Yusuf ma malaka Potifar sao na
39
1-2 Tepo' ria, lahenda Ismael sira ro Yusuf leo Masir reu. Nai naa lahenda bau-ina' esa, nade Potifar. Ria malaka neme basa soldadu fo ri' ranea mane' Masir uma mana pareta na. Potifar asa naa Yusuf neme lahenda dagan sira mai, dadi ata nai ria uma na. Nai naa, MANETUALAIN tulu-fali Yusuf, de ria nonoi-tataon basan dadi no malole. 3 Malaka na nita Yusuf nonoi-tataon malole a, boe ma ana bubulu' matetu' MANETUALAIN tulu-fali Yusuf. 4 Huu ria naa, malaka na nahii' Yusuf ma namahere ni. De ana so'u Yusuf dadi mandor nai uma na. Ana fee Yusuf urus ria uma na ma basa posaka nara. 5 Mulai neme Yusuf dadi mandor nai naa, Manetualain fee ua-nale' neu' ria malakan, lahenda Masir ria. Ria uma na oe-isin, posaka nara, oka-tinen, ma ria nonoi-tataon, basan dadi no malole. 6 Potifar nita Yusuf urus basa nonoi-tatao' no malole, de ana ta afi hata-hata esa boe', nalela' noi naa-ninu' a.Yusuf lole na seli. 7 Ana leo nai naa, bei ta doo' a, te Potifar sao na nahii' ana. Ana lele'o Yusuf fo dua si suku rabua'.
8 Tehuu Yusuf ta nataa, de ana sipo' nae, “Boso' tao leo naa', mama! Au malaka ki Potifar fee au kuasa, fo urus ria nonoi-tataon katema'. 9 Nai uma ia, ta hapu lahenda homu kuasa lena au so'. Huu fo malaka a fee au urus basa-basan. Noi mama ka, sona ta'a. Tao leo' bea de au bisa tao tadalu' leo naa'! Nonoi leo naa' a, nalena-laka Manetualain hihii-nanaun!”
10 Leo mae leo' naa boe, tuka-tuka fai' malaka ria sao na lele'o Yusuf la'o naroo. Tehuu Yusuf ta tao dale' neu' ana.
11 Lai' esa de Yusuf leo uma dale' neu memete ria nonoi-tataon. Fai ria, ta hapu lahenda feke' nai uma. 12 Ria malaka na sao na mai, de lobe' na Yusuf badu na, ana hela ni ma nae, “Mai leo! Besa' ia ela noi ita dua so. Mai ita dua teu tapeu' leo.”
Tehuu Yusuf ta nataa, ana naule losa' posu heni badu na, de ana nalai dea' neu. Tehuu ina' a homu nahere badu ria.
13 Potifar sao na nita Yusuf nalai ela badu na, 14-15 boe ma ana naloo lahenda mana noi nara, de nafada nae, “Emi mai mita' ia dei! Bisinaa' a tou Ibrani ria, ana maso' leo au kama ka dale' mai. Ana nau tao tadadalu au, tehuu au aloo ambera ina, de ana nalai dea' neu. Mita', ana foa ela badu na ria'. Au sao ka noo lahenda manori taa' ia mai, tao namamae' ita!”
16 Potifar sao na homu nahere badu ria losa' sao na fali main. 17 Ana tui nae, “A'a! Tou' Ibrani fo ri' a'a moon mai a, bisinaa' a ana maso' leo au kama ka dale' neu, nau hohoke au! 18 Tehuu au aloo ambera ina lahenda ra. De ana nalai neu fui', foa ela badu na ria'.”
19 Potifar namanene sao na tui nae leo' naa, boe ma namanasa naan seli. 20 Boe ma ana pareta lahenda ra hopu ra Yusuf, de teen leo mane' a uma huhukun dale' neu.
21 Tehuu MANETUALAIN ta nafarene heni Yusuf, Ana tulu-fali ni la'o naroo losa' uma huhuku' ria malaka na nahii' naa Yusuf seli. 22 Ana namahere Yusuf. Huu ria naa, ana fee Yusuf urus lahenda mana huku' ara, ma basa nonoi-tatao' nai naa. 23 De malaka a ta laka hedi' urus hata-hata esa nai uma huhuku' ria. MANETUALAIN tulu-fali Yusuf la'o naroo, de basa nonoi-tatao' nai uma huhuku' ria dadi malole.