Yusuf nafada lahenda mana huku' dua mei-afe nara sosoan
40
1-3 Nai uma huhuku' ria, lahenda dua parnaa dadi malaka urusan nai mane' Masir uma mana paretan. Esa urus mane' a nininu na ma esa urus mane' a roti na. Dua si tao rasala' mane' a. Huu ria naa mane' a namanasa, de tee si leo uma huhuku' dale' reu. Dua si mamana' esa ro Yusuf. 4 Malaka bui ria pareta Yusuf urus pegawe sira. Ara leo rai naa losa teu' esa-dua.5 Hatu' esa, boe ma pegawe sira dua ralamei. Esa' ko no' mei-afen. Ma mei-afes sira esa' ko sosoan. 6 Balahaa', Yusuf mai te nita dua si mata-idu nara ta raleleka. 7 Ana natane si nae, “Ubea' taon de fai' ia emi dua mata-idu mara ta raleleka?”
8 Ara rataa rae, “Leodae' a ami malamei, tehuu ami ta bubulu' sosoa na ubea'.”
Yusuf dedea nae, “Ta hapu lahenda dae-bafo' esa nalela' mei-afes ara sosoa na, noi Manetualain bubulu'. Soba emi tui dei. Neu' ko au saka sudi sosoa nara neme Manetualain mai.”
9 Boe ma pegawe fo urus mane' a nininu na tui nae, “Leo ia'! Au alamei, ita ai anggor huu' esa 10 ba'e' telu. Ai huu ria nadoo tuti' a, nabuna ma naboa rakikii latu-latu' mesan. 11 Au ita au homu mane' a galaas nininu na. Boe ma au etu anggor ria boa na, hee oe na neu' mane' a galaas na dale'. Basa de au loon leo mane' a neu fo ninu.”
12 Yusuf namanene leo' naa, boe ma nafada nae, “Papa. Meis ria sosoa na leo ia': Ba'e sira telu, sosoa na fai' telu. 13 Nai fai' telu dalen ia, neu' ko mane' a po'i papa meme uma huhuku' ia mai. Ma ana so'u papa fo urus selu' mane' a nininu na, sama leo' maulu na. 14 Kalu papa ua-nalem malole a leo' naa, sona boso' mafarene heni au! Kalu papa sue au, sona tui mane' ela ana po'i au eme mamana' ia mai. 15 Tuka matetu na, ara hai au no naseti' eme lahenda Ibrani ra koro na. Nai ia, au ta tao sala' hata esa boe'. Tehuu ara ena au nai uma huhuku' ia, sama leo' au lahenda tadalu'.”
16 Pegawe fo urus mane' a roti na namanene mei-afes ria sosoa na malole a leo' naa, boe ma ana tui Yusuf nae, “Fadi! Au boe alamei leo ia': au sua atutule' lapaneu telu. 17 Nai lapaneu misi lai tete'e' a, mane' a kokis rupa nara rai dale'. Tehuu manupui' ara mai, de raa heni kokis sira nai au laka ka lain.”
18 Yusuf namanene leo' naa, boe ma nataa nae, “Papa mei-afes ma sosoa na leo ia': lapaneu sira telu, sosoa na nae fai' telu. 19 Nai fai' telu dalen ia, neu' ko mane' a nadenu lahenda tete heni papa laka ma. Ma ara londa nenetu ma neu' dii lain. Boe ma manupui ara mai raa heni papa popora ma.”
20 Basa fai' telu, naraa la'e mane' a fai boboki na, ana tao feta bau-ina' fee basa pegawe nara. Ana pareta fo po'i pegawe sira dua reme uma huhuku' dale' mai. 21 Mane' a so'u selu' pegawe fo urus nininu na neu' ria pangkat maulu na, de ana urus selu' mane' a nininu na.
22 Tehuu pegawe fo urus mane' a roti na, ara londa raisan natetu na Yusuf dedean.
23 Tehuu pegawe fo urus mane' a nininu na, ta nafarene Yusuf. Huu fo nafarene heni Yusuf.