3 Yusuf tui ledo-ledo neu' toranoo nara nae, “A'a-fadi kara emin! Au ia Yusuf, emi toranoom! Papa ka bei soda', do?”

A'a-fadi nara ramanene leo' naa, boe ma ara bii raan seli, losa' ara ta dedea hata-hata esa boe'.

4 Yusuf kape si nae, “Emi manenea' mai' ia dei.”

Ara ranenea' leo Yusuf reu, boe ma ana dedea selu' nae, “Au ia Yusuf, fo ri' fai maulu' a emi se'o au leo Masir mai. 5 Tetebes ara emi se'o heni au. Tehuu emi boso' bii', boso' malelena ao' ma boso' esa sale esa. Sekonaa te, Manetualain noo au aulu' emi leo ia' mai. De no ria naa, Ana pake au fo tulu-fali lahenda dodou', ela ara boso' mate huu laas.

6 Besa' ia fai laa-roes besa' ko la'o teu' dua. Bei teu' lima bali. Nai ledo-fai sira, lahenda ta foi dae, ta sele-tande ma ta hapu buna-boa' esa boe'. 7 No eno' fo ita ta bubulu' ia, Manetualain noo au aulu' emi. Ela ruma neme emi ma emi upu-ana mara rasoda.

8 De tea na, ta huu emi nonoi-tataom losa' au nai ia, tehuu Manetualain nonoi-tataon. Ria ri' tao naa au dadi mane' Masir lima boa onan. Au dadi malaka urusan nai mane' a uma mana pareta na. Ta hapu lahenda feke' lena au.

9 Besa' ia emi lai-lai fali leo, fo tui au dedea ka neu' papa mae, leo' ia: ‘Papa anam Yusuf bei nasoda! Ana dadi lahenda bau-ina' nai nusa Masir. Ana hule papa fo lai-lai leo Masir muu. 10 Neu' ko papa bole leo nai dae Gosen manenea' mo ni. Mamana' ria malole ma loa' a. De papa bisa maboi bibi ma basa sapi mara. Ma ana hule fo papa mo upu-anam, uma isi mara ma basa hata-hetom leo mahani' naa. 11 Kalu papa nai Gosen, sona ana bisa nahao-nafati papa nai naa. Huu fo fai laa-roes bei teu' lima bali. De neu' ko ana ator fo papa mo kileo-boboki mara ma papa banda-manum, ta kura-kai hata esa boe'.’”

12 Yusuf nafada basa, boe ma ana dedea bali nae, “Besa' ia emi mita mata', hete? Ma o, Benyamin. Tebe au ia, Yusuf. 13 De mafada ita papa na mae, au kuasa ka nai Masir ia bau na seli. Ma tui papa basa-basan fo ri' emi mita. Basa sona lai-lai moo papa leo ia' mai!”

14 Boe ma ana holu naa fadin Benyamin, de dua si radola ao. 15 Ana holu naa a'a nara, de de'i esa-esa no si. Basa ria besa' ko ara mulai dedea ro ni.

16 Mane' a no pegawe nara ramanene Yusuf a'a-fadi nara mai, boe ma basa si ramaho'o. 17 Mane' a dedea no Yusuf nae, “Yusuf! Mafada a'a-fadi mara, fua hade neu' sira keledei nara fo reni leo Kana'an reu. 18 Madenu si ro papa ma no basa kileo-boboki nara, fo ara lali ia' mai. Neu' ko au fee si dae malole ina' nai Masir, ela ara bisa leo reu' naa, ma raa dae ria buna-boan. 19 Boe ma mafada si reni mema' kareta hida neme ia' mai, ela fua roo ana aana' ara ma papa ma. 20 Boso afi posaka' fo ta bisa reni si, huu fo basa lole-napu' lala'en nai Masir ia, neu' ko ara soa si.”

21 Yusuf namanene leo' naa, boe ma ana fee si kareta hida ma tua-lepa, tuka mane' a pareta na. Ma a'a-fadi nara^a boe rafafau fo fali reus tuka mane' a pareta na. 22 Yusuf fee si kakao-papake bebeu' pasang bei esa'. Tehuu ana fee Benyamin doi fula' natun telu, ma kakao-papake bebeu' pasang lima. 23 Ana haitua fee papa na hata malole ina' neme Masir, fua si reu' keledei mane' sanahulu. Ana fee tamba hade, roti ma nanaa rupa', fua si reu' keledei ina' sanahulu, ela dadi tua-lepa soa-neu' asa ratafali leo Masir mai. 24 Boe ma ana nadenu si fali ma nafarerene' fee si nae, “Boso' mareresi' nai eno'!”

25 Boe ma ara fali leo papa na reu nai Kana'an. 26 Ara losa, boe ma tui papa na rae, “Papa! Papa anam Yusuf bei nasoda. Ana dadi lahenda bau-ina', pareta nai Masir!”

Yakob namanene, boe ma noi namakokoa' a ma ana ta namahere sira dedea na. 27 Tehuu no ara tui Yusuf dedea nara, ma ana nita kareta fo Yusuf haitua ela fua roon leo Masir neu, besa' ko ana namahere. 28 Boe ma ana dedea nae, “Au ana ka bei nasoda, oo! Leo' naa sona besa' ko au amaho'o! Au muste uu dama ni dei, besa' ko au bisa mate no tesatei-tamadale'.”