Esau tititi-nonosin
36
Ia nana Esau tititi-nonosi nara. Ria nade feke na, Edom. 2 Esau sao ana feto Kana'an dua. Esa, lahenda Het, nade Ada, Elon ana feto na. Kadua a lahenda Hewi, nade Oholibama, papa na nade Anah, ma ba'i na, nade Sibeon. 3 Esau boe sao Ismael ana feto na, nade Basmat. Basmat a'a tou na, nade Nebayot.4 Esau sao ulun, Ada, boki Elifas. Basmat boki Rehuel. 5 Oholibama boki Yeus, Yalam ma Kora. Esau ana nara boki si rai nusa Kana'an.
6 Lai' esa de, Esau lali leo nusa feke' esa neu, doo' a neme Yakob. Ana noo sao-anan, lahenda mana noi ra, banda-manu' ma hata-heton katema'. 7 Esau no Yakob esa' ko matan, nana huu banda-manu' ma hata-heto nara dodou' raan seli. De raseti' nusa' ria. 8 Boe ma Esau (ri' Edom), neu leo nai nusa lete malelepi' Seir.
9 Ia nana, Esau tititi-nonosin, fo rae ‘lahenda Edom’. Ara leo rai nusa lete malelepi' Seir.
10-13 Esau saon Ada, boki ana tou' esa, nade Elifas. Elifas ana toun lima. Si', Teman, Omar, Sefo, Gatam ma Kenas. Elifas sao nafufuni na, nade Timna. Ria boki ana tou' esa, nade Amalek.
Esau saon Basmat boki ana tou' esa, nade Rehuel. Rehuel hapu ana tou' haa, si': Nahat, Sera, Syama ma Misa.
14 Esau saon Oholibama, ri' Anah ana feto na, fo Sibeon upu na, boki ana tou' telu, si': Yeus, Yalam ma Kora.
15-16 Esau upu-ana nara kofela dadi reu' leo dodou'. Esa' ko no' mane leo na. Esau ana ulun Elifas ana nara dadi mane leo Teman, mane leo Omar, mane leo Sefo, mane leo Kenas, mane leo Kora, mane leo Gatam ma mane leo Amalek. Sira basa, nana Esau no saon Ada tititi-nonosin.
17 Esau anan Rehuel ana nara dadi mane leo Nahat, mane leo Sera, mane leo Syama ma mane leo Misa. Sira basa, nana Esau no saon Basmat tititi-nonosin.
18 Esau no saon Oholibama ana nara dadi mane leo Yeus, mane leo Yalam ma mane leo Kora.
19 Leo sira basa, nana Esau tititi-nonosin.
Seir tititi-nonosin
20-21 Nai mamana' ria, lahenda Hori esa, nade Seir. Ria ana nara ramefu dadi reu' leo dodou'. Esa' ko no' mane leon. Ana nara dadi mane leo Lotan, mane leo Sobal, mane leo Sibeon, mane leo Anah, mane leo Dison, mane leo Eser ma mane leo Disan.
22 Lotan ana nara, si' Hori ma Heman. (Lotan feto na, ri' Timna).
23 Sobal ana nara, si': Alwan, Manahat, Ebal, Sefo ma Onam.
24 Sibeon ana nara, si' Aya ma Anah. Anah ri' nita masososa oe mata hanas nai moo soroae', tepo' fo ana foo papa na keledei nara.
25-26 Anah ana feto na, ri' Oholibama. Ma ana tou na, ri' Dison. Dison ana nara, si', Hemdan, Esban, Yitran ma Keran.
27 Eser ana nara, si' Bilhan, Sa'awan ma Akan.
28 Disan ana nara, si' Us ma Aran.
29-30 De mane leo lahenda Hori ra, si' Lotan, Sobal, Sibeon, Anah, Dison, Eser ma Disan. Sira basa leo rai nusa Seir.
Edom mane nara
31 Lahenda Israel ara bei ta ranuu mane', te lahenda Edom mara ranuu mane' so. Sira nade nara ratutuka ao, si':
32 Ara so'u Beor ana na, nade Bela dadi mane' nai kota Dinhaba.
33 Bela maten, boe ma Yobab dadi mane', kati ni. Ria papa na, nade Sera, neme koro Bosra.
34 Yobab maten, boe ma Husam dadi mane', kati ni. Husam neme lahenda Teman nara nusa na.
35 Husam maten, boe ma Hadad dadi mane', kati ni. Ria papa na, nade Bedad neme koro Awit. (Ria ri' naseki lahenda Midian ara, tepo' fo ratati nai Moab.)
36 Hadad maten, boe ma Samla dadi mane', kati ni. Samla neme koro Masreka.
37 Samla maten, boe ma Saul dadi mane', kati ni. Saul neme koro Rehobot nai lee suu'.
38 Saul maten, boe ma Ba'al-Hanan dadi mane', kati ni. Ria papa na, nade Akbor.
39 Ba'al-Hanan maten, boe ma Hadar dadi mane', kati ni. Hadar neme koro Pau. Hadar sao na nade Mehetabel. Mehetabel papa na, nade Matret ma ba'i na, nade Mesahab.
40-43 De mane leo fo dadi reme Esau mai, nana si': Timna, Alwa, Yetet, Oholibama, Ela, Pinon, Kenas, Teman, Mibsar, Magdiel ma Iram. Ara fee nusa nara ranade tuka sira esa' ko naden.
De basa ia ra tutui la'e-neu Esau tititi-nonosin, ri' lahenda Edom ara.