3 Boe ma MANETUALAIN dedea no Yakob nae, “Besa' ia losa ledo-fain, de o muste fali leo ina-ama mara muu leo. Neu' ko Au sama-sama oo ko.”

4 Boe ma Yakob nadenu reu raloo Rahel no Lea, mai dama ni nai banda ra mamana na nai moo'. 5 Ana nafada si nae, “Besa' ia au ita emi papa ma mata-idun ta naleleka no au so'. Ma ana ta malole a no au sama leo' maulu na. Tehuu Manetualain fo ri' au papa ka do'o-tabe Ni, sama-sama no au. 6 Emi dua bubulu' doo-naru basa ia, au oi-tao sota' aan seli fee emi papa ma. 7 Leo mae leo' naa boe, ana tipu namimina' au kose-kose. Ma ana kati au seseba ka losa' lai' sanahulu. Tehuu leo mae leo' naa boe, Manetualain nanea nahere au. 8 Emi papa ma dedea nae, ‘Banda dedeta' sira dadi o seseba ma,’ boe ma banda ra boki te ana nara dedeta' mesan. Fai feke' ana dedea bali nae, ‘Besa' ia, banda baraeta' ara, dadi o seseba-babaem,’ boe ma banda sira boki te basa si baraeta' mesan. 9 Manetualain tao leo naa', ela Ana hai naa emi papa ma banda nara fee au.

10 Lai' esa de, naraa la'e banda ra ledo-fai sasaon, au ita nai meis dale', basa banda mane' fo ri' sao banda ina', nana ruma bara'oto', dedeta' ma baraeta'. 11 Boe ma Manetualain eila'o-limalopen naloo au nai meis dale' nae, ‘Yakob!’

Au ataa ae, ‘Ia, Papa?’

12 Ana nafadan nae, ‘Mete dei! Basa banda mane' fo ri' sao banda ina' ara, nana baraoto', dedeta' ma baraeta ara. Au ator basa sira, nana huu Au ita hata fo ri' Laban taon soa-neu' o. 13 Au ia Manetualain, fo ri' atudu ao Ka neu' o nai Betel. O mapadedei' batu nai naa, boe ma po'a mina neu' lain, fo do'o-tabe Au. Ma o tao hehelu-barataa' mo Au nai naa. Besa' ia o muste foa ela nusa' ia, fo fali ina-ama mara nusa-namon muu leo.’”

14 Rahel no Lea rataa rae, “Ami tuka-tuka mesan! Huu fo ami ta hapu hata posaka' neme papa Laban mai so'. 15 Doo-naru basa ia, ami papa ma tao ami sama leo' lahenda dea, nonoo' nae ana se'o heni ami. Ma naa heni ami beli-paa mara so. 16 Basa hata-heto fo Manetualain hai neme papa Laban mai, besa' ia dadi ami mo ana mara posakam. De kalu Manetualain nae leo' bea, sona tuka.”

17-18 Boe ma Yakob mulai nafafau hata-heto nara. Ana nasasa'e sao-ana nara reu' onta lain, foo neni katema' banda nara ma hata-heto fo ri' ana hapu nai Padan Aram, de ara fali leo dae Kana'an reu.

19 Fai ria, Laban neu kuti bibi-lopo nara bulun. Rahel namana'o neni papa na patung sosoko nara. 20 Yakob asa la'o ramaninino' ma ta nafada arama na. 21 Ana neni katema' hata-heto nara, ara la'o rapue raroo' a tuka lee Efrat, ralaka leo lete Gilead reu.

22 Basa fai' telu, boe ma Laban hapu hara' rae, Yakob asa foa la'o so. 23 Boe ma Laban nabubua naa lahenda nara, fo reu usi tuka manafeu na. Ara usi losa' fai' hitu, besa' ko hapu si rai lete malelepi' Gilead.

24 Nahatu, boe ma Manetualain natudu ao Na neu' Laban nai meis dale'. Ana nae, “Laban! Kalu o dedea mo Yakob, sona manea matalolole bafa ma.”

25 Hatun ria, Yakob napadedei' tenda na nai lete malelepi' Gilead. Ma Laban asa rapadedei' sira tenda na nanenea' nai naa.

26 Laban mai dama Yakob, boe ma ana dedea nae, “Yakob! Ubea' taon de o malai mo au ana feto kara namaninino' leo ia'? Sama leo' o heke moo lahenda neme musu dale' mai. 27 Meda' o malai mamaninino', ta mate'a sudi au boe'! Kalu o mafada matalolole au, tantu au tao feta bau-ina', fo afuli emi pake musik,^a besa' ko po'i emi la'o. 28 O sala mi esa bali, ri' o ta fee au lela' de'i upu-ana kara, besa' ko fee si la'o. O nonoi-tataom ta la'e bai' boe'! 29 Ma muda' laesa' au bisa tao soe fee o! Tehuu leodae' a, Manetualain fo ri' o papa ma do'o-taben a nafada au nae, kalu au dedea oo ko, au muste anea atalolole bafa ka. 30 Tebe au bubulu', o la'o nana huu mahii' fali. Tehuu ubea' taon de o mamana'o muni au patung sosoko kara?”

31 Yakob nataa nae, “To'o boso' mamanasa mo au! Au la'o amaninino' a, nana huu au bii', boso' losa to'o ena ma ana fetom duas, sona leo' bea?” 32 Tehuu Yakob ta bubulu', saon Rahel namana'o neni patung sosoko' sira. De ana nae, “To'o! La'e-neu' patung ria, sona saka si leo! Kalu hapu si rai bea, sona huku maisa ni. Ofe katema' asa! Kalu to'o hapu hata posaka feke mi, sona hai fali' asa. Ela lahenda ia ra sakasii.”

33 Boe ma Laban ofe sira esa-esa tendan. Masososa na Yakob tenda na. Basa boe ma ata inan dua si tendan. Tehuu ana ta nita patung sira. Mate'e na, ana maso' leo Rahel tenda na neu. 34 Tehuu Rahel nafuni patung sira rai onta a sela na soro-dalen, ma ana natuu neu' sela ria lain. Laban ofe lutu-lutu nai Rahel tenda na, tehuu ta nita si.

35 Rahel dedea no papa na nae, “Papa boso' mamanasa. Au ta bisa apadei', huu fo au amahedi ina.” Laban saka naroo, tehuu ana ta nita patung sira.

36 Boe ma Yakob nasa na lua, de nasapaa Laban nae, “Au tao asala' to'o ubea'? Losa' to'o usi tuka au, tao ma au dadi' lahenda tadalu'! 37 To'o ofe katema' au hata-heto kara, de to'o hapu ubea'? Soba tao si mai' mata ia, fo ita basa tita! Ela lahenda ia ra raetu', hata sira nana bea nuun. 38 Teu' dua hulu au kuli fee to'o. Au foo to'o banda mara, ta hapu esa loo heni ana na boe'. Au ta ua esa boe'! 39 Kalu banda ma'aa' ara ramate to'o bandam esa, au ta afada tehuu au kati. Ma kalu lahenda ramana'o ra to'o bandam sona madenu au kati, leo mae au ta sala. 40 Leledo', sona ledo a haa na au seli. Hatu', sona au marini aan seli. Au mete mata isi ka losa' ta suku, nana huu anea to'o banda mara. 41 Tebe teu' dua hulu ria nana la'e! Au oi-tao teu' sanahulu haa, ela hapu to'o ana feto mara. Basa de au oi-tao tamba selu' teu' nee, ela au bisa hapu banda kara. Au dadi kuli doo' a leo' naa, tehuu to'o kati au seseba ka losa' lai' sanahulu. 42 Maua' a Manetualain fo ri' ba'i Abraham ma papa Isak do'o-tabe Ni. Kalu Ana ta nanea au, tantu to'o usi fali' au no lima rou'. Tehuu Manetualain ta nasuku mata Na soa-neu' au susa ka, ma Ana relu-natanae au nonoi-tatao kara. Huu ria naa, leodae' a Ana nafada to'o.”

43 Laban namanene basa Yakob dedean sira, boe ma ana nataa nae, “Leo ia'! Ana ina' sira dua, nana au ana kara. Ana' fo ri' boki raa si, nana au upu ki katema' sira. Basa banda ia ra, au nuu ki. Basa-basan fo o mita si rai ia, tebe au nuu ki. Tehuu au bei tao ubea'? Au ta bisa ena si. 44 De malole lena' ita dua tao hehelu-barataa'. Ma ita muste tasoda tuka hehelu-barataa' ria.”

45 Boe ma Yakob eso na batu bau-ina' esa, ana napadedei' naan dadi tanda. 46 Yakob nadenu lahenda nara bau batu fo raunu. De basa si ratuu' raa-rinu ranenea' batu sira. 47 Laban fee batu maunu' ria nade, Yegar Sahaduta. tehuu Yakob feen nade Galeed.^b

48 Boe ma Laban nae, “Batu maunu' ia dadi sakasii neu' ita dua.” Huu ria naa, mamana' ria nade, Galeed. 49 Laban fee mamana' ria nade, Mispa (sosoa na nae, ‘mamana nanea' madema’), nana huu ana dedea nae, “Neu' ko MANETUALAIN nanea ita dua ela ita boso' talena laka neu' hehelu-barataa' ia, leo mae ita dua esa doo' a no esa. 50 Kalu o tao tadalu' soa-neu' au ana kara, do sao ina feke' ara, tantu au ta bubulu'. Tehuu mafarerene'! Manetualain dadi sakasii neu' ita dua. 51-52 Soba mete maneni batu mapadedei' ma maunu' ia ra. Mafarerene' batu ia ra dadi too-lane. O ta bole kani seli batu ia ra, fo tao tadalu au. Ma au boe ta bole kani seli batu ia ra, fo tao tadalu o. 53 Ita tao hehelu-barataa' ia, pake ita bei-ba'in Manetualain na. Ri' o ba'im Abraham ma au ba'i ki Nahor Manetualain na. Neu' ko Ria dadi mana ee dedea', fo naetu' ita dua dedean.”

Yakob namanene basa leo' naa, boe ma ana soo-supa mate' pake Manetualain naden, fo ri' papan Isak do'o-tabe Ni.

54 Boe ma Yakob pau banda, de neni tutunu-hohotu' soa-neu' Manetualain nai lete' ria lain. Ana naloo naa basa lahenda ra, de ara raa-rinu no namaho'o ma ara mete rala' malua nai naa.

55 Balahaa' balahaa anan, boe ma Laban holu ma de'i basa upu-ana nara. Boe ma ana hule fee si ua-nale', basa de ana fali leo nusa na neu.