Mane' a fee Yusuf kileo-boboki nara oe-dae
47
1-2 Boe ma Yusuf no toranoon lima leo mane' a reu. Yusuf tui nae, “Papa mane'! Au papa ka ma a'a-fadi kara reme Kana'an mai so. Ara mai reni sira bibi nara, sapi nara ma hata-heto nara katema'. Besa' ia basa si rai dae Gosen.” 3 Mane' a natane nae, “Emi nonoi ma ubea'?”
Ara rataa mane' a rae, “Ami mana foo sama leo' ami bei-ba'i mara. 4 Besa' ia, fai hanas masalae' a nai dae Kana'an losa' ta hapu nanaa' ma nau-aidoo. Huu ria naa, ami mai' nusa' ia leo lalai. Ami meni banda-manu mara boe. Besa' ia ami hule papa mane' fee ami leo nai dae Gosen, ela ami maboi banda-manu mara reu' naa.”
5 Boe ma mane' a nafada ria hihii-nanaun neu' Yusuf nae, “Besa' ia o papa ma no a'a-fadi mara rai ia so. 6 De ara bole tao nusa' ia sama leo' sira nusa hehelin. Au bubulu' dae Gosen, malole na seli nai nusa' ia. De malole lena' ara leo reu' naa. Ma sira bea raboi ralela' banda no malole, sona ela sira raboi au nuu kara reu' naa.”
7 Boe ma Yusuf no papa na leo mane' a reu, ela nalela' ana. Yakob hule-haradoi neu' Manetualain ela fee mane' a ua-nale'.
8 Mane' a natane Yakob nae, “Papa teu mi hida so?”
9 Yakob nataa nae, “Au teu ki natun esa telu hulu, tehuu au ta leo ahani' mamana' esa' a. Au bei-ba'i kara leo naa' boe. Kalu nararaa' ana no si sona au teu' kara ta desi si, tehuu henu' no doidoso.” 10 Basa de Yakob nate'a mane' a. Tehuu ana bei ta la'o, te ana hule selu' neu' Manetualain, ela fee mane' a ua-nale'.
11 Yusuf tuka mane' a nafada na, de ana natudu fee papa na ma a'a-fadi nara mamana' nai dae Gosen. Boe ma ara leo rahere reu' naa. Mamana' ria malole na seli. (Nai fai mabui na ara hule mamana' ria rae, ‘Rameses’.) 12 Yusuf nahao-nafati papa na, a'a-fadi nara, ro sao-ana nara, neme bau-ina' losa aana' ara.
Fai laa-roes nai dae Masir
13 Fai laa-roes ria masalae naan seli, losa' nai basa mamana' ain nanaa' ta'a. Neme Masir losa Kana'an, lahenda ra roi mamale' ao nara. Ara ta bisa roi-tao hata esa boe', nana huu ramalaa raan seli. 14 Lahenda reme basa mamana' nai Masir ma basa mamana' nai Kana'an, mai asa nanaa' nai Yusuf. Ana nabubua na katema' doi' sira, de neu peda si rai mane' a uma na. 15 Lahenda Masir ro lahenda Kana'an ara basa doi nara, de ara ta bisa asa nanaa' so'. Boe ma ara leo Yusuf mai, de hule rae, “Papa wakil! Fee ami nanaa' dei, ela boso' ami mate huu laas. Huu fo ami doi mara basa si so.”
16 Yusuf nataa nae, “Kalu tebe emi doi' ta'a, sona leo ia': fee emi banda-manum leo au mai, fo selu' neu' nanaa'.” 17 Boe ma ara fee banda-manu nara leo Yusuf reu, fo selu' neu' nanaa'. Ri' sira dara nara, bibi, sapi ma keledei nara. Nana huu teu' ria, Yusuf helu nae leo' naa.
18 Natafali teu' a, ara leo Yusuf mai bali rae, “Papa wakil! Ami tui tea'. Ami doi mara ma banda mara, papa selu' ma katema' asa so. Besa' ia ta hapu hata esa so boe'. Ela noi ami ao-ina ma, ma ami oe-dae mara. 19 Boso' mataa' ami mate. Kalu ami mate, bea urus dae sira bali? Malole lena' ami dadi ata fee papa wakil. Ma papa hai ma ami oe-dae mara fo soa si. Papa fee bini-kee fo ami sele-tande fee papa. Ami sosotam ma ami oe-daem, papa kati ni neni' nanaa'. Sadi boso' ami mate!”
20 Huu no fai laa-roes boe-boe masalae' a, de lahenda Masir se'o heni oe-dae nara. Yusuf asa naa katema' dae nai Masir fo dadi mane' a posakan. 21 No ria naa, basa anaraun Masir dadi mane' a atan.a 22 Tehuu Yusuf ta asa malaka agama ra oe-daen, nana huu mane' a fee si nanaa' la'o naroo. Huu ria naa, ara ta parluu se'o sira oe-dae nara.
23 Tepo' ria, Yusuf dedea no anaraun ara nae, “Besa' ia emi dadi mane' a atan. Emi oe-dae mara boe, au asa a katema' asa fee mane' a. De emi hai ma bini-kee ia ra, fo meu sele neu' dae sira leo. 24 Basa fo etu-oru, sona emi bati neu' babati' lima. Babati' esa meni fee mane' a. Ma ela babati' haa nana mabini, ma emi mo kileo-boboki mara mia.”
25 Ara rataa rae, “Papa fee ami soda' a, huu ria naa ami hule makasi dodou'. Ami nau dadi papa mane' ata na.”
26 Yusuf tao atoran ria dadi hadas nai nusa Masir. Huu ria naa, neme hade fo anaraun ara etu-oru basa, ara bati neu' babati' lima. Babati' esa fee mane' a, ma ara soa babati' haa. Noi malaka agama ra oe-daen, sona ta dadi mane' a nuun. Hadas ria ara bei pake raheren losa' besa' ia.
Yusuf helu ana natoi Yakob nai sira bei-ba'i nara mamana roo-raten
27 Mulai neme naa' mai, boe ma lahenda Israel ara leo rahani' Masir nai dae Gosen. Ara dadi lahenda kamasu'i ma tititi-nonosi nara ramefu.
28 Nai Masir, Yakob bei nasoda selu' teu' sanahulu hitu, de ria teun natun esa haa hulu hitu. 29 Fai mamate na nanenea', boe ma ana naloo na Yusuf de nafadan nae, “Ana Yusuf! Au ameda aan ta doo' a so' te Manetualain naloo fali' au. De au hule, kalu sue au sona o soo-supa fo boso' matoi au nai dae Masir ia. 30 O muste muni fali' au popora ka leo ita bei-ba'in mamana roo-raten, fo matoi au nai naa. Ria nana papa hihii-nanaun!”
Yusuf nataa nae, “Malole a, papa! Kalu papa ka hihii ma leo naa', sona au tuka-tuka mesan.”
31 Yakob dedea nae, “Kalu leo' naa, sona besa' ia o soo-supa mae, o tuka papa hihii-nanaun.”
Yusuf soo-supa tuka Yakob dedean ria. Boe ma Yakob sunda' undulaka na nai koi lain, hule-haradoi hule makasi neu' Manetualain.