3 Tehuu Yahuda sipo' nae, “Papa! Fai' naa ra, mane' Masir lima boa ona na fee ami nafarerene' nae, ami ta bole matudu mata-idu mara neu' ana, kalu ami ta moo papa ka ana mate'a tei-susum, Benyamin. 4 De papa ka muste po'i Benyamin, fo tuka ami dei. Besa' ko ami meu asa nanaa' fee papa ka. 5 Kalu papa ka ta fee Benyamin neu, sona ami ta meu boe'. Huu fo lahenda Masir ria nae leo' naa.”

6 Yakob nafada si nae, “Ubea' taon de emi mafada lahenda ria mae, emi bei manuu fadi' esa bali! Emi saka susa fee au!”

7 Ara lele'o rae, “Papa! Lahenda ria natane naroo, ela bubulu' ita ma basa ita kileo-boboki nara. Ana natane nae, ‘Leo' bea? Emi papa ma bei soda', do? Emi bei manuu fadi tou feke' boe, do?’ De ami bei mae leo' bea bali! Nau do ta nau, ami tui tea' leo. Te bea bubulu' ana nadenu ami moo ami fadi ma leo naa' neu?”

8-9 Yahuda nafada selu' nae, “Papa! Fee ami moo ana' ria leo. Au helu, kalu hata dadin, sona au ri' lepa-asaa aan kati ni. Kalu au ta oo fali' ana no soda' leo papa ka mai, sona ela au lepa sala' ria losa' au mate. De papa ka po'i ana' ria leo, huu fo ami saka' la'o ria' so. Malole lena' ami meu hapu leo, ela boso' ruma mate nana huu laas a. 10 Soba ami ta mahani doo-naru basa ia, tantu ami fali lai' dua so.”

11 Boe ma sira papa na nae, “Kalu leo' naa, sona emi tao leo ia'. Meu hai ma ita oe-daen buna-boa malole inan. Si': fani oe', bumbu, ai-nana maboo meni', modo-aidoo salap, kanari^a ma fufue feke' ara. Meni fee mane' Masir lima boa onan ria, fo mafadan mae ia nana ita neneni-fefeen. 12 Emi meni doi' desi lena ria lai' dua boe, nana huu emi muste fee fali' doi' fo ri' fai' naa emi hapu si rai karong mara. Bate lahenda sira peda sala ria. 13 Moo emi fadi ma boe, ma malale meu leo! 14 Au hule ela Manetualain mana Kuasa Bau-ina' tao na mane' Masir lima boa onan ria, kasian neu' emi ela ana fee fali' Benyamin no Simeon, fo emi basa fali sama-sama. Tehuu kalu au ana kara mopo si, sona ela au lepa aroo susa ria.”

15 Boe ma rabubua ra sira neneni-fefeen ma doi', reni leo Masir reu. Ara roo Benyamin boe. Losa naa, boe ma reu rasare Yusuf. 16 Yusuf nita Benyamin no a'a nara, boe ma ana nadenu ria malaka urusan na nae, “Moo lahenda ia ra leo au uma ka reu! Meu tati sapi esa, tunu-nasu mina-malada. Huu fo leledon ia ara raa-rinu ro au.”

17 Malaka urusan ria tao tuka Yusuf pareta na, de ana noo si leo Yusuf uma na reu.

18 Fai ria ara leo Yusuf uma na reu, a'a nara bii raan seli. Nai eno talada' ara beidea rae, “Ubea' taon de ana nadenu fo roo ita leo ia' mai? Bate ana nau tao nasususa' ita, nana huu doi' fo fai' naa ra ara fee fali' asa nai ita karong nara dale' a. Ara roi tao' a, de roo ita leo ia' mai fo kekeneu te homu raa ita, ela ita dadi ria atan. Boe ma ara roso ra ita keledei nara katema'.”

19 Huu ria naa, ara ranenea' Yusuf uma na, boe ma ara dedea ro malaka urusan ria rae, 20 “Papa! Ami hule ampon, huu fo fai' naa ra ami parnaa mai asa nanaa' nai ia. 21-22 Fai fo ami fali leo koro ma meu, ami hahae nai eno'. Ami saka' suku, boe ma ami sefi karong ara fo hani banda ra, te ami mita esa' ko doin fo ri' asa hade a nai karong dale'. Ami ta bubulu' bea ri' tao si reu' naa! Tehuu besa' ia, ami meni fali' basa doi' sira. De papa boso' mamanasa! Ela papa bubulu' ami meni doi feke' bali, fo asa nanaa'.”

23 Malaka urusan nataa nae, “Emi nee-nee! Boso' bii! Bate emi Manetualain ma fee emi ua-nale' ria nai karong sira dale'. Tepo' ria, au sipo a emi doi mara katema' so. Emi ta mahuta so'!” Boe ma ana kalua na Simeon, noon leo toranoo nara neu.

24 Basa si maso' leo Yusuf uman dale' reu. Boe ma malaka urusan ria fee si oe fo safe makamoi ei nara. Ana hani sira keledei nara boe. 25 Ana nafada nae, “Neu' ko leledon ia emi mia sama-sama mo malaka a.” Ara bei rahani Yusuf mamai na, te ara ator mema' sira neneni-fefee nara.

26 Yusuf losa, boe ma basa si sunda' undulaka nara rai mata na. Boe ma ara fee ni sira neneni-fefeen. 27 Yusuf natane si nae, “Leo' bea? Emi basa soda', do? Emi papam fo lasi' a, leo' bea? Ana bei soda', do?”

28 Ara rataa rae, “Papa atam fo lasi' so a, ri' ami papa boki ma, bei soda'.” Boe ma ara ratele bali, fo hada-horomata neu' ana.

29 Boe ma Yusuf mete nalelei' asa, losa' nita fadin Benyamin. Dua si, ama esa ma ina esa. Ana nae, “Fai' naa tui mae emi fadi mate'a tei-susu ma, nana ria', do?”

Ana dedea no Benyamin nae, “Ana' ki on! Au hule Manetualain bati fee o ua-nale' dodou'.”

30 Yusuf nita Benyamin, boe ma dale na nahii' naan seli, huu fo ana sue naa fadi na seli. Ana ta bisa nanenete nala dale na, boe ma nalale foa ela si, de leo kama na dale' neu dola nasae'edu. 31 Ana dola basa, boe ma narou oe. Ana natatama dale na, de kalua leo toranoo nara neu. Ana nadenu ata nara peda mei.

32 Ara peda fee Yusuf mesa' ana mei esa. A'a-fadi nara raa reu' mei feke'. Ria pegawen lahenda Masir, mesa' asa raa nai mei feke', nana huu lahenda Masir rahia' raa-rinu rabua ro lahenda Ibrani.^b 33 Malaka urusan ria ator fo Yusuf a'a-fadi nara ratuu' rasasare mata' ro Yusuf. Ana ator, de ratuu tuka sira esa' ko teu-fai bobokin, mulai neme ulu' a losa mate'a tei-susu' a. Ara rita ator natuu nara leo' naa, de ara heran. 34 Yusuf ator fo ata nara hai fee a'a-fadi nara nanaa' neme ria mei na. Basa si sipo bei dedesi'. Tehuu ara fee Benyamin desi lena a'a nara lai' lima. Ara raa-rinu losa' rabete.