Manetualain fee Ni nasoda selu', ela Ana dadi lahenda masososa' fo ri' nasoda selu' neme mamates a. Ria boe dadi Malaka fo ator basa mane' rai dae-bafo' a.

Huu no Yesus sue-lai ita, de Ana fee daa Na faa soa-neu' ita. No Ria mamate Na, Ana soi eno' ela po'i-tata na ita teme sala-siko' a kuasa na mai.^c 6 Ana so'u ita dadi Ria anarau Nara, ela ita toi-tao soa-neu' Ria Aman Manetualain. Yesus Kristus tebe marela-masa'a ma kuasa Na mana basa taa'. Tebe, ria!^d

7 De madila' mata mara fo mete matalolole! Besa' ia Yesus no Papa Na rai nusatetu-ikutema' a. Tehuu ta doo' a so' te Ana onda mai nai oa' dale'. Basa lahenda rai dae-bafo' a neu' ko rita Ni. Leo' naa boe, neu' lahenda fo ri' maulu na ara pau Ni. Neu' ko basa lahenda nusa' nai dae-bafo' a rasaledale ma dola ramatani nana huu ara ralela' Ana. Basa ia ra tantu dadi. Tebe.^e

8 Manetualain nae,

9 Ita basa tamahere bela' a tae, Yesus nana, ita Mane na, huu ria naa au dadi emi toranoom. Lahenda feke' a ramanasa ma tao doidoso ita basa, nana huu ita tuka Yesus. Tehuu Yesus natetea ita dalen, ela bisa tanenete taroo. Lahenda ta sipo', nana huu au tui-beka fee lahenda la'e-neu' Manetualain Hara-dasin, ma anori-afada la'e-neu' Yesus. Huu ria naa, besa' ia ara hopu ra au, de tu'u au leo pulu Patmos ia mai. 10 Lai' esa de la'e fai huhule-haradoi', Manetualain Dula-dale Na onda mai' au. Kekeneu te, au amanene haraoe' bau-ina' esa nahara nai au dea ka, lii na sama leo' saki. 11 Haraoe' ria nadenu au nae, “Yohanis! Au saka' atudu o hihii-nanau' esa. Basa-basan fo o mita, muste dui' asa. Ma o muste haitua si leo jama'at kahitu' ara, si' jama'at nai kota Efesus, kota Smirna, kota Pergamus, kota Tiatira, kota Sardis, kota Filadelfia ma kota Laodikia.”

12 Au amanene leo' naa, boe ma au lipe dea ka fo mete bea ri' mana dedea' ria. Tehuu au ita dedede ana' hitu mana fua' rai mamana pepeda dedede' lilo pilas. 13 Ma Lahenda esa napadei nai dedede' sira talada. Ria rupa-lolen sama leo' Lahenda Dae-bafo' Tetea'. Ana pake badu manaru losa ei basa na, ma lafa ana' lilo pilas esa mana feo' nai ara Na.^g 14 Laka-doo Na fula makadila sama leo' aba-mina'.^h Mata Na nahaa sama leo' ai-pila'.ⁱ 15 Ei Na pilas sama leo' riti fo lahenda hotu ni nai ai-pila'. Haraoe Na sama leo' oe a rirido'.^j 16 Ana homu ruu' hitu rai lima ona Na. Tafa mahina dea-dale' tande' esa, kalua neme bafa Na mai. Mata-idun rahaa sama leo' ledo a nahaa nai ledo hanan.

17 Au ita Lahenda ria, boe ma leku-bara uu' ei dae Na, sama leo' lahenda saparao. Tehuu Ana fua lima ona Na neu' au, ma dedea nae, “Ana ki on! Boso' bii'! Basa-basan mori-dadi reme Au mai, neme masososa na losa babasan.^k 18 Maulu na Au mate, tehuu besa' ia o mita! Au asoda selu' ma neu' ko Au asoda losa doo na neu! Ma Au homu koe' fo ri' soi mamana' lahenda mana mate' ara, ela fee si rasoda selu'. 19 O muste dui' basa-basan fo besa' ia o mita, ma dui' basa-basan fo ri' neu' ko mori-dadi. 20 Au afada sosoa na leo ia': dedede' lilo pilas kahitu' sira, sosoa na ri' jama'at kahitu' ara. Ma ruu' kahitu' fo o mita si rai Au lima ona Ka, ri' Manetualain eila'o-limalopen hitu rai nusatetu-ikutema' a. Ara reni haraoe' neme Manetualain mai soa-neu' jama'at kahitu' sira.”