Yakob bii' naneta no a'an Esau
32
Boe ma Yakob asa la'o raroo. Manetualain eila'o-limalopen reme nusatetu-ikutema' a mai raneta ro ni. 2 Ana nita si boe ma dedea nae, “Ia nana Manetualain soldadu nara mamana hahaen!” Huu ria naa, ana fee mamana' ria, nade Mahanaim (sosoa na nae, ‘mamana hahae' dua’).3 Boe ma Yakob nadenu ata ni hida reu raulu' nusa Edom (ri', Seir), fo rafada a'an Esau rae, ana saka' mai. 4 Yakob nafada ata nara nae, “Emi meu mafada au malaka ki Esau mae: ‘Papa Esau! Papa atam Yakob nae leo ia', Ana leo nai to'o Laban uma na sama leo lahenda mana mai losa' fai' ia. 5 Besa' ia malaka a ata ma, nanuu sapi, keledei, bibilopo-kedae', ata tou' ma ata ina'. Au adenu lahenda ia ra mai rafada malaka ka rae, ata ma saka' mai. De au amahehena', malaka ka sue-lai au fo sipo ami no dale loa'.’” Boe ma lahenda sira reu.
6 Lahenda sira fali leo Yakob mai, ara tui rae, “Ami maneta mo papa ka a'am Esau so. Besa' ia ana tuka mai nai dea', no tou' natun haa saka' raneta ro papa.”
7 Yakob namanene leo' naa, boe ma tende na toko ma ana bii naan seli. Ana bati lahenda nara ro banda ra reu' bubua' dua. 8 Ana afi nae, “Kalu Esau mai, suu bubua masososa' a, sona bubua kadua a bisa ralai ra ao nara.”
9 Boe ma Yakob hule-haradoi nae, “Oo Manetualain! Manetualain fo ri' ba'i Abraham ma au papa ki Isak do'o-tabe. Mamanene au! Fai' naa Manetualain madenu au fali leo kileo-boboki kara uu, nai nusa' ia. Manetualain helu mae, neu' ko Manetualain tao matetu basa-basan. 10 Au ta araa sipo Manetualain susue-lalaim, ma nasuru-nahapa mana basa taa Ma. Maulu na au hana lee Yarden ia, au uni noi tete'e. Tehuu besa' ia au fali mai, uni lahenda ma banda-manu' dodou', de au bati si reu' bubua' dua. 11 Au bii', boso' losa a'a Esau mai suu ami fo namate ami basa. De au hule Manetualain po'i-tata ma au oo basa sao-ana kara, neme a'a Esau mai. 12 Manetualain helu fee au ua-nale' dodou', ma tao ma au tititi-nonosi kara ramefu, sama leo' soroae' nai tasi' a suu na, de lahenda ta reke rala si.”
13 Yakob suku neu' mamana' ria. Balahaa', boe ma ana heo banda fo nau hadia a'a na. 14 Ana heo naa kedae ina' natun dua, mane' dua hulu, bibi-lopo ina' natun dua, mane' dua hulu, 15 onta ina' telu hulu, ro ana mana susu nara, sapi ina' haa hulu, sapi mane' sanahulu, keledei ina' dua hulu, ma keledei mane' sanahulu. 16 Ana heo banda sira, rupa' esa' ko no' bubuan ma fee bubua' sira esa' ko no' mana foon. Ana nafada si nae, “Emi meu maulu' au dei tuka dea. Tehuu emi manea, ela bubua' esa doo a bai' neme esa mai.”
17 Yakob pareta mana foo bubua masososa' a nae, “Kalu a'a Esau naneta no o ma natane nae, ‘O saka' leo bea' muu? O nana bea atan? Banda ia ra, nana bea nuun?’ 18 Emi muste mataa mae, ‘Banda ia ra, nana papa ata mi Yakob nuun. Ana haitua fee a'an, papa Esau. Ana bei mai nai dea'.’” 19-20 Ana fee pareta leo naa' neu' basa mana foo bubua feke' ara nae, “Kalu maneta mo a'a Esau, emi hadia feen banda sira. Ma mafadan mae, au bei tuka dea.” Yakob afi nae, kalu ana fee katema' banda sira reu' Esau, neu' ko Esau dale na loa' a noon. 21 De ana haitua naulu' banda sira. Tehuu hatun ria, ana suku nahani' mamana' ria.
Yakob nakale ao no Manetualain
22 Yakob suku foa, boe ma ana ator sao nara ma anan sanahulu esa si, fee si lena raulu' leo lee Yabok seri' reu. 23 Basa si losa lee seri', besa' ko ana fee posaka nara reu.
24 Tehuu Yakob mesa' ana bei nahani' ria. Boe ma tou' esa mai, de dua si rakale ao, losa' lole malua'. 25 Tou' ria nameda naan saka' seki ni, boe ma ana fae fee Yakob neu' pau na, losa' dui sesesu na osi' neme mamana na. 26 Boe ma tou' ria nae, “Po'i au, huu fo ledo a saka' tii ria' so.”
Tehuu Yakob nataa nae, “O dedea fee au ua-nale' dei, besa' ko au po'i o!”
27 Tou' ria natane nae, “O nade, bea?”
Ana nataa nae, “Yakob.”
28 Tou' ria dedea nae, “Mulai neme besa' ia o ta nade Yakob so', tehuu nade Israel, nana huu o makale ao mo lahenda dae-bafo' ma Manetualain losa' maseki.” (Nade Israel sosoa na nae, ‘nakale ao no Manetualain’.)
29 Yakob natane nae, “O nade, bea?”
Tehuu tou' ria nataa nae, “O matane au nade ka, tao ubea'?” Boe ma ana dedea fee Yakob ua-nale' nai mamana' ria.
30 Yakob dedea nae, “Au ita Manetualain mata-idun, tehuu au bei soda'.” Huu ria naa, ana fee mamana' ria nade, Peni'el, sosoa na nae, ‘Manetualain mata-idun’.