Yusuf mok lilo fula na mopon
44
Ara raa basa, boe ma Yusuf naboboto' malaka urusan na nae, “O madai hade henu lahenda ia ra esa-esa' ko karong na. Ma o peda fali' doi nara neu' sira esa' ko karong na dale'. 2 O hai ma au mok lilo fula ka, tao ni neu' ana mate'a tei-susu' a karong na dale'.” Boe ma ana tao tuka Yusuf pareta na.3 Balahaa' balahaa anan, boe ma Yusuf fee si fali reus ro keledei nara ma reni nanaa'. 4 Ara raola ela kota a, boe ma Yusuf nafada malaka urusan na nae, “O malale muu usi tuka lahenda sira. Kalu hapu si, sona mae leo' ia: ‘Ubea' taon, de emi madale tadalu' neu' tou lasi' a? De emi balas ria malole na meni' tadalu leo ia'! 5 Tao leo' bea de emi mamana'o meni malaka a mok lilo fula na? Emi ta bubulu', do? Ria ta noi malaka a mok nininu na! Ana pake mok ria, fo siura-tokonoo lahenda ua-nalen. Emi tataom ia, mema' tadalu naan seli!’”
6 Boe ma malaka urusan ria usi tukas losa' hapu si. Ana nafada si tuka bisinaa' a Yusuf dedean.
7 Ara radedea laka rae, “Papa maksud ma leo bea' ia? Ami soo-supa. Ami ta bisa tao tadalu' leo' naa! 8 Papa bubulu', hete? Fai' naa ra doi' fo rai ami karong mara, ami meni fali' asa leo papa mai, hete? Tao leo' bea de ami bisa mamana'o malaka ria lilo pilan do lilo fulan neme uma na mai! Ta leo naa' fa! 9 Papa parisa' leo! Hapu hata ria nai bea karong na, sona huku maisan! Ma ela ami feke' ara dadi papa atam.”
10 Malaka urusan ria nae, “Ta'a! Leo ia' dei. Kalu hapu mok ria nai bea, sona ria ri' dadi au ata ka. Feke' ara bole fali.”
11 Boe ma ara raonda lai-lai karong sira, de ara sefi tuti' asa. 12 Malaka urusan ria parisa' lutu-lutu karong sira esa-esa, mulai neme a'a a karong na losa fadi' a. Ana hapu mok lilo fula' ria nai Benyamin karong na.
13 Benyamin a'a nara rita leo' naa, boe ma dale nara ralulutu'. Ara fua fali' karong sira reu' keledei ra, de fali selu' kota dale' reu.
14 Ara losa Yusuf uma na, te ana bei nai naa. Boe ma ara sunda' undulaka nara reu' mata na. 15 Yusuf nasapaa si nae, “Ubea' taon de emi tao au leo' ia! Emi ta bubulu' lahenda bau-ina' leo' au ia, bisa siura-tokonoo lahenda nonoi-tatao nafunin?”
16 Yahuda nataa nae, “Manetualain natudu ami sala mara, de ami bei mae ubea' bali, papa? Ami saka' masala'e tao ao-ina mara leo' bea bali. Kalu papa nau ena ma ami fadi mate'a tei-susum ia, sona malole lena' papa ena ami basa. Tao ami basa dadi papa atam leo.”
17 Tehuu Yusuf nataa nae, “Ta'a! Hapu mok ria nai bea, sona ria ri' dadi au ata ka! Emi feke' ara bole fali leo emi papa ma meu!”
Yahuda hule fo ana kati Benyamin
18 Boe ma Yahuda nanenea' leo Yusuf neu ma dedea nae, “Papa wakil! Au bubulu' papa kuasa ma sama leo' mane'. Huu ria naa, boso' mamanasa mo au. Au hule dedea bai' oo papa. 19 Usele' a papa matane ami mae, ‘Emi papa ma no fadi mi esa a, bei soda', do?’
20 Ami mataa mae, ‘Ami papa ma namalasi so. Ma ami fadi mate'a tei-susum esa. Tepo' fo boki ni, ami papa ma namalasi so. Fadi mate'a tei-susu' ria a'a bokin esa, tehuu maten so. De besa' ia, ela noi fadi mate'a tei-susu' a mesa' ana. Huu ria naa, ami papa ma sue naan seli.’
21 Boe ma papa madenu ami moo ami fadim ria mai, ela papa bisa mita ni. 22 Ami mataa mae, ana' ria ta bisa la'o ela papa na. Kalu ana la'o ela ni, sona ami papa ma mate ni.
23 Boe ma papa mataa mae, ‘Kalu emi ta moo emi fadim ria mai, sona emi ta bisa mita au mata ka.’
24 Basa de ami fali. Losa boe ma ami tui papa dedeam sira katema' neu ami papa ma. 25 Ami nanaa mara basa si, boe ma papa ka nadenu ami leo Masir mai selu' fo asa nanaa'. 26 Tehuu ami mafada mae, ‘Papa! Ami ta bisa leo naa' meu so'. Huu fo mane' a lima boa onan ria nafada nae, kalu ami ta moo ami fadi mate'a tei-susum ria, sona ami ta bisa mita ria mata na. De ami fadi mate'a tei-susu ma muste tuka dei, besa' ko ami la'o.’
27 Boe ma ami papa ma dedea nae, ‘Emi bubulu', hete? Au sao ki Rahel ana' noi dua' a. 28 Ana ulu' a ne'es ana so. Tantu banda fui' ara odo raan. Huu ria naa, losa' besa' ia au ta ita ni. 29 Kalu emi moo ana mate'a tei-susu' ia neme au mai bali, boe ma ana hapu soe sona emi tao tamba susa fee au nai fai lasi ka, de au mate.’
30-31 Huu ria naa, papa wakil. Kalu au ta oo fali' fadi mate'a tei-susu' ia leo papa ka neu, tantu ami papa ma mate ni. Huu fo papa ka sue naa ana' ia seli. Ma ana namalasi naan seli, de kalu ami tao tamba fee ni susa, tantu ana mate. 32 Lena-lena' bali au ahelu' oo papa ka ae, au ri' tanggon ana' ria masoda na. Au ahelu' oo papa ka ae, kalu au ta oo fali' ana' ria leo papa ka neu, sona au ri' tanggon sala' ria losa' mate.