5 Yakob namanene rae lahenda hohoke ana feto na, tehuu ana nee-nee, ma ta tao hata esa boe'. Huu fo fai ria, ana tou nara ranea banda rai moo'. De ana nahani losa' basa si fali.

6 Fai ria, Sikem papan Hemor leo Yakob neu natane Dina fee Sikem. 7 Naraa la'e dua si dedea-rao nara, boe ma Yakob ana nara fali reme moo' mai. Ara ramanene rae, Sikem hohoke sira feto na, boe ma dale nara hedis a ma ramanasa raan seli. Ara rae, “Hihii-nanau' rupa leo naa' a, ta naraa hapun nai Israel. De ita ta bole sipo' lahenda mana tao tadalu rupa leo naa'.”

8 Hemor lele'o Yakob asa nae, “Toranoo Yakob! Au ana ki Sikem tebe-tebe nahii' toranoo' a ana feto ma. De au mai atane ni fee au ana mane ka. 9 Kalu bisa, sona ita ana nara rasao ao. Emi ana tou mara sao ami ana feto mara. Ma ami ana tou mara sao emi ana feto mara. 10 Ela emi leo mabua mo ami nai ia. Emi here ao mara, mahii' leo meu' bea a. Ma dagan fo hapu hata-heto nai ia.”

11-12 Boe ma Sikem dedea no Dina papa na ma a'a nara nae, “Emi hule ubea' boe, au tuka-tuka mesan. Emi hule doi natetu mata' ma belis ara hida boe, au bae. Sadi emi mataa au sao emi feto ma.”

13 Tehuu Yakob ana nara bubulu' Sikem hohoke sira fadin Dina. De ara rataa fufudi' Sikem no papan Hemor. 14 Ara rataa rae, “Ami ta bisa fee ami fadi ma sao lahenda fo ta sunat! Ria tao namamae' ami! 15 Tehuu eno kalua na leo ia': Basa emi tou mara, aana-bauina' muste sunat sama leo' ami. 16 Kalu emi tao leo naa', sona besa' ko ita tasao ao. Ma ami boe bisa leo sama-sama mo emi, ela ita bisa dadi lahenda nusa' esa. 17 Tehuu kalu emi ta tuka ami hihii-nanaum ma ta nau sunat, neu' ko ami hela fali' ami fadi ma, ma ami la'o ela mamana' ia.”

18 Hemor no Sikem sipo' dedea' ria no malole. 19 Tehuu Sikem ta nanenete, nana huu nahii' naa Dina seli. Basa lahenda rai nusa' ria hada-horomata Sikem. 20 De Hemor no Sikem leo mamana parisa dedea' a nai koro' a lelesu bafa na, ara dedea-rao' ro basa lahenda rai nusa' ria. Ara dedea rae, 21 “Basa toranoo kara emin! Lahenda Israel ara rahii' leo mole-dame ro ita. De neme' naa, ela ara leo sama-sama ro ita nai nusa' ia. Nusa' ia loa' a soa-neu' ita basa. Ita bisa sao sira ana feto nara, sira boe bisa sao ita ana feto nara. 22 Ara hule noi hihii-nanau' ana' esa neme ita mai. Ri' basa ita tou ara sunat sama leo' sira. 23 Kalu ita leo tabua, neu' ko sira banda-manun ma hata-heto nara dadi ita posakan, hete? De malole lena' ita tuka sira hihii-nanaun. Mai ita basa sunat! Mataa, do?”

24 Basa lahenda fo rabua rai naa, sipo' Hemor no Sikem dedean. De basa tou' fo rai nusa' ria, ara sunat.

25 Fai katelu na, mana sunat ara hina nara bei hedis a, boe ma Dina a'an Simeon no Lewi hai ra tafa nara, maso' rafufuni' leo koro' dale' reu, de raisa basa tou' ara. 26 Ara raisa Hemor no Sikem boe. Ara hela ra Dina neme Sikem uman dale' mai, de roo fali' ana.

27 Yakob ana feke nara maso' leo nusa' dale' reu, de roso reni nusa' ria hata nara katema'. Ara ramanasa, nana huu lahenda hohoke sira feto na nai naa. 28 Ara roso ra katema' lahenda hatan fo rai uma dale', ma foo reni lahenda banda-manun katema' reme moo' mai. 29 Ara roo ina' ara ma ana nara, ma roso reni nusa' ria bua-loas mabeli nara katema'.

30 Yakob namanene hihii-nanau' ria, boe ma ana dedea no Simeon ma Lewi nae, “Emi tao nonoi pakanaa ubea' ia? Emi tao masususa' au! Neu' ko lahenda Kana'an, lahenda Peris ma nusa' ia lahenda nara, ete' ao nara ro ita. Sira lahenda nara dodou'. Tehuu ita noi baiana'. Kalu ara mai suu ita, sona sopu' nala ita.”

31 Tehuu ara rataa no nasa' rae, “Papa! Papa bate mae ami mataa' asa, tao ami fadi ma dadi' ina mana sosoa!”