2b Yakob anan esa neme saon Rahel, nade Yusuf. Ria teu ni sanahulu hitu, ana biasa sama-sama no a'a nara foo sira bibi nara. Ria a'a nara, nana Yakob saon Bilha, ma saon Silpa ana nara. Ma Yusuf soa-soa tui papa na la'e-neu' a'a nara hada-pariin.

3 Boki Yusuf, nana Yakob namalasi so. Huu ria naa, ana sue Yusuf lena heni ana feke nara. Lai' esa de Yakob rau badu naru malole ina' esa,^a fee Yusuf. 4 Yusuf a'a nara rita sira papa na sue na Yusuf seli, boe ma ete' ao nara ro ni losa' ara ta dedea malole roon so'.

5-7 Hatu' esa, boe ma Yusuf nalamei. Ana tui meis ria neu' a'a nara nae, “Emi nenene dei! Au alamei ita basa puputu hade gandum nai oka' dale'. Boe ma au hade ka napadei dodoko. Tehuu emi hade mara rapadei eo raan, fo do'o-tabe au nuu ka.” A'a nara ramanene leo' naa, boe ma boe-boe ete' ao nara ro ni.

8 A'a nara rasa'ai Yusuf rae, “O bate mae o dadi malaka fo pareta ami, do?” Ara ete' ao nara raan seli ro ni, nana huu ana tui meis ria.

9 Yusuf nalamei selu' bali. Boe ma ana tui a'a nara nae, “Au alamei selu' bali. Au ita ledo a, bula' a ma ruu' sanahulu esa. Basa si do'o-tabe ratalolole au.” 10 Yusuf tui basa meis ria neu' papa na ma a'a nara, boe ma papa na nasa'ai ni no hara bera' nae, “Meis ubea' ria! O afi mae au oo mama ma, a'a-fadi mara, sunda' undulaka mara nai o matam? Ta mae tao boe' ma!” 11 De Yusuf a'a nara ete' ao nara ro ni. Tehuu papa na dodoo-tatai nahere meis ria.

12 Fai' esa, boe ma Yusuf a'a nara foo reni papa na bibi nara ranenea' koro Sikem. 13 Boe ma papa na nae, “Yusuf! O a'a mara foo bibi ra ranenea' Sikem, de mahehere aom muu dama si dei.”

Yusuf nataa nae, “Ia, papa.”

14 Papa na nae, “O muu mete maneni a'a mara ma au bibi kara dei. Sira leo bea', sona fali mai mafada au.”

Boe ma Yusuf la'o ela dae Hebron moo na, de naroo losa Sikem. 15 Losa naa, ana saka nalelei' asa nai moo' ria. Boe ma ana naneta no tou' esa. Tou' ria natane ni nae, “O saka ubea?”

16 Yusuf nataa nae, “Papa. Au saka a'a kara. Ara foo bibi ranenea' nai bai ia' ee. Papa mita si boe, do?”

17 Tou' ria nafada nae, “Ara ta rai ia so'. Tehuu ara rae reu foo ranenea' koro Dotan.”

Boe ma Yusuf neu saka a'a nara, losa' nita si rai koro Dotan. 18 Tehuu Yusuf bei nai doo' a, te a'a nara rita ni. Boe ma ara rala hara' fo raisa ni. 19 Esa nafada esa nae, “Emi mete dei. Malaka meis a mai so! 20 Mai sona taisa ni leo. Basa nana ita tapa henin leo oe dodolu mates a ri naa' dale' neu. Neu' ko tafada ita papa na tae banda fui' ara raa henin so. Besa' ko ita tita ria mei-afen dadi leo bea'!”

21 A'an Ruben namanene naa ria, boe ma ana saka eno' fo nau po'i Yusuf. Ana nafada fadi nara nae, “Ita boso' taisa ni! 22 Malole lena' ita tu'un leo oe dodolu mates ia dale' neu. Nai ia mamana lino-nees, de lahenda ta bubulu'. Sadi boso' tao taan nala daa ra.” Ana dedea nae leo' naa, nana huu ana nau po'i Yusuf fo nadenu fali' ana.

23 Yusuf losa a'a nara, boe ma homu raan, ara rui heni badu malolen ria. 24 Ara roi roso' ana, ruan leo oe dodolu mates dale' neu.

25 Boe ma ara fali reu raa-rinu. Ara bei raa-rinu, kekeneu te rita lahenda bubua' esa mai. Lahenda bubua' sira onta nara fua reni hata nase'o', leo-leo' ai-nana maboo meni', bumbu, ma modo-aidoo rupa'. Sekonaa te bubua' ria nana lahenda Ismael reme koro Gilead saka' leo dae doo' reu nai nusa Masir.

26 Yahuda nafada a'a-fadi nara nae, “Malole lena' leo ia'. Ita boso' taisa ni. Onto ubea'? Leo mae leo' bea boe, ita ta bisa tafuni tala ria daa na. 27 Malole lena' ita se'o ni leo lahenda Ismael sira neu. Leo mae ita tao ni leo' bea boe, ria nana ita bei fadi bokin. Huu ria naa, ita boso' tao tahehedi' ana” Basa si sipo' dedea' ria.

28 Naraa la'e lahenda dagan sira^b resi' naa, Yusuf a'a nara hela raan neme oe dodolu' ria dale' mai. Ara se'o ni leo lahenda Ismael sira neu, neni' doi lilo fula' dua hulu.^c Boe ma ara roo Yusuf leo Masir neu.

29 Fai ria ara se'o heni Yusuf nana Ruben ta bubulu'. Ana natafali leo oe dodolu' ria neu, ana kekes ara naan seli, nana huu Yusuf ne'es ana. Ana sii nalutu kakao-papake' nai ao-ina na, nana huu dale na susa naan seli. 30 Basa de ana natafali leo fadi nara neu nae, “Adoo! Ana' ria ne'es ana so! Besa' ia au muste tao ubea' bali?”

31 Ara hala kedae' esa, de hai raa Yusuf badu malolen ria, raboron neu' daa ria dale'. 32 Ara reni badu ria leo papa na neu ma rafada rae, “Papa! Ami here ma badu ia. Papa mete masudin, boso' losa ia nana fadi Yusuf badu na.”

33 Yakob nita badu ria, boe ma ana nalela' tuti' ana. Ana nataa nae, “Adoo! Ia nana tebe au ana ka badu na. Ta bubulu' banda fui' ara sii raan nai bea. Adoo! Au ana ka maten so!”

34 Boe ma Yakob sii nalutu badu na ma ana pake karong balau, nana huu ana susa naan seli.^d Ana dola-namatani la'o naroo soa-neu' ana na. 35 Ana toun ma ana inan, basa si o'oe-nanasin, tehuu doa' roon. Ana nae, “Ta'a! Au susa losa' mate, huu fo au ta afarene heni ana' ia.” Yakob dale na susa la'o naroo, nana huu nafarene anan Yusuf fo ri' mate ni.

36 Yakob bei nai susa dale', te lahenda dagan sira^e losa Masir so. Ara se'o Yusuf leo lahenda bau-ina' esa neu, nade Potifar. Ria nana mane' Masir komendaan manean.