Isak edi nala' mane' Abimelek
26
Lai' esa de, fai laa-roes ina' a nai nusa' ria, sama leo' fai laa-roes tepo' fo Abraham bei nasoda. De Isak hule isin Abimelek, lahenda Filistin ara mane na, fo ana bisa leo nai Gerar. 2 Isak tao leo naa', nana huu MANETUALAIN natudu ao Na neu' ana nae, “O boso' leo Masir muu. Neu' ko Au atudu o mamana feke'. 3-4 Kalu o leo lalai nai mamana' ria, neu' ko Au sama-sama oo ko, ma fee o ua-nale rupa'. Neu' ko Au tao a tititi-nonosi mara ramefu, sama leo' ruu' nai lalai. Ma Au fee o mo tititi-nonosim dae ia, no basa nusa nara katema'. Neme o tititi-nonosi mara, neu' ko basa lahenda nusa' nai dae-bafo' a hapu ua-nale'. No ria naa, Au tao atetu hehelu Ka neu' o papam Abraham.a 5 Au tao basa ia ra, nana huu o papa ma tuka Au hihii-nanau Ka, Au pareta Ka ma Au atoran Ka.” 6 De Isak leo nai Gerar.7 Ribka lole na seli, de lahenda fo rai naa rita ni, boe ma ara ratatane ao' la'e-neu' ana. Tehuu Isak nataa nae, “Ribka nana au fadi ka.” Ana bii' kalu manaku nae ria sao na, neu' ko ara raisan fo tonda ra Ribka. 8 Isak leo namanoso nai naa, lai' esa boe ma mane' a relu nesi' ria jandela na, te ana nita Isak no Ribka dua si raholu ao ma rade'i'. 9 Boe ma ana nadenu lahenda reu raloo Isak, ana nafada ni nae, “Isak! Au bubulu' matetu', tebe ina' ia nana o sao ma! Tehuu ubea' taon de o mae, ria nana o fadi ma?”
Isak nataa nae, “Leo ia', papa! Au bii', kalu au ae ria nana au sao ka, boso' losa lahenda raisa au.”
10 Mane' a nataa nae, “Kalu lahenda nai ia suku no sao ma, tantu o sale ami! Ubea' taon de o tao leo naa' neu' ami?”
11 Boe ma Abimelek barataa anaraun ara nae, “Emi basa mafarerene' matalolole! Emi bea ri' maparani fufudi-lele'o lahenda ia, do sao na, neu' ko au huku amate ni.”
Ara ralelena ao' la'e-neu' oe dodolu'
12 Tepo' ria, Isak sele-tande nai nusa' ria. Ana hapu buna-boa' lai' natun esa, nana huu MANETUALAIN fee ni ua-nale'. 13 Ria hata-heton tamba raroo, losa' ana namasu'i naan seli. 14 Ria sapi nara, kedae' ma bibi-lopo nara rama'ate. Ria ana uma dalen dodou'. Losa' lahenda Filistin ete' ao nara ro ni.
15 Fai a ulu na, Isak papan Abraham ali oe dodolu' dodou'. Tehuu besa' ia lahenda Filistin ara, radofu etu katema' asa.
16 Boe ma mane' Abimelek dedea no Isak nae, “Isak! Malole lena', o la'o ela nusa' ia. Huu fo o kuasa ma lena heni ami.”
17 Boe ma Isak heo' neme naa' mai, de fali selu' neu leo nai Gerar bafa' a. 18 Ana suu selu' oe dodolu' fo ri' ara radofu etu si. Ma ana fee oe dodolu' sira ranade tuka nade' fo ri' papa na foi.
19 Isak ata nara ali oe dodolu' nai Gerar bafa' a, ara ali la'e oe a mata na de oe a nasapura dea' mai. 20 Tehuu mana foo Gerar ara, ralelena ao' ro Isak mana foo nara, nana huu oe ria. Ara rae, “Ami oem ia!” Huu ria naa, Isak fee oe dodolu' ria, nade Esek, sosoa na nae, ‘ralelena ao'’.
21 Boe ma Isak lahenda nara ali oe dodolu' esa bali. Tehuu ara ralelena ao' bali, nana huu oe dodolu' ria. Huu ria naa, Isak fee oe dodolu' ria nade, Sitna, sosoa na nae, ‘esa soa' esa’.
22 Ana foa ela mamana' ria, de ali oe dodolu feke' esa bali. Oe' ia sona ara ta ralelena ao' so'. Huu ria naa, Isak fee oe dodolu' ria nade, Rehobot, sosoa na nae, ‘mamana loan’. Ma ana dedea nae, “Besa' ia, Manetualain fee ita leo nai dae loan. Nai ia, besa' ko ita bisa tamefu.”
23 Neme naa' mai, Isak asa la'o bali fo reu leo rai Beer Syeba. 24 Hatun ria, boe ma MANETUALAIN natudu ao Na neu' ana ma dedea nae, “Isak! Au nana o papam Abraham Manetualain na. De o boso' bii, huu fo Au anea-asala'e o. Neu' ko Au fee o ua-nale'. Ma o tititi-nonosim neu' ko ramefu. Au tao leo ia', nana huu Au hehelu Ka neu' o papa ma.”
25 Boe ma Isak lutu mei tutunu-hohotu' neu' naa. Ana hule makasi neu' MANETUALAIN nai mamana' ria. Ana leo neu' naa ma lahenda nara ali oe dodolu'.
Mane' Abimelek no Isak radame ao
26 Tepo' ria, mane' Abimelek neme Gerar mai, sama-sama no tian Ahusat ma ria malaka musun, Fikol, mai dama Isak. 27 Isak natane nae, “Papa mane'! Maulu na emi usi heni ami so. De besa' ia emi mai tao ubea' bali?”
28 Ara rataa rae, “Leo ia'! Besa' ia ami bubulu' Manetualain nanea-nasala'e o. Huu ria naa, ami dodoo mae, malole lena' ita dua tao hehelu-barataa' leo ia': O soo-supa mae, 29 emi ta tao tadalu' neu' ami, sama leo' ami ta tao tadalu' neu' emi. Tebe ami dale mara malole a mo emi. Huu ria naa, fai' naa ra emi kalua meme ami dae ma mai no mole-dame. Ami bubulu' matetu' MANETUALAIN fee emi ua-nale'.”
30 Boe ma Isak tao feta fee si, de basa si raa-rinu no namaho'o. 31 Balahaa' balahaa anan, boe ma ara soo-supa. Basa de Isak fee si fali no mole-dame.
32 Fai ria, Isak ata nara mai tui la'e-neu' oe dodolu' fo ri' ara ali rae, “Papa! Ami hapu oe so.” 33 Boe ma Isak fee oe dodolu' ria nade, Syeba, sosoa na nae ‘soo-supa’. De ara fee kota ria nade, Beer Syeba losa' besa' ia.b
Esau sao ina' dua reme leo feke'