Yakob naneta no a'an Esau
33
Fai ria, Yakob nita Esau no lahendan natun haa mai. De ana bati ana nara fee si esa' ko no' maman. 2 Ana fee saon Bilha no Silpa ma ana nara resi' mata. Basa de Lea no ana nara, besa' ko Rahel no anan Yusuf resi' dea'. 3 Tehuu Yakob nesi' mata naulu' basa si. Ana nanenea' leo a'a na neu, boe ma sunda' undulaka na naloe aon losa dae a neu a'a na matan lai' hitu.4 Tehuu Esau nita fadi na, boe ma nalale holu naan ma de'in. Dua si radola ao. 5 Esau nita ina' ara ro ana nara, de natane nae, “Te basa lahenda ia ra nana, bea?”
Yakob nataa nae, “Sira nana, lahenda fo ri' Manetualain fee au, a'a ka atam ia.”
6 Boe ma Yakob saon Bilha no Silpa ro ana nara do'o Esau. 7 Basa de Lea no ana nara do'o Esau. Mabui oe' a, Yusuf no maman Rahel do'o Esau.
8 Esau natane nae, “Banda bubua' fo bisinaa' a, o haitua nana maksud na, ubea?”
Yakob nataa nae, “Leo ia', a'a! Au hadia a'a ka basa sira, ela a'a ka sipo' au no dale loa'.”
9 Tehuu Esau balas nae, “Fadi Yakob! Au hata-heto ki boe dodou'. De o boso' fee au hata-hata esa boe.”
10 Yakob nataa nae, “A'a, boso' tao leo naa'! A'a muste sipo maa si dadi tanda esa nae, a'a sipo' au no dale loa'. Huu fo bisinaa' a au ita a'a huhume ma, nonoo' leo au ita Manetualain huhume Na. 11 De au hule no hada-horomata, ela a'a sipo ma au hadia sosoa-raraa taa ki ia ra. Huu fo Manetualain malole na seli' soa-neu' au, de Ana fee basa-basan fo ri' au parluu.” Yakob lameooe naroo ni, losa' nau do ta nau, Esau sipo naa hadia sira.
12 Esau dedea nae, “Leo' naa, sona emi mahehere ao mara fo teu leo! Neu' ko au la'o sama-sama o emi.”
13 Tehuu Yakob nataa nae, “Neme' naa, a'a! A'a mita mata', ana' ara bei aana' ma ta bisa la'o ralai' a. Ma banda boki beu' ara, boe dodou'. Kalu ita la'a si la'o ralai' a nai fai' esa dalen, neu' ko mate basa banda ia ra. 14 De malole lena' a'a kasa la'o maulu' leo. Ami basa la'o bai-bai tuka dea. Neu' ko au eti dama a'a nai Seir.”
15 Esau dedea bali nae, “Kalu leo' naa, sona au la'o ela ana uma dale' ruma ro o, ela ratudu emi eno' a.”
Tehuu Yakob nae, “A'a boso' masapute huu ami! Sadi au bubulu' a'a sipo' au.”
16 Esau namanene leo' naa, boe ma ana la'o ela si, de fali leo Seir neu. 17 Tehuu neme naa' mai Yakob leo Sukot neu. Ana tao uma neu' naa, ma tao oka' fee basa banda nara. Huu ria naa, mamana' ria, nade Sukot (sosoa na nae, ‘uma ofu’).
18 Mate'e na, Yakob asa reme Padan Aram leo koro Sikem reu nai nusa Kana'an, ara losa no soda-mole'. Ara rapadedei' tenda, leo ranenea' koro' ria. 19 Dae fo ri' Yakob napadedei' tenda na, ana asa neme Hemor, Sikem papa na. Ana bae neni' doi lilo fula' natun esa. 20 Ana lutu batu tao mei tutunu-hohotu' neu' naa. Ana fee mamana' ria, nade El-Elohe-Israel, sosoa na nae, ‘Manetualain nana, Israel Manetualain na’.