Yakob asa ralai leo Betel reu
35
Boe ma Manetualain dedea no Yakob nae, “Au, Manetualain fo ri' atudu ao Ka neu' o, tepo' fo malai meme a'am Esau mai. Besa' ia, o lali Betel muu leo. Losa naa, sona o mafoa mei tutunu-hohotu' fee Au ma leo muu' naa.”2-3 Yakob dedea no basa uma isi nara nae, “Besa' ia, ita basa saka' leo Betel teu. Maulu na au nai susa dale', Manetualain tulu-fali au nai naa. Au nau apadedei' mei tutunu-hohotu' nai naa. De emi tu'u heni patung sosoko mara katema'. Makamoi ao-ina mara ma kati kakao-papake', huu fo ita saka' do'o-tabe Manetualain.” 4 Boe ma ara fee heni patung sosoko' ma ante nara katema'.a De Yakob nadofu etu hata sira, rai ai huu ina' esa huu na nanenea' koro Sikem. 5 Fai fo Yakob asa la'o ela Sikem, Manetualain nabibii' lahenda nusa manenea' sira, de ara ta raparani tao tadadalu Yakob asa.
6 Yakob no basa lahenda nara losa no soda-mole' nai Betel (maulu na nade, Lus), nai dae Kana'an. 7 Nai naa Yakob lutu mei tutunu-hohotu' neme batu a. Ana fee mamana' ria nade, El Betel, (sosoa na nae, ‘Betel Manetualain na’), nana huu maulu na Manetualain natudu ao Na neu' Yakob nai naa, tepo' fo nalai neme a'a na mai.
8 Nanenea' koro Betel, ai huu ina' esa, lahenda feen nade, Alon Bakut. Sosoa na nae, ‘ai huu boreu'’. Ai huu' a nade ria, nana huu Ribka maman fo ri' anutu ni a, nade Debora, maten de ratoin nai ai ria huu na.
9 Yakob fali neme Padan Aram mai, Manetualain natudu selu' ao Na neu' ana ma fee ni ua-nale'. 10 Manetualain dedea nae, “Mulai neme besa' ia, o ta nade Yakob so'. Tehuu Au fee o nade bebeu', ri' Israel.b 11 Au, Manetualain mana Kuasa Bau-ina'. De o boki fo maupu-maana' dodou' leo! Neu' ko lahenda nusa' ara dadi reme o tititi-nonosi mara. Ma neu' ko o boki ma mane' ara. 12 Nusa' fo Au feen neu' o ba'im Abraham ma papam Isak, besa' ia Au feen neu' o mo tititi-nonosi mara.”
13-14 Manetualain dedea basa leo' naa, boe ma Yakob napadedei' dii batu esa neu' naa, ela dadi tanda nafarerene' neu' Manetualain hehelu Na. Ana po'a oe anggor ma mina neu' batu ria lain, fo do'o-tabe Manetualain. 15 Ana fee mamana' ria nade, Betel.
Yakob saon Rahel boki de maten
16 Boe ma Yakob asa la'o ela Betel. Ara ranenea' Efrata (ri' Betlehem), Rahel nameda boboki'. Tehuu boboki na nareo. 17 Ana nanasa, boe ma ina mana maboboki' a nafada ni nae, “Mama Rahel! Matetea dale ma, huu fo mama hapu ana tou' bali!” 18 Rahel saka' mate ni, boe ma ana foi ana' ria nade, Ben-Oni, (sosoa na nae, ‘ana' neme au doidoso ka’). Basa boe ma maten. Tehuu Yakob foi ana' ria nade, Benyamin (sosoa na nae, ‘ana' lima boa ona'’).
19 Boe ma ara ratoi Rahel nai eno' fo ri' leo Efrata neu suu na (besa' ia nade, Betlehem). 20 Yakob lutu batu rates esa neu' naa. Losa' fai ia, Rahel batu raten ria bei nai naa.
Yakob ana nara
21 Boe ma Yakobc leo lali-lali naroo. Lai' esa de, ana napadedei' tenda nai manara Eder boboa na. 22 Tepo' fo ara leo rai naa, Ruben suku no' papa na sao uma dalen, Bilha. Lahenda rafada Yakob hihii-nanau' ria.
Yakob ana toun sanahulu dua.
23 Lea ana nara, si': Ruben (Yakob ana ulu na), Simeon, Lewi, Yahuda, Isaskar ma Sebulon.
24 Rahel ana nara, si': Yusuf ma Benyamin.
25 Rahel atan Bilha ana nara si': Dan ma Naftali.
26 Lea atan Silpa ana nara, si': Gad ma Aser.
Boki ana' sira rai Padan Aram.
Yakob papan Isak maten