Yakob losa to'o Laban uma na
29
Boe ma Yakob la'o leo dulu neu. 2 Fai' esa, boe ma ana nita oe dodolu' esa nanenea' koro' esa. Nanenea' nai naa, bibi bubua' telu rahani rinu oe. Tehuu oe dodolu' ria mana tatana' neni' batu bau-ina' esa. 3 Biasa kalu bibi ra basa si tesa, besa' ko mana foo ra eso heni batu ria, fo aso oe fee banda sira rinu. Rinu basa, sona ara tatana fali' batu a neu' oe dodolu' ria.4 Yakob natane mana foo sira nae, “Emi meme bea' mai?”
Ara rataa rae, “Ami meme koro Haran mai.”
5 Yakob natane bali nae, “Emi malela' au to'o ki Laban, do? Ria nana Nahor upun.”
Ara rataa rae, “Ami malela' ana.”
6 Yakob natane naroo nae, “Ana soda', do?”
Ara rataa rae, “Tou lasi' a soda'. Mita', ana feto na ri' naa', nade Rahel, foo neni bibi nara mai hani si rai ia. O mahani leo.”
7 Yakob dedea bali nae, “Besa' ia, ledo a bei nai lain. De malole lena' banda fo rabua rai ia, emi hani si leo. Basa nana foo meni si leo moo' reu raa nau-aidoo bali.”
8 Tehuu ara radedea laka rae, “Ta bisa leo naa'! Ami muste mahani basa mana foo ra reni banda nara rabua rai ia dei, besa' ko ami eso heni batu ria fo fee banda ra rinu.” 9 Yakob bei dedea no lahenda sira, te Rahel foo neni papa na bibi nara losa. Ana biasa foo banda sira.
10 Yakob nita Rahel no bibi nara, boe ma ana eso heni oe dodolu' ria batu tatana na. Ana fee to'o na banda nara rinu. 11 Boe ma ana holu naa Rahel de de'in ma dola. 12 Ana tui Rahel nae, “Fadi! Au nana o papa ma feton Ribka anan.” Boe ma Rahel nalai neun nafada papa na.
13 Laban namanene Rahel tui la'e-neu' feton Ribka anan, Yakob, boe ma nalai neu soru' ana. Nita ni, boe ma holu naan ma de'in, basa de no Yakob leo uma neu. Yakob tui basa-basan neu' Laban. 14a Laban dedea nae, “Tebe leo' naa! Ita dua kileo-boboki' esa!”
Yakob sao Lea ma Rahel
14b Yakob leo no si losa bula' esa, 15 Laban dedea no ni nae, “Leo ia', Yakob! Au ta nau o moi-tao hihii' fee au, nana huu ita dua kileo-boboki' esa. O hule kadi ma bau bea?”
16 Laban nanuu ana feto' dua. Ulu' a nade Lea, fadi' a nade Rahel. 17 Lea mata sokorino'.a Tehuu Rahel lole na seli ma ao-ina na dese'-dese. 18 Yakob nahii' Rahel, de ana nataa Laban nae, “Au oi-tao fee to'o teu' hitu, sadi to'o fee au sao Rahel.”
19 Laban nataa nae, “Au sipo'! Berako au fee Rahel sao lahenda feke', malole lena' sao o, au kileo-boboki ka! De o leo mahani' ia, fo moi-tao fee au.” 20 Yakob noi-tao teu' hitu, ela bisa hapu Rahel. Huu no ana nahii' naa Rahel seli. De teu' hitu nana, ana nameda naan nonoo' nae noi fai' hida' a.
21 Basa teu kahitu' sira, boe ma Yakob nafarerene' fee Laban nae, “To'o! Au oi-tao fee to'o teu' hitu so, de besa' ia fee au sao Rahel leo.”
22 Boe ma Laban tao feta kakabi', ma naloo basa lahenda rai nusa' ria. 23-27 Hatun ria, Laban ta fee Rahel, tehuu ana fee Lea maso' leo Yakob tendan dale' neu, de Yakob suku no' ana. Balahaa' besa' ko Yakob bubulu' ana sao Lea. Boe ma Yakob neu natane Laban nae, “Ubea' taon de to'o edi au leo ia'? Au oi-tao sota aan seli' teu' hitu, ela hapu Rahel! Tehuu ubea' taon de to'o kati ni neni' Lea?”
Laban nataa nae, “O boso' mamanasa leo' naa! Tuka ami nai ia hadas ma, fadi' a ta bole sao naulu' a'a a. De malole lena' leo ia'! O mahani losa' basa feta kakabi' ia fai' hitu, besa' ko o hapu Rahel, sadi o moi-tao fee au teu' hitu bali.” Boe ma Laban fee ria ata ina na, nade Silpa dadi Lea atan.
28 Yakob sipo'. Huu ria naa, basa feta a fai' hitu, boe ma Laban fee Rahel sao Yakob. 29 Laban fee ata inan esa bali, nade Bilha, dadi Rahel atan. 30 Yakob suku no' Rahel. Ana sue Rahel lena heni Lea. Boe ma ana noi-tao tamba selu' teu' hitu fee arama na.
Yakob ana nara
31 Tehuu MANETUALAIN bubulu' Yakob sue Rahel lena heni Lea, de Ana fee noi Lea boki. Tehuu Rahel ta boki. 32 Lea nairu, de boki ana tou' esa. Ana fee ana' ria, nade Ruben (sosoa na nae, ‘mita', boki ana' so’),b nana huu ana nae, “Tebe MANETUALAIN nita au susa ka. Huu ria naa, besa' ia au sao ka relu-natanae au.”
33 Lea nairu selu', de boki ana tou' esa. Ana fee ana' ria, nade Simeon, (sosoa na nae, ‘namanene’), nana huu ana nae, “MANETUALAIN namanene au sao ka ta tao dale' neu' au. Huu ria naa, Ana fee tamba selu' au ana' esa.”
34 Boe ma Lea nairu selu', de boki ana tou' esa. Ana fee ana' ria, nade Lewi,c nana huu ana nae, “No ana' ia, tantu au sao ka boe-boe tao dale' neu' au, nana huu au boki feen ana tou' telu.”
35 Boe ma Lea nairu selu', de boki ana tou' esa. Ana fee ana' ria, nade Yahuda (sosoa na nae, ‘io-oa’), nana huu ana nae, “Oe' ia, au io-oa MANETUALAIN!” Basa boe ma Lea ta boki so'.