Ribka edi Isak ela fee Yakob ua-nale'
27
Isak namalasi, de mata na nasasapu naan seli, ana naloo ana ulu susue na nae, “Esau! O mai dei.”Esau nataa nae, “Ubea', papa?”
2 Isak nafada nae, “Leo ia'! Au amalasi so. Au ta bubulu' fai hida' au mate. 3 De hai ma o manara mara, fo muu sopu fee au banda fui' esa dei. 4 Basa nana tunu-nasu mina-malada tuka au au hihii ka, fo muni fee au. Au ua basa, besa' ko au fee mema' o ua-nale'. Kalu fee basa ua-nale' neu' o, leo mae au mate boe malole.”
5 Boe ma Esau kalua neu sopu banda. Tehuu Ribka namanene Isak dedean ria. 6 De Ribka nafada Yakob nae, “Yakob! O nenene matalolole! Bisinaa' a au amanene papa ma dedea no Esau nae, leo ia': 7 ‘O muu sopu ma banda fui' esa, tunu-nasu mina-malada fee au. Kalu au ua basa, neu' ko au fee o ua-nale' nai MANETUALAIN mata Na.’ 8 De o nenene matalolole! Tuka tebe-tebe au pareta ki ia. 9 Besa' ia o leo ita bibi nara muu, fo heke muni kedae' tena mapeta' dua. Mai sona pau si fo e'ee ma paa nara muni si leo au mai. Neu' ko au tunu-nasu, tuka papa ma hihii na. 10 Kalu au tunu-nasu a si, sona muni fee papa ma naa. Neu' ko ana fee o ua-nale' dei, besa' ko ana mate. No ria naa, o ri' hapu ua-nale' ria. Ta a'a ma.”
11 Tehuu Yakob dedea no mama na nae, “Mama! Masala na leo ia. A'a Esau ao-ina na nabubulu, tehuu au ao-ina ka sona ta'a! 12 Boso' losa papa ka nafaroe la'e ao-ina ka, de ana bubulu' nae, au edi ni. Boe ma ana kutuk au!”
13 Mama na nataa nae, “Yakob! O dale ma boso' doda'. Neu' ko mama ator! Kalu papa ma kutuk o, ela mama ri' lepa naan! Besa' ia o muu heke muni kedae' sira mai leo.”
14 Boe ma Yakob neu heke na kedae' sira, ana pau si, de neni paa nara leo mama na neu. Ribka tunu-nasu si tuka Isak hihii na. 15 Basa boe ma Ribka hai na Esau kakao-papake malole nara, fo fee Yakob pake. 16 Ana poti etu Yakob lima nara ma bolii na, pake kedae' sira rou nara. 17 Boe ma ana fee Yakob nanaa mina-malada sira ma roti fo ri' ana tao na si a.
18 Yakob so'u neni nanaa' sira fee papa na. Ana dedea nae, “Papa! Au mai so.”
Isak nataa nae, “He? Te, bea o?”
19 Yakob nataa nae, “Au, papa ka ana ulum, Esau! Au tao tuka hata fo ri' bisinaa' a papa ka madenu. Foa fo mua leo. Au tunu-nasu paa', fo ri' au sopu neme nura lain mai. Papa ka mua leo, basa nana fee au ua-nale'!”
20 Isak dedea nae, “O kahere'! O bisa hapu lalai' banda leo' naa?”
Yakob nataa nae, “Au hapu, nana huu MANETUALAIN fo ri' papa ka do'o-taben a tulu-fali au.”
21 Boe ma Isak nafada Yakob nae, “Manenea' mai' mata ia, ela au afaroe soba o dei! O ia tebe Esau, do?”
22 Boe ma Yakob nanenea' leo papa na neu, de ana nafaroroe ni. Ana dedea nae, “Haraoe' ia, sama leo' Yakob haraoe na! Tehuu lima' ia, Esau lima na!” 23 Isak ta nalela' ria nana Yakob, nana huu lima nara rabubulu sama leo' Esau. Tehuu ana saka' dedea fee Yakob ua-nale', 24 ana natane selu' nae, “O ia, tebe-tebe Esau, do?”
Yakob nataa nae, “Tebe, Papa!”
25 Boe ma Isak dedea nae, “O loo fee paa' sira mai, fo au ua. Basa dei, au dedea fee o ua-nale'.” Yakob loo fee ni paa' sira ma feen oe anggor fo ninu. 26 Basa boe ma papa na dedea nae, “Ana ki on! Manenea' mai de'i au.”
27 Yakob nanenea' fo de'i ni, Isak hae na Esau kakao-papake nara boo na. Boe ma ana dedea fee Yakob ua-nale' nae,
“Au ana ka ao boo na sama leo' moo' fo ri' MANETUALAIN fee ua-nale'.
28 Ela leo' bea na Manetualain naonda dinis neme lalai mai,
neu' o oe-dae mara, ela oe-dae mara mana dadi'!
Ela leo' bea na Ana fee o hade-gandum dodou-ina',
ma anggor boa' henu-sofe'.
29 Lahenda nusa' ara dadi o atam,
ma leo ra, hada-horomata o.
Ela leo' bea na o pareta basa toranoo mara,
ma ara sunda' undulaka nara reu' o mata ma.
Bea kutuk o, sira hapu kutuk.
Ma bea fee o ua-nale', sira hapu ua-nale'.”
Esau fali ma hule Isak feen ua-nale' boe
30 Isak dedea fee basa ua-nale', ma Yakob besa' ko kalua foa ela papa na, boe ma a'an Esau fali neni banda fo ri' ana sopu na. 31 Ana tunu-nasu, basa de neni fee papa na. Ana dedea nae, “Papa! Foa fo mua leo! Au tunu-nasu paa' fo ri' au sopu a. Papa ka mua basa, sona fee au ua-nale'.”
32 Tehuu Isak kekes ara ma natane nae, “Hee! Te bea o bali?”
Esau nataa nae, “Au, Esau! Papa ka ana ulu ma.”
33 Isak mulai dere ma ana natane nae, “Kalu leo' naa sona, bisinaa' a bea ri' neni fee au paa' de ua? Boe ma au dedea feen ua-nale', ma ta bisa hela fali' ua-nale' ria so'.”
34 Esau namanene papa na dedea nae leo' na, boe ma dale na hedis a, de dola ma dedea nambera-ina nae, “Adoo! Papa! Papa fee au ua-nale' dei!”
35 Tehuu Isak nae, “O fadi ma mai de edi nala' au, ma namana'o neni o ua-nalem so.”
36 Esau dedea nae, “Ana edi nala' au lai' dua ian so. Masososa na ana tipu-dai naa au haak ulu-bauina ka. Besa' ia ana tipu-dai naa au ua-nale ka bali. Rina ko ana naraa nade, ‘Yakob’. Tehuu papa ka bei manuu ua-nale feke' fee au, do?” (Nade Yakob sosoa na nae, ‘homu neu' ei tika'’. Tehuu sosoa feke na nae, ‘manatipu-manadai'’.)
37 Isak nataa nae, “Au so'u aan dadi o malaka ma. Ma basa toranoo nara dadi ria atan. Au feen hade-gandum dodou-ina' ma anggor henu-sofe'. De ana ki on! Besa' ia bei hapu ua-nale ubea' bali fo au fee o?”
38 Esau namanene leo' naa, boe ma ana la'a papa na naroo nae, “Papa ka ua-nale ma noi esa' a, do? Tantu papa ka bei bisa saka fee au ua-nale feke'. Leo mae ua-nale aana' boe, malole.” Ana mulai dola bali.
39 Boe ma Isak nataa natafali' ana nae,
“Neu' ko o soda ma doo' a meme oe-dae mana dadi' a,
huu fo dinis ta onda neme lalai mai naoe o dae ma.
40 Neu' ko o tafa ma neni fee o soda'.
Tehuu leo mae leo' bea boe, o dadi ata soa-neu' fadi ma.
Noi kalu o bisa soa' ana, besa' ko o po'i ma aom meme ria lima na mai.”
Ribka nadenu Yakob nalai
41 Esau napeda dale' no Yakob, nana huu nalea na ria ua-nale na. Tehuu ana dodoo nae, “Mahani, papa ka namalasi so. De fai bea ma maten ma kalu basa fai susa a, sona au aisa ni!”
42-43 Ribka bubulu' Esau dudu'a-aafin ria, de ana naloo naa Yakob ma nae, “Nenene matalolole! O a'a ma nau balas dale hedi na fo naisa o. De malale malai leo to'om Laban muu nai Haran. 44 Muu leo mamanoso nai naa, losa' a'a ma ta namanasa no o so'. 45 Kalu ana nafarene heni hata fo o tao soa-neu' ana, neu' ko au adenu lahenda raloo fali' o. Huu fo au ta nau ana ki dua si mopo bela' asa nai fai' esa dalen.”
46 Boe ma Ribka dedea no Isak nae, “Au doa' o Esau saon lahenda Het sira! Kalu Yakob sao ana feto Het bali, sona malole lena' au mate.”