Abraham sao selu'
25
Abraham sao selu' ina' esa, nade Ketura. 2 Ketura boki fee ni ana nara, si': Simran, Yoksan, Medan, Midian, Isbak ma Sua. 3 Yoksan ana nara, si' Seba ma Dedan. Dedan tititi-nonosin, si' lahenda Asyur, lahenda Letus ma lahenda Leum. 4 Midian ana nara, si': Efa, Efer, Henok, Abida ma Eldaa. Basa sira nana, Ketura tititi-nonosin.5-6 Abraham bei nasoda a, ana bati fee Hagar no Ketura ana nara, esa' ko no' hata-heton. Ana nadenu si reu leo rai dae Kana'an poo' dulu, ela ara doo' a reme ana ni Isak. Tehuu basa hata posaka nara, ana fee katema' asa leo Isak reu.
Abraham maten
7-8 Abraham maten neu' teun natun esa hitu hulu lima. 9-10 Ana nara, Isak ma Ismael ratoin nai lea' Makpela nanenea' Mamre. Maulu na Abraham asa oka' ria neme lahenda Het, ri' Sohar anan Efron. Maulu na ara ratoi Sara nai lea' ria. 11 Abraham mate ni, basa boe ma Manetualain fee ua-nale' neu' Isak, de ana nasoda no mole-dame. Tepo' ria, Isak leo nanenea' oe dodolu' Beer Lahai Roi.
Ismael tititi-nonosin
12 Ia nana Ismael tutui na. Ria nana, Abraham no Hagar anan. Hagar nana, Sara atan neme Masir. 13-16 Ismael ana toun sanahulu dua. Nade nara ratutuka ao, neme ulu' a losa mate'a tei-susu' a, si': Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis ma Kedma. Ana' sira dadi reu' lahenda nusa' sanahulu dua bei-ba'in, esa' ko no' nusa na. Ara fee nusa sira ranade tuka sira esa' ko bei-ba'in naden.
17 Ismael maten neu' teun natun esa telu hulu hitu. 18 Tehuu ria tititi-nonosi nara, esa musu no esa. De ara leo kofela mulai reme Hawila losa Syur, natoo no nusa Masir losa Asyur.a
Esau no Yakob
19 Ia nana Abraham anan Isak tutui na. 20 Tepo' fo Isak sao Ribka, nana Isak teun haa hulu. Ribka papa na, ri' Betuel ma naa na, ri' Laban. Sira lahenda Aram, reme Padan Aram.b
21 Ribka ta boki. Huu ria naa, Isak hule-haradoi neu' MANETUALAIN ela Ribka boki. MANETUALAIN namanene huhule-haradoi na, boe ma Ribka nairu. 22 Sekonaa te, ana nairu ana' dua. Tehuu ana' sira ratitika rai inan tein dale'. Boe ma Ribka natane nai dalen dale' nae, “Ubea' taon de ana kadua' ia ra, leo ia'?” De ana natane MANETUALAIN.
23 MANETUALAIN nataa nae,
“Nai o tei ma dale', lahenda nusa' dua neu' ko ara ramusu ao raroo.
Neu' ko muri' a bara'ai na lena ulu' a.
Ma a'a a noi-tao soa-neu' fadi na.”
24 Losa fai boboki na, boe ma Ribka boki ana kadua', tou' mesan. 25 Ana ulu' a rou na pilas ma ao-ina na nabubulu. Huu ria naa, ara foin nade, Esau (hii' nae sama leo' dedea feke' a sosoa na nae ‘kabubulus’).
26 Basa ria, besa' ko fadi na kalua. Tehuu ana homu neu' a'a na ei tika na. Huu ria naa, ara foin nade, Yakob (hii' nae sama leo' dedea feke' fo sosoa na nae ‘ei tika'’). Fai fo boki dua si, nana Isak teun nee hulu.
Yakob tipu-dai naa Esau haak ulu-bauinan
27 Ana kadua' sira rambau-ina, Esau dadi mana sopu kahere'. Ana nahii' nahani' nura lain. Tehuu Yakob lahenda hara taa', ma nahii' nahani' uma. 28 Isak nahii' naa' paa banda fui'. Huu ria naa, ana sue naa Esau seli. Tehuu Ribka sue naa Yakob seli.
29 Lai' esa de Yakob nasu fufue, Esau besa' ko sopu fali. Ana sota ma namalaa naan seli. 30 Ana nafada Yakob nae, “Fadi! Fee au kua pilas ma bai' nai ure' a fo ua dei! Au amalaa aan seli.” (Huu ria naa raloo ni rae, Edom, hii' nae sama leo' dedea feke' fo sosoa na nae ‘pilas’).
31 Yakob nataa nae, “Malole a a'a. Tehuu fee au haak ulu-bauina ma dei!”c
32 Esau nataa nae, “Ubea ale' no haak ulu-bauina' ria! O soan leo. Au amalaa aan seli. O sode malai' a, munin mai leo fo au ua.”
33 Tehuu Yakob dedea bali nae, “A'a, mahani dei! A'a ka soo-supa dei mae fee au haak ria.” Boe ma Esau soo-supa nae leo' naa. 34 Basa de Yakob sode feen kua fufue ria no roti. Esau naa-ninu basa, boe ma la'o heni aon.
No ria naa, Esau fee heni ria haak ulu-bauina na.