3 Yohanis
Yohanis dui' ria susura na
1
Gayus au toranoo susue-lalai' ka. Soda-mole' neme au, Yohanis, fo ri' dadi mauli-malaka sarani'.a2 Au hule Ramatua' a nanea-nasala'e o, fo ela o soda' ma dale ma henu' no mole-dame. 3 Toranoo' hida mai tui au rae, o tuka maroo Manetualain eno masoda roo-tetu Na. Au amanene leo' naa, boe ma au amaho'o-atadale. 4 Au amaho'o aan seli nana huu amanene rae, au ana kara leo-la'o tuka eno roo-tetu'.
Yohanis io Gayus, nana huu ana nalala'o nonoi-tatao' no malole
5 Toranoo susue-lalai'! O sipo' toranoo' fo ralala'o Kristus nonoi-tataon no malole, leo mae o bei ta malela' asa. Ria sama leo' o malala'o Manetualain nonoi-tataon no malole. 6 Lahenda fo fali mai si a, tui jama'at nai ia rae, o sipo' asa no malole ma sue-lai si. Besa' ia au hule fo o tulu-fali maroo si leo' naa, huu fo ria ri' tao namaho'o Manetualain dale Na. 7 Ara la'o rule-feo basa mamana' ain fo ranori-rafada lahenda la'e-neu' Yesus Kristus. Tehuu ara ta sipo tutulu-fafali' hata esa neme lahenda kamahere taa' ara. 8 De mema' naraa ita ri' muste tulu-fali si. No ria naa, ita to si sama-sama talala'o Ramatua' a nonoi-tataon.
Diotrefes, mana tao kaco
9 Maulu na, au haitua susura' fee jama'at nai o mamana ma, tehuu Diotrefes tao aon sama leo' malaka. Ma ana ta nau namanene au. 10 De kalu au leo naa' uu, neu' ko au tui ledo-ledo la'e-neu' ria nonoi-tataon. Ana dedea napuputa' ela natuda ita. Lena-lena' bali, ana ta sipo' Ramatua' a lahendan fo ri' mai rai naa. Ana duduku-papau' toranoo' fo rai naa, ela boso' sipo' lahenda sira. Kalu lahenda rai naa nau tulu-fali si, ana usi henis reme jama'at ara mai.
Demetrius nalala'o Ramatua' a nonoi-tataon no malole
11 Toranoo susue-lalai'! O muste mete conto neme lahenda fo ri' noi-tao hihii-nanau' malole. Boso' mete conto neme lahenda fo ri' noi-tao hihii-nanau' tadalu'. Huu fo lahenda bea noi-tao hihii-nanau' malole, sona Manetualain lahendan ria. Tehuu lahenda bea noi-tao hihii-nanau' tadalu', sona ta nalela' Manetualain.
12 Conto leo-leo' Demetrius. Basa lahenda ra io ni, nana huu ana tuka Manetualain eno masoda roo-tetun. Au boe io ni ma o bubulu' au ta dedea fufudi'.
Yohanis dui' nate'e susura na
13 Au bei nau afada o hihii-nanau' feke' dodou', tehuu au ta nau dui' asa reu' susura'. 14 Au amahehena' ta doo' a so', te ita taneta ela ita dua bisa dedea tasasare mata'.
15 Neme' naa leo. Toranoo' fo rai ia haitua haraoe soda-mole'. Malosa' au haraoe soda-mole ka fee toranoo' fo rai naa, esa-esa' ko no' ria nade na.
Soda-mole',
Yohanis