6 Er, ana ulu' a nambau-ina, boe ma Yahuda natane feen ana feto' esa, nade Tamar, de dua si sao. 7 Tehuu Er tadalu' naan seli. Huu ria naa, Manetualain huku naisa ni, de Er maten, te ana' bei ta'a.

8 Boe ma Yahuda nadenu ana kadua na nae, “Onan! A'a ma maten so, tehuu ana' ta'a. De besa' ia, tuka lasi' ara hadas na, o muste sao ma a'a ma sao na, ela o boki fee a'a ma tititi-nonosi'.”

9 Onan bubulu' hadas ria. Tehuu ana ta nau boki fee a'an Er tititi-nonosi'. De tuka-tuka fai', kalu ana suku no' Tamar, sona ana tu'u buna-boa' dea' neu, ela Tamar boso' boki. 10 Onan tataon ria, tao na Manetualain namanasa naan seli. Huu ria naa, Manetualain huku naisa ni.

11 Yahuda nita anan sira dua fo ri' sao Tamar a mate si, boe ma ana bii'. Ana afi nae, boso' losa ana murin Sela sao Tamar, te maten bali. Huu ria naa, ana nafada manafeun Tamar nae, “Ana ki on! Malole lena' o fali leo ina-ama mara muu leo. Kalu au ana ki Sela nambau-ina, besa' ko o fali fo sao maan.” Boe ma Tamar fali.

12 Ta doo bea boe', te Yahuda sao na maten. De ana susa losa' basa fai luumata-pinuidu'.^a Boe ma ana naloo naa tian Hira, fo dua si leo koro Timna reu. Nai naa lahenda ra rame laesa' kuti bibi-lopo ra bulu nara fo rase'o.

13 Lahenda rafada Tamar rae, “O arama ma leo Timna neu urus lahenda fo kuti bibi-lopo nara bulu na.”

14 Yahuda ana murin Sela nambau-ina so, tehuu Tamar bubulu' nae, arama na ta nau feen sao Sela. De Tamar saka eno' ela nasala'o haak na. Ana olu heni papake ina-falu na, de pake papake malole. Ana pake lafa ana' fo poti etu laka na ma mata-idun. Boe ma ana neu natuu' nai koro Enaim lelesu bafa na, naraa no eno' leo Timna neu. 15 Yahuda nesi' lelesu bafa' fo maso' leo koro' dale' neu, ana nita ina' esa. Ana naendobuko ina mana sosoa ria, nana huu Tamar kakao-papaken ma poti etu mata-idun. 16 Yahuda ta bubulu' ina' ria nana manafeu na. De ana nanenea' leo ina' ria neu ma natane nae, “Kalu ita suku tabua, sona o hule bau bea?”

Tehuu Tamar nataa nae, “Neu! Neme papa ka hihii ma mai!”

17 Yahuda naloloe nae, “Leo' bea kalu au fee o kedae' esa?”

Tamar sipo nae, “Malole a, papa. Sadi papa fee au homu hata esa dei. Losa' fai bea papa haitua kedae' ria mai.”

18-19 Yahuda natane nae, “Au fee o homu hata ubea'?”

Tamar sipo nae, “Papa foa ela cap fo mana loloe' ri' papa bolii ma ria. Ma foa ela tete'e ria boe.” Yahuda namanene leo' naa, boe ma ana fee ni hata sira.

Boe ma dua si suku rabua, basa de Tamar fali. Ana olu heni papake malole nara ma lafa ana' ria, de pake selu' papake ina-falu na. Sekonaa te Tamar nairu.

20 Ta doo bea boe' te, Yahuda nadenu tian Hira nae, “O muni kedae' ia leo ina mana sosoa fo ri' nai Enaim, ela muni fali' au hata ki fo ri' ana homu si rai naa.” Hira losa naa, ana natatane neu-mai, tehuu ta hapu ina' ria. 21 Ana natane lahenda fo rai naa nae, “Emi mita ina mana sosoa fo ri' biasa natuu' nai lelesu bafa' ia boe, do? Ana nai bea, ee?”

Tehuu ara rataa rae, “Papa, Nai ia ta hapu ina mana sosoa.”

22 De Hira fali selu' leo Yahuda neu. Ana nafada nae, “Au ta ita ina' ria fa. Au asaka' ana, tehuu lahenda rai naa rafada rae, ina mana sosoa, ta'a mamana' ria.”

23 Yahuda sipo' nae, “Neme' naa ela ana soa hata sira leo! Sadi lahenda boso' tao ramamae' ita! Huu fo au nau bae, tehuu ita ta taneta too ni.”

24 Basa bula' telu, boe ma lahenda reu rafada Yahuda rae, “O manafeum Tamar tao aon leo' ina mana sosoa. Besa' ia nairu so.”

Yahuda namanene leo' naa, boe ma namanasa naan seli. Ana pareta lahenda ria nae, “Muu hela moo ina' ria mai, hotu masosoda' heni ni!”

25 Boe ma ara reu rala Tamar. Tehuu ana natudu cap a no tete'e ria. Ana nadenu si reu rafada arama na rae, “Papa parisa' matalolole hata ia ra dei. Cap ma tete'e ia, ramatua na ri' nairu' naa au.”

26 Yahuda nita hata sira, boe ma nalela' tuti' hata sira nana ria nuun. Ana nafada nae, “Tebe! Ina' ria ta sala. Au ri' sala. Ria la'e. Tuka matetu na au muste feen sao au ana ki Sela. Tehuu au ta ataa fa. Po'i ni leo!” Boe ma Yahuda ta suku no' Tamar so'.

27 Tamar ledo-fai boboki na naraa, ana boki ana kadua'. 28 Ana boki, ana' esa lima na naulu' dea'. Boe ma ina mana maboboki' a heke abas pilas neu' ana' ria lima na. Ana nae, “Ana ulu' a ria'.” 29 Tehuu ana' ria hela nafali' lima na. De nonoo na kalua naulu'. Ina mana maboboki' a nafada ana' ria nae, “Tebe o bara'ai ma seli! Huu ria naa, o maseti fo kalua maulu'!” Ara foi ana' ria nade, Peres (sosoa na, ‘naseti fo kalua’). 30 Basa, besa' ko fadi na fo ri' lima na mana heke abas pilas a, kalua. Ara foi ana' ria nade, Sera (sosoa na, ‘pilas makarela'’).