Yakob no kileo-boboki nara rafafau fo saka' leo Masir reu
46
Boe ma Yakoba nafafau ria hata-heto nara fo la'o ela Kana'an. Losa koro Barseba, boe ma ana hala banda tao tutunu-hohotu' fee Manetualain fo ri' papan Isak do'o-taben neme ulu' mai. 2 Hatu' esa boe ma Yakob nalamei. Nai meis ria, ana namanene Manetualain naloo ni nae, “Yakob! Yakob! O foa fo nenene!”
Ana nataa nae, “Ubea'?”
3 Manetualain nae, “Au ia Manetualain fo ri' o papa ma do'o-taben neme ulu' mai. O boso' bii leo Masir muu. Nai naa neu' ko Au tao a tititi-nonosim dadi lahenda nusa bau-ina'. 4 Neu' ko Au sama-sama oo ko leo Masir muu. Ma neu' ko Au oo fali' tititi-nonosi mara leo dae Kana'an reu. Fai bea ma o mate, neu' ko anam Yusuf hapu hahae ma.”
5 Boe ma Yakob no ana narab foa ela koro Barseba. Ara fee ni no sao-ana nara sa'e kareta fo ri' mane' Masir haitua. 6-7 Ara reni sira posaka nara ma basa banda-manu' fo ri' ue ra nai dae Kana'an. Yakob no ana toun, ana inan, upu-anan ma soro-san, basa si leo Masir reu.
Yakob kileo-bobokin fo tuka leo Masir reu
8 Yakob kileo-bobokinc fo lali leo Masir reu nana, si':
10 Simeon no ana nara. Si': Yemuel, Yamin, Ohad, Yakin, Sohar ma Saul, fo ri' Simeon anan neme ina' Kana'an.
11 Lewi no ana nara. Si': Gerson, Kehat ma Merari.
12 Yahuda no ana nara. Si': Sela, Peres ma Sera. Yahuda ana feke nara Er no Onan, mate si rai Kana'an. Ana noo Peres ana nara, si' Hesron ma Hamul.
13 Isaskar no ana nara. Si': Tola, Pua, Ayub ma Simron.
14 Sebulon no ana nara. Si': Sered, Elon ma Yahleel.
15 Sira basa nana Yakob no saon Lea anan fo ri' boki si rai Mesopotamia. Sira ana inan esa boe, nade Dina. De Yakob no Lea tititi-nonosin basa si lahenda telu hulu telu.
16 Ana' reme sao feke na mai. Si': Gad no ana nara: Sifion, Hagi, Suni, Esbon, Eri, Arodi ma Areli.
17 Aser no ana nara. Si': Yimna, Yiswa, Yiswi, Beria ma sira feto na, nade Sera.
Beria nanuu ana' boe: Heber ma Malkiel.
18 Sira basa, lahenda sanahulu nee. Sira nana Yakob no saon Silpa upu-anan. Silpa nana, ata fo ri' Laban fee ria ana feton Lea, Yakob sao ulu na.
19 Yakob sao feke na, nade Rahel. Ria boki ana' dua. Si': Yusuf ma Benyamin. 20 Tepo' ria Yusuf sao Asnat nai Masir. Arama na, nade Potifera, ria malaka agama nai kota On. Yusuf no Asnat ana nara, si': Efraim no Manase.
21 Benyamin no ana nara boe tuka leo Masir reu. Si': Bela, Beker, Asibel, Gera, Naaman, Ehi, Ros, Mupim, Hupim ma Ared.
22 Yakob no saon Rahel tititi-nonosi nara, lahenda sanahulu haa.
23 Yakob bei saon esa bali, nade Bilha. Ria boki ana' dua, si' Dan ma Naftali.
Dan ana na, nade Husim.
24 Naftali no ana nara. Si': Yasel, Guni, Yeser ma Silem.
25 Yakob no saon Bilha tititi-nonosi nara, lahenda hitu. Bilha nana, Rahel atan fo ri' ana hapu neme papan Laban.
26 De Yakob tititi-nonosin fo ri' leo Masir reu, basa si lahenda nee hulu nee. Bei ta reke' manafeu nara. 27 Tamba Yusuf no ana nara fo ri' boki si rai Masir, lahenda dua. De Yakob no kileo-bobokin fo leo rai Masir, basa si lahenda hitu hulu.d
Yakob naneta selu' no anan Yusuf
28 Ara saka' losa Masir, Yakob nadenu anan Yahuda neu naulu' naloo Yusuf mai dama papa na nai Gosen. Ara losa Gosen, 29 boe ma Yusuf sa'e naa kareta na neu dama papa na nai naa. Ara raneta, boe ma Yusuf holu naa papa na, de ana dola doo na seli.
30 Yakob dedea no Yusuf nae, “Yusuf! Besa' ia, au ita mata' o. Ma au bubulu' o bei masoda. Huu ria naa, leo mae besa' ia au mate boe, malole a.”
31 Boe ma Yusuf nafada a'a-fadi nara nae, “Au muste uu afada mane' a ae, au kileo-boboki kara reme Kana'an mai so. 32 Neu' ko au afada ae, emi lahenda mana maboi bibi-lopo ma sapi. Huu ria naa, emi meni banda-manu' ma posaka mara reme Kana'an mai. 33 Kalu mane' a naloo emi, ma natane nae emi biasa moi nonoi ubea', 34 sona mataa ni mae, emi basa mana maboi banda meme aana mara mai, sama leo' emi bei-ba'i mara, ela ana nadenu emi leo nai dae Gosen.” Yusuf nafada nae leo' naa, nana huu lahenda Masir rahia' kalu leo rabua ro mana foo ra.