3 Boe ma Yusuf a'an sanahulu si, rahehere ao nara reu asa nanaa' nai Masir. 4 Tehuu Yakob ta po'i Yusuf fadin, Benyamin tuka no a'a nara. Ana afi nae, “Boso' losa ana' ria hapu soe bali!” 5 Huu no lahenda nai basa mamana' ara ramanene rae hapu nanaa' nai Masir, de lahenda dodou' reu asa nai naa. Fai laa-roes ria losa dae Kana'an. De Yakob ana nara^a boe tuka reu asa nai naa.

6 Tepo' ria, Yusuf dadi mane' a lima boa ona na nai Masir. Kalu lahenda reme basa mamana' ara mai asa hade, sona Yusuf ri' se'o fee si. Huu ria naa, fai fo a'a nara losa, ara sunda' undulaka nara fee hada-horomata neu' ana, losa' mata-idu nara neta dae a. 7-8 Yusuf nita si, boe ma nalela' tuti' asa. Tehuu Yusuf tao aon sama leo' lahenda Masir, huu ria naa ara ta ralela' ana. Ana natane si no hara bera' nae, “Emi meme bea' mai?”

Ara rataa rae, “Ami meme Kana'an mai. Ami mai asa nanaa' nai papa wakil.”

9 Yusuf nafarene maulu na meis na. De ana nabibii' asa nae, “Au ta amahere! Tantu emi basa ia mana lalafa. Emi mai lalafa dae Masir eno-maan, basa nana matafali mai suu ami, hete!”

10 Tehuu ara rataa rae, “Ta'a, papa! Ami nana noi papa atam. Tebe-tebe ami mai asa nanaa'. 11 Ami basa ia papa' esa. Ami ta mana lalafa fa, papa! Ami lahenda roo-tetu'.”

12 Tehuu Yusuf dedea nasapaa nae, “Emi fufudi' ia! Boso' mapuputa' au! Tebe emi mana lalafa. Tantu emi mai lalafa nusa' ia eno-maan.”

13 Ara radedea laka rae, “Ta'a, papa wakil! Ami noi papa atam! Ami meme dae Kana'an mai. Ami lahenda sanahulu dua. Ami basa papa' esa. Ami fadi mate'a tei-susu ma foa elan no ami papa ma. Ma ami fadim esa, ne'es ana so.”

14 Yusuf nataa natafali' nae, “Ta'a! Tebe leo' bisinaa' a hata fo ri' au afada! Emi mema' mana lalafa. 15 Au nau soba emi, ela au bubulu' bisinaa' a emi dedeam ria, tebe do ta'a. Au soo-supa! Kalu emi fadi mate'a tei-susu ma ta leo ia' mai, sona emi ta bisa la'o ela nusa' ia! 16 De emi here ma lahenda esa, neu nala emi fadi mate'a tei-susu ma leo ia' mai. Feke' ara, au ena si. Au nau ita emi dedea tetebe' do ta'a. Kalu ta'a, sona mema' tebe emi mana lalafa.” 17 Boe ma Yusuf nadenu ena si fai' telu nai uma huhuku' a.

18 Fai katelu na, boe ma Yusuf neu dedea no si rai uma huhuku' dale' nae, “Lahenda esa aun bii' Manetualain. Ma au tuka ahere Ria hihii-nanaun. De ela emi bisa masoda, au po'i emi. Tehuu no naetu' esa. 19 Kalu emi tui tea', sona emi muste matudu au buti. Eno na leo ia': au ena ahere lahenda esa nai bui dale. Feke' ara fali meni fee kileo-boboki mara nanaa'. Huu fo ara rahani emi fali meni nanaa'. 20 Basa sona moo emi fadim ria mai, ela dadi buti nae emi lahenda roo-tetu'. Ela boso' au huku amate emi.”

Ara ramanene leo' naa, boe ma rataa. 21 Sira esa dedea no esa rae, “Besa' ia ita lepa-tasaa ta doidoso neme ita sala na, neu' ita fadin nai fai maulu'. Ita tita ni doidoso naan seli, losa' ana hule tutulu-fafali, tehuu ita ta tao dale' neu' ana. Huu ria naa, besa' ia ita doidoso leo' ia.”

22 Ruben nafarerene' fee si nae, “Fadi kara emin! Maulu na au asala'e emi, boso' tatao ana' ria, hete! Tehuu emi ta tao dale' neu' au dedea-nafada ka. De besa' ia ita hapu huhuku' nana huu ita lepa-tasaa ta Yusuf daa na.” 23 Ara dedea rae leo' naa, tehuu ta bubulu' Yusuf nala sira dedea na. Nana huu, Yusuf dedea no si pake dedea Masir, fo dei mana nesi mata a salin leo dedea Ibrani neu.

24 Yusuf namanene si dedea rae leo' naa, boe ma ana foa ela si, de mesa' ana neu dola nai mamana feke'. Ana dola basa, boe ma fali selu' leo a'a nara neu. Ana nadenu lahenda heke Simeon nai toranoo nara matan.

25 Boe ma Yusuf pareta ria lahenda nara, radai hade neu' a'a nara karong nara, ma peda fali' sira esa' ko doin neu' karong nara bafan. Ana nadenu fo fee si tua-lepa boe. De lahenda sira tao tuka Yusuf pareta na. 26 Yusuf a'a nara fua hade karong ara reu' keledei nara, boe ma ara fali reus.

27 Nai eno talada' ara hahae ao nara. Boe ma esa neme sira mai sefi karong na, fo saka' hani keledei na. Tehuu ana nita doi na mana fua' nai hade lain. 28 Ana kekes ara! Ana naloo a'a nara nae, “Mai mita' ia dei. Ita soe ia so! Ara fee fali' au doi ka nai au karong ka.”

Basa si rita leo' naa, boe ma mopo aafi nara, huu fo ara bii raan seli. Ara beidea rae, “Manetualain tao ita leo' bea ia so?”

29 Basa de ara la'o raroo. Losa Kana'an, boe ma ara tui papa na basa-basan fo dadi a. 30 Ara tui rae, “Papa! Mane' Masir lima boa onan ria talalu naan seli. Dedea-nafadan meru'-meru' mesan. Ana neo ami, ami meu lalafa ria nusa na. 31 Tehuu ami mataa mae, ‘Ta'a! Ami tui tea', ami ta lahenda mana lalafa. 32 Ami lahenda roo-tetu'. Ami basa lahenda sanahulu dua. Ami papa' esa. Tehuu esa ne'es ana so, ma mate'a tei-susu' a foa elan no ami papa ma nai Kana'an.’

33 Boe ma malaka ria nae, ‘Au nau soba emi ia tui tea' do ta'a! Emi muste foa ela esa nahani' ia. Feke' ara fali, meni hade fee kileo-boboki mara, ela boso' mate huu laas a. 34 Emi muste mo fadi ma mai dei. No ria naa, besa' ko au bubulu' emi ta mana lalafa, tehuu mema' emi lahenda roo-tetu'. De au bisa po'i emi toranoom fo ri' au ena ni. Ma au fee emi lela', ela emi bole leo bea' meu a nai nusa' ia.’”

35 Tui basa, boe ma ara ofe karong ara isi nara. Ara kekes ara, huu fo esa' ko nita' doin nai sira karong nara dale'. Yakob no ana nara rita leo' naa, boe ma ara bii raan seli.

36 Yakob dedea no ana nara nae, “Emi tao mamopo au ana kara. Yusuf ne'es ana so. Simeon boe leo' naa. Besa' ia emi nau mo Benyamin bali? Tebe-tebe emi tao doidoso au!”

37 Boe ma Ruben dedea no papa na nae, “Papa! Fee au oo Benyamin. Au ri' lepa-asaa aan. Au helu, neu' ko au oo fali' ana leo papa ka mai. Tehuu kalu ta'a, sona papa ka maisa au ana tou ki dua si.”

38 Tehuu Yakob nafada natafali' nae, “Ta bisa fa! Emi ta bole moo Benyamin. Ria a'an Yusuf, maten so. Besa' ia ela noi ria mesa' ana. Kalu ria hapu soe nai eno talada', emi tao au susa losa' loe dae bolo'.”^b