Yakob nafada ana nara esa-esa' ko hada-pariin ma ua-nale nara
49
Boe ma Yakob nadenu raloo basa ana nara. Basa si tesa, boe ma ana nafada nae, “Ana kara emin! Emi basa mai' ia, manenea' mo au dei. Au saka' afada emi, esa-esa' ko eno masoda na nai fai mabui'.” 2 Boe ma Yakob mulai nafada mema' ana nara nae,“Leo ia'! Yakob ana nara emin! Emi mai mapadei' eo ma au.
Mamanene emi papam Israel dedea na.
3 Ruben! O nana au ana ulu ka! O nana au tete'e ka ma au lima boa ona ka. Lahenda hada' ra o seli. 4 Tehuu o dale ma ta matetu', ta bubulu' hihii-nanaum leo bea' sama leo' nafa a koka neu-mai. Kekeneu te, o suku mo' au sao ki Bilha, de tao makekeo o papa ma mamana susuku na. Huu ria naa, mopo o pangkat ulu bau-ina ma!
5 Simeon mo Lewi! Emi dua moi maraa' a. Emi dua muda laesa' lesu tafa', fo tao fee lahenda doidoso. 6 Emi namaho'o ma ri' tati maetu sapi ra ei pipii nara, losa' ara dile eeto ada' mamanan. Ma tadalu mara bali, ri' emi heku nisi mara, besa' ko maisa lahenda. Huu ria naa, au ta tao dale' neu' emi dedea-nafadam. Au boe ta nau sososo' leo emi dedea ma. 7 De besa' ia au kutuk emi meru-ranim ria, huu fo emi tao seli uuku'. Ma kalu emi mamanasa mo lahenda, emi ta manuu dale kasian bai' boe'. Neu' ko emi lepa-masaa aom emi tadalu mara. Neu' ko Manetualain fee emi tititi-nonosi mara esa' ko matan. De ara leo kofela rai basa mamana' nai dae Israel.
8 Yahuda! O nade ma sosoa na nae, ‘i'io’. Neu' ko o a'a-fadi mara io o ma hada-horomata neu' o. O maseki musu-noo mara, losa' ara ta bisa boti' laka nara. 9 O sama leo' singa tena bara'ai', de bisa saka aon nanaa'. O sama leo singa mane' a hela naroroo aon saka' suku; ta hapu hata esa naparani tatao o boe'. O sama leo' singa ina' a nanea ana na; ta hapu lahenda naparani tafaruruu ni. Leo' naa boe neu' o. Lahenda lele o ma ara ta raparani tao rupa-rupa'. 10 Neu' ko o homu pareta. O tititi-nonosi mara boe homu pareta ratutuka ao, losa' neu' ko esa nanuu haak lena heni basan, ria ri' homu pareta ria. Basa lahenda nusa' ara do'o Ni ma ramanene neu' Ana.a 11 Neu' ko o masoda no namaho'o-natadale'. O mahii' ubea' boe, hapu! O mahii' tao ubea' boe, dadi! O banda-manu mara ma oe-daem buna-boan tamba dodou' losa' henu-sofe'. 12 O nanaa-nininum mina-malada, ta etu-basan.
13 Sebulon! O dae posaka ma loa na seli ma nanenea' tasi' a, losa' natoo no kota Sidon. Ofa' ara reme basa mamana' ain mai nafu no malole nai o namo-sesee ma.
14-15 Isaskar! O sama leo' keledei baraai', tehuu o laka batu ma seli. Kalu o suku nai eno' lain,b bea ri' bei bisa nafoa o fo la'o naroo. Tehuu kalu o mita koro' malole nai seri' ele, ta radenu o boe', o fua ma hata mara fo muu. O leo naa'.
16 Dan! O nade ma sosoa na nae, ‘mana ee dedea'’. O mo tititi-nonosi mara, neu' ko maetu' o leo ma dedea nara no matetu'. Huu fo o leo ma, nana esa neme lahenda nusa Israel ara. 17 O kate-lalem sama leo' meke manuu raso' a lu'u nai eno suu'. Kalu lahenda sa'e dara resi' naa, sona kekeneu te o aa neu' dara a ei pipii na, losa' lahenda mana sa'e a lokopiro mai.
18 Oo MANETUALAIN! Au hule fo fee ami basa soda'.
19 Gad! O nade ma hii' nae sama leo' ‘suu’. Neu' ko parampok ara mai suu o, tehuu o maseki si.
20 Aser! Neu' ko oe-daem buna-boa nara malole na seli, losa' o bisa tao nanaa-nininu mina-malada mabeli, de mane' ara asa.
21 Naftali! O sama leo' rusa ina fui', de lahenda ta bisa ator o. O boki ma ana mara napu'-napu' mesan.
22 Yusuf! O sama leo' ai huu malaba' a mori nanenea' nai oe mata'. O doo-rana mara ralaba leo tembok madema a reu.c 23 Lahenda tao rahehedi' o sama leo' musu-noo' a ou o. 24 Tehuu Manetualain fo ri' au do'o-tabe Ni tulu-fali o. Huu ria naa, Ana tao naa lima ma baraai' losa' bisa ou balas sira, leo mae neme doo' a mai. O maseki si, nana huu Manetualain tulu-fali o. Ria kuasa Na tebe bau-ina'. De au asarai neu' Ana, huu fo Ria nanea au. 25 Neu' ko Ana nanea o boe. Ma Ana fee o ua-nale', ua-nale' neme lalai, ua-nale' neme dae-ina' a ma ua-nale' boboki-lalae', de boki ma ana' mapii-bara'ai' dodou'. 26 Lete' ara ta mopo si. Ma au fee o ua-nale' desi lena lete' ara! Ela leo' bea na ua-nale' ia ra onda reu' o, nana huu o lena heni a'a-fadi mara.
27 Benyamin! O naparani ma sama leo' busa fui' mamalaa'. Kalu balahaa ana', ana sopu ela hapu nanaa'. Kalu hatu', sona ana bati fee ana nara nanaa'. O tititi-nonosi mara kahere' leo' naa.”
28 No ria naa, Yakob nafada mema' ana nara eno masoda na nai fai mabui', esa-esa' ko no' ria tititi-nonosin. Sira basa dadi leo Israel kasanahulu dua' ara.
Yakob maten
29-30 Boe ma Yakob helu ana nara nae, “Ta doo' a so', te au mate. Kalu mate au, sona emi muste meu matoi au nai ba'i Abraham rates na. Rates ria nai lea', nanenea' koro' Makpela ma Mamre nai dae Kana'an. Maulu na ba'i Abraham asa lea' ria no oka-tinen, fo tao ni neu' ria mamana roo-rates na. Ana asa neme lahenda leo Het, nade Efron. 31 Nai naa ara ratoi ita ba'in Abraham ma ita bein Sara, au papa ki Isak ma au mama ki Ribka. De emi boe muste matoi au nai naa, neu' au sao ki Lea boboa na. 32 Emi boso' mafarene henin matoi au nai lea' fo ri' ba'i Abraham asa.”
33 Yakob dedea nae leo' naa, basa de ana napeu' neu' koi lain, boe ma mate ni.