3 Basa boe ma sapi feke' hitu kalua reme lee ria mai. Ao nara korau raan seli. Ara rapadei ranenea' sapi mapeta' sira. 4 Sapi korau' sira hitu si odo ra sapi mapeta sira hitu si. Boe ma mane' a keke na aon.

5 Ta doo bea boe' te, ana suku namanee bali ma nalamei selu'. Ana nita hade neu' pule' hitu, kalua reme hade huu mapeta' esa. 6 Basa boe ma nita selu' hade laka' pule' hitu. Ara mamale, nana huu ani hanas a la'e si. 7 Hade laka' sira odo ra hade neu' kahitu' sira. Boe ma mane' a foa na aon. Besa' ko bubulu' nae, ana nalamei selu'.

8 Balahaa anan ria, mane' a dale na ta tama so'. Ana pareta lahenda ra reu raloo basa lada' ara, ma lahenda malela' rai Masir. Ana tui si ria mei-afes na, tehuu ta hapu esa bisa nafada meis ria sosoa na boe'.

9 Boe ma pegawe fo urus mane' a nininu na nafarene Yusuf. De ana tui mane' a nae, “Papa mane', au muste manaku au sala ka. 10 Maulu na, papa mamanasa mo au oo nonoo ka, de ena ami nai uma huhuku' dale'. 11 Hatu' esa, boe ma ami dua malamei. Esa' ko meis na ma meis ara esa' ko sosoan. 12 Nai uma huhuku' ria dale' boe, lahenda Ibrani muri-ana' esa nai naa. Ana parnaa dadi mane' a komandaan manea na atan. Ami tui ni ami meis mara. Boe ma ana nafada meis sira sosoan. 13 Huu ria naa, papa mane' so'u ma selu' au. Tehuu au nonoo ki ria, hapu huhuku mamates. Basa sira, natetu na lahenda Ibrani ria dedean!”

14 Mane' a namanene leo' naa, boe ma nadenu lahenda lai-lai reu rala Yusuf nai uma huhuku dale'. Yusuf keu heni koromii na, kati kakao-papake nara ma sasau aon, basa de neu nataa mane' a. 15 Ana losa, boe ma mane' a dedea nae, “Ana tou' on! Au alamei, tehuu ta hapu lahenda esa bisa nafada meis ria sosoa na boe'. Tehuu lahenda rafada au rae, o bisa.”

16 Yusuf sipo' nae, “Papa mane'. Au boe ta alela'. Noi Manetualain bisa nafada no matetu' meis ria sosoa na. Ria tantu nau nafada hihii-nanau' malole neu' papa mane'.”

17 Mane' a tui nae, “Nai au meis ka dale', au apadei' nai lee Nil suu na. 18 Boe ma sapi mapeta' hitu rou nara makadidilan, ara kalua reme lee ria dale' mai, raa nau nai lee a suu na. 19 Basa boe ma sapi feke' hitu mai bali. Tehuu sapi sira korau raan seli. Nai dae Masir ia, au bei ta parnaa ita sapi korau rupa leo naa'! 20 Tehuu au heran aan seli! Kekeneu te, sapi korau kahitu' sira, odo ra sapi mapeta kahitu' sira. 21 Ara odo basa si, tehuu sira korau raroo. Basa boe ma au edo' a ao ka.

22 Au suku amanee selu', boe ma alamei bali. Au ita hade neu' pule' hitu, kalua reme hade huu mapeta' esa mai. 23 Basa de au ita selu' hade laka' pule' hitu. Ara mamale, nana huu ani timu a la'e si. 24 Hade pule laka' sira, odo ra hade neu' pule kahitu' sira. Boe ma au foa a ao ka. Au tui lahenda malela' ara meis ria, tehuu ta hapu esa bisa nafada sosoa na boe'.”

25 Yusuf nafada nae, “Papa mane'. Meis sira dua sosoa' esa' a. Manetualain nafada mema' papa mane', hata fo Ana saka' taon. 26 Meis ria sosoa na, leo ia': sapi mapeta' kahitu' sira ma hade neu' pule kahitu' sira, nana fai betes teu' hitu. Sira sosoa' esa' a. 27 Sapi korau' kahitu' sira ma hade laka pule kahitu' sira, nana fai laa-roes teu' hitu.

28 De Manetualain nafada mema' hata fo Ana saka' taon. Ria sama leo' bisinaa' a au afada a. 29 Neu' ko ita hapu fai betes losa teu' hitu, nai basa mamana' nai nusa Masir ia. 30-31 Basa ria, te ita hapu fai laa-roes losa teu' hitu. Neu' ko fai laa-roes ria ta madudula', losa' ta hapu nanaa' nai nusa' ia. Basa lahenda ra ramalaa raan seli, losa ara ta bisa rafarene fai betes ria.

32 Papa mane' malamei matututi' lai' dua, nana sosoa na nae, Manetualain ator mema'. Ta doo' a, te hata fo ri' Ana ator, mulai dadi.

33 Huu ria naa, au ae leo' ia: malole lena' papa mane' saka ma lahenda malela' esa, ela bisa urus no malole. Boe ma so'u ni ator natalolole nusa' ia. 34 Nai fai betes teu kahitu' sira dale', malole lena' papa mane' so'u lahenda feke' bali, ela rabubua basa buna-boa lena' ara. Buna-boa' sira ara bati si reu' babati' lima fo pake babati' haa, ma peda babati' esa. 35 Ara muste tuka papa mane' pareta ma, fo susu hade reme basa koro' rai Masir ia. Boe ma ara muste peda hade sira reu' mamana pepeda-fufua' ara, ma ranea ratalolole si. 36 Fo ela nai teu' laa-roes kahitu' sira dale', ita bei hapu nanaa'. Ator leo naa', sona ta hapu lahenda mate huu laas.”

37 Mane' a no pegawe bau-ina nara ramanene Yusuf dedea nae leo' naa, boe ma ara sipo' Yusuf dedean ria. 38 Mane' a dedea no pegawe nara nae, “Manetualain Dula-dale Na kuasan mema' nai Yusuf. Huu ria naa, ita ta bisa hapu lahenda feke' lena neme ria mai.”

39 Boe ma mane' a dedea no Yusuf nae, “Manetualain nafada basa ia ra neu' o. Besa' ia ami bubulu' o lahenda malela'. Ma o dudu'a-aafim lena basa lahenda ra. 40 Huu ria naa, besa' ia, au so'u o dadi au lima boa ona ka. O dadi malaka nai au uma mana pareta ka. Ma neu' ko basa anaraun kara tuka o pareta ma. Noi au ri' lena neme o mai.”

41-42 Boe ma mane' a olu naa rereli makuta na, de olun neu' Yusuf lima u'u na. Ana dedea nae, “No eno' ia, au so'u o dadi au lima boa ona ka, nai basa dae Masir ia.” Ana olu fee Yusuf badu manaru balanau' esa, ma nabolii ni rante lilo pilas.

43 Boe ma mane' a fee Yusuf kareta nomer dua na fo sa'e. Lahenda ruma ralai raulu' kareta a, fo raloo rasarerei rae, “Soi eno'! Fee hada-horomata!^a Lahenda bau-ina' a saka' nesi' ia!” No eno' ria, mane' a so'u Yusuf dadi ria lima boa ona na nai dae Masir.

44 Mane' a dedea no Yusuf nae, “Leo ia'. O bubulu' mema', au nana mane'. Tehuu au afada basa lahenda fo nai Masir ia ae, kalu o ta fee isin sona ara ta bisa tao hata esa boe'.”

45 Mane' a foi Yusuf nade, Safnat Panea, tuka lahenda Masir ara naden. Ana fee Yusuf sao ana feto' esa, nade Asnat. Yusuf arama na, nade Potifera. Ria urus agama nai kota On.^b No ria naa, Yusuf dadi lahenda bau-ina' nai dae Masir.

46 Tepo' fo so'u Yusuf, nana teun telu hulu. Ana la'o rule-feo basa mamana' nai dae Masir. 47 Nai fai betes teu' kahitu' sira, oe-dae ra buna-boan dodou' naan seli. 48 Yusuf nabubua basa buna-boa' ara, de ana peda si. Ana nabubua hade nai mamana' nanenea' kota bea, sona ana peda ada' kota ria mamana pepeda-fufuan. 49 Losa' ana nabubua naa hade dodou' naan seli. Sama leo' soroae' nai tasi a suu na, losa' lahenda ta bisa uku-sudi rala si.

50 Bei ta losa fai laa-roes boe', te Yusuf saon Asnat, boki ana tou' dua. 51 Yusuf dedea nae, “Manetualain tao naa au afarene heni doidoso ka, tepo' fo au kalua eme papa ka uma na mai.” Huu ria naa, ana foi ana ulu na nade, Manase (sosoa na nae, ‘nafarene heni’).

52 Ana hapu ana nomer dua, boe ma ana dedea bali nae, “Au hapu doidoso dodou' nai mamana' ia. Tehuu Manetualain fee au ua-nale' ma au hapu ana' nai ia.” Boe ma ana foi ana' ria nade, Efraim.^c

53 Fai betes teu' kahitu' sira basan. 54 Boe ma fai laa-roes teu' kahitu' ara losa, natetu na hata fo ri' Yusuf nafada. Nai mamana feke', lahenda ra ramalaa. Tehuu basa mamana' nai Masir nanuu nanaa'. 55 Lahenda Masir ara mulai ramalaa, boe ma reu hule nanaa' nai mane' a. Mane' a nadenu si leo Yusuf reu, fo tuka Yusuf pareta na.

56 Tehuu fai laa-roes ria tamba, losa' basa mamana' nai Masir ramalaa. Boe ma Yusuf mulai hai hade neme mamana pepeda-fufua' ara, se'o fee lahenda Masir ara. 57 Boe ma lahenda reme basa mamana' ain leo Masir reu asa nanaa' nai Yusuf. Nana huu fai laa-roes ria tebe masalae naan seli.