28
Isak naloo naa Yakob, de ana dedea feen ua-nale' ma lelea-nonore' nae, “Nenene matalolole! O boso' sao ana feto Kana'an. 2 Tehuu o leo Padan Aram muu, nai ba'i Betuel uman. O muu sao ma to'om Laban ana feton esa.a 3 Ela leo' bea na Manetualain mana Kuasa Bau-ina' fee o ua-nale', ela o upu-ana mara ramefu ma dadi lahenda nusa bau-ina'. 4 Ela leo' bea na Manetualain hehelu-barataan neu' Abraham onda neu' o, ma tititi-nonosi mara. Ela leo' bea na o soa dae ia, fo ri' Manetualain helu basa feen neu' Abraham.”b 5 Isak dedea basa nae leo' na, boe ma ana nadenu Yakob leo Padan Aram neu, nai to'on Laban no ba'in Betuel uman.Esau sao Ismael ana feto na
6 Esau bubulu' Isak fee Yakob ua-nale', ma horo ni boso' sao ana feto Kana'an. Ria boe bubulu' papa na nadenu fadi na leo Padan Aram neu sao to'o na ana feton esa. 7 Yakob namanene papa na no mama na paretan, de ana leo Padan Aram neu.
8 Esau bubulu' papa na ta nahii' ria saon duas, lahenda Kana'an sira. 9 De ana leo papa bau-inan Ismael neu, de sao naa selu' Ismael ana feton, nade Mahalat. Mahalat nana, Nebayot fadi na.
Yakob nalamei nai Betel
10 Yakob la'o ela Beer Syeba, fo leo Haran neu. 11 Ledo a tena, boe ma ana losa mamana' esa, de suku neu' na. Ana saka' suku, boe ma hai naa batu esa de ainulu neu' lain.
12 Hatun ria ana nalamei, nita eda-ae' esa mana sele' nai dae a, peda na losa lalai. Manetualain eila'o-limalope nara onda-ae rai eda-ae' ria. 13 Nai meis ria dale', Yakob nita MANETUALAIN napadei nai boboa na ma dedea nae, “Au ia MANETUALAIN, o ba'im Abraham ma o papam Isak Manetualain na. Neu' ko Au fee o ma tititi-nonosi mara dae ia. 14 Neu' ko o tititi-nonosim dedesi na sama leo' afu. Ma neu' ko ara kofela nai basa mamana' ain. Neme o tititi-nonosi mara, neu' ko basa lahenda nusa' rai dae-bafo' a hapu ua-nale'.c 15 Mafarerene matalolole! O leo bea' muu, Au sama-sama ma anea-asala'e o. Neu' ko Au oo fali' o leo nusa' ia mai. Au ta foa ela o mesa' ko. Ma neu' ko Au atetu a hehelu-barataa Kara neu' o.”
16 Yakob keke na aon, boe ma ana nae, “Au besa' ko bubulu' MANETUALAIN nai ia boe!” 17 Ana bii ma afi nae, “Mamana' ia tao naa au ao ka maninis. Tantu Manetualain uma Na nai ia. Ma bate ia nana nusatetu-ikutema' a lelesu na.”d
18 Balahaa' balahaa anan, boe ma Yakob foa de hai naa batu fo ri' ainulu neu' lain, napadedei' naan dadi tanda. Ana po'a mina neu' batu ria, fo do'o-tabe neu' Manetualain. 19 Ana hule mamana' ria nade, Betel, sosoa na, ‘Manetualain uma Na’. (Maulu na mamana' ria, nade Lus).
20 Boe ma Yakob soo-supa nae, “Kalu Manetualain sama-sama, ma nanea-nasala'e au nai au lala'o ki ia ma nahao-nafati au, 21 losa' au fali no soda-mole', neu' ko au do'o-tabe noi neu' MANETUALAIN. 22 Batu fo au apadedei' ana ia, dadi mamana dodo'o-tatabe' neu' Manetualain. Ma basa-basan fo ri' Manetualain bati fee au, neu' ko au fee fali' babati' esa neme babati' sanahulu.”