2 Boe ma Yakob nasapaa ni nae, “O mae Manetualain ri' au, de bisa fee o ana'?”

3 Boe ma Rahel dedea nae, “Leo ia'! Malole lena' papa muu suku mo' au ata ki Bilha, ela boki fee au ana'.”

4 Ana fee Bilha neu' sao na, de Yakob suku no' ana. 5 Bilha nairu, de boki ana tou' esa. 6 Rahel dedea nae, “Manetualain namanene au huhule-haradoi ka. Huu ria naa, Ana fee au ana tou' esa. Manetualain naetu' au dedea ka no matetu'.” De ana fee ana' ria, nade Dan (sosoa na nae, ‘naetu' dedea'’).

7 Bilha nairu selu', de boki ana tou' esa. 8 Rahel dedea nae, “Au asudi susura' oo a'a ka, de aseki ni.” Huu ria naa, ana fee ana' ria, nade Naftali (sosoa na nae, ‘nasudi susura'’, do ‘nahohoe ao'’).

9 Lea nameda naan ana ta boki so', boe ma fee ata ni Silpa neu' sao na, ela sao naan. 10 De Silpa boki ana tou' esa. 11 Lea dedea nae, “Au ua-nale ka malole a.” Boe ma ana fee ana' ria, nade Gad (sosoa na nae, ‘ua-nale malole’).

12 Silpa boki selu' ana tou' esa. 13 De Lea dedea nae, “Besa' ia, au amaho'o! Meten, te neu' ko basa ina' ara dedea rae, au aua-anale aan seli.” Huu ria naa, fee ana' ria, nade Aser (sosoa na nae, ‘namaho'o’).

14 Lai' esa de, la'e fai o'oru', Ruben nura lain neu, ana nita ai boa' esa, lahenda ramahere, ai boa' ria dadi modo-aidoo fo ina' ara bisa boki. Ana neni fee maman Lea. Rahel nita leo' naa, boe ma ana hule Lea nae, “A'a! Ruben neni ai boa' ria a, bati fee au bai'.”

15 Tehuu Lea nataa nae, “O talalu maan seli! O malea ma au sao ka. Besa' ia, o nau malea ma ai boa' ria neme au ana ka mai bali? O ta mae' malela' boe'.”

Tehuu Rahel dedea nae, “Leo ia', a'a. Kalu au hapu ai boa' ria, sona hatun ia o suku mo' Yakob.” Boe ma Lea sipo'.

16 Ledo leo dae na, Yakob fali neme oka' mai, boe ma Lea neu soru' ana, ma nafada ni nae, “Yakob! O muste suku mo au hatun ia! Huu fo au bae mema' o pake au ana ka ai boa na.” De Yakob suku no' Lea hatun ria.

17 Manetualain namanene Lea huhule-haradoin. Huu ria naa, ana nairu de boki ana tou kalima. 18 Lea fee ana' ria, nade Isaskar (sosoa na nae, ‘bae sosota'’), nana huu ana nae, “Manetualain bae au sosota ka, huu fo au fee sao ka sao Silpa.”

19 Boe ma Lea nairu selu', de boki ana tou kanee. 20 Ana dedea nae, “Manetualain fee au hadia malole. De besa' ia au sao ka muste hada-horomata au, nana huu au boki feen ana tou' nee.” Huu ria naa, ana fee ana ria, nade Sebulon (sosoa na nae, ‘fee hada-horomata'’).

21 Basa boe ma Lea boki ana ina' esa, de ana fee ni, nade Dina.

22 Manetualain nafarene Rahel, ma namanene huhule-haradoi na. Huu ria naa, Ana buka mamana ana na. 23 Boe ma Rahel nairu, de boki ana tou' esa. Ana nae, “Manetualain tao naa au ta mae' so'.” 24 Ma ana fee ana' ria, nade Yusuf (sosoa na nae, ‘ela leo' bea na tamba selu'’), nana huu ana nae, “Au hule Manetualain fee selu' au ana tou' esa.”

25 Tepo' fo Rahel boki Yusuf, Yakob dedea no Laban nae, “Papa! Kalu bisa, au fali leo nusa-namo ka uu dei. 26 Ela au fali oo sao-ana kara. Papa bubulu' au oi-tao sota aan seli' fee papa, de au bae etu si. Huu ria naa, besa' ia sira nana au haak asa.”

27 Arama na nataa nae, “Ana ki on! O nenene dei. Au amalada' basa, de bubulu' Manetualain fee au ua-nale' nana huu o. 28 Besa' ia o hule bau bea boe au bae! Sadi o leo ada' ia ma moi-tao maroo fee au.”

29 Yakob nataa nae, “Papa mita mata' au oi-tao sota aan seli. Huu ria naa, papa banda mara tamba la'o naroo. 30 Tepo' fo au bei ta mai, nana papa hata-hetom bei ta dodou'. Tehuu besa' ia papa mamasu'i so. Manetualain bati fee papa ua-nale', nana huu au nonoi-tatao ki. Besa' ia losa ledo-fain, fo au oi-tao fee sao-ana kara bali.”

31 Laban natane nae, “De au muste bae tao o leo' bea?”

Yakob nataa nae, “Papa boso' fee au hata-hata esa boe. Neu' ko au aboi-asamao aroo papa banda mara, sadi au bisa tao hihii-nanau' esa. 32 Fee au isin, fo fai' ia uu dama papa banda mara, ela here kedae' ma bibi-lopo. Ta dedeta' ma ta baraeta' ara, sona papa nuum sira. Tehuu dedeta' ma baraeta' ara, sona au soa sira. Ma au hai a katema' bibi-lopo keo' ara. Basa sira nana lole leo' bae au sosota ka.^a 33 Nai fai a mabui, neu' ko papa bisa bubulu' au ia roo-tetu', do ta'a. Sudi fai' bea a, papa bisa mai parisa' au banda kara. Kalu mita kedae' ta dedeta' ma ta baraeta', do bibi-lopo fula', sona papa bubulu' au amana'o papa banda mara.”

34 Boe ma Laban nataa nae, “Malole! Leo naa' leo.” 35 Tehuu fai ria boe Laban heo heni basa banda dedeta' ara, baraeta' ara ma bibi-lopo keo' ara. Ana nadenu ana nara urus banda sira. 36 De ara foo reni banda sira leo mamana' esa reu, dodoo na la'o ei' fai' telu neme Yakob mai. Yakob foo nahere arama na bibin fo ri' bei ela.

37 Boe ma Yakob tati naa ai huu' rupa' telu rana nara, ma ana lufa lelefo rou nara. 38 Ana tao ai rana mana lelefo rou' sira reu' banda ra ha'on dale'. Banda ra rahii' rasao' reu' ha'o sira. 39 De kalu banda ra rasao' ranenea' ai rana mana lelefo rou' sira, sona boki ra ana nara te bulu nara dedeta' ma baraeta'.

40 Fai fo Laban banda nara saka' rasao', Yakob fee si rasare leo banda dedeta' ma baraeta' ara reu. Basa te sira ana nara boe dedeta' ma baraeta'. No ria naa, ria banda nara tamba dodou. Ana heo heni si reme Laban banda nara mai. 41 Fai fo banda bara'ai' ara rasao', Yakob tao ai rana mana lelefo rou' sira reu' mata nara nai sira ha'on. 42 Tehuu kalu nita banda kalana'u ara rasao', sona ana ta tao ai rana mana lelefo rou' sira reu fa. De Laban hapu basa banda kalana'u ara. Tehuu Yakob hapu basa banda bara'ai' ara. 43 No ria naa, Yakob namasu'i naan seli. Ria bibi nara, onta, keledei ma ata nara dodou' raan seli.