Ratane ina' fee Isak
24
Abraham teu-fain loa-naru' losa' namalasi naan seli. Ma MANETUALAIN nanea natalolole ni, feen nasoda no mole-dame. 2-3 Abraham nanuu ata kamahere' esa, fo urus ria hata-heton katema'. Lai' esa boe ma Abraham naloo naan nae, “Nenene matalolole! Au hule o soo-supa,a pake MANETUALAIN mana adu lalai ma dae-ina' a nade Na. Soo-supa mae, o ta matane ana feto' lahenda Kana'an ara, fo feen sao au ana ki Isak. 4 O muste leo au dae fua-funi ka muu, nai au kileo-boboki kara. O matane ana feto' esa nai naa feen sao au ana ka.”5 Ata ria natane Abraham nae, “Ia, papa! Tehuu leo' bea, kalu ana feto' ria ta nau tuka leo ia' mai? Kalu leo' naa, sona au muste oo papa ka ana ma leo naa' neu fo sao, do leo' bea?”
6 Abraham nataa nae, “Mafarenene' matalolole! Leo mae leo' bea boe, ta bole moo au ana ka leo naa' neu! 7 Mafarerene' huu fo MANETUALAIN mana kuasa nai lalai, noo au kalua eme dae fua-funi ka mai losa nai dae ia. Ma Ana tao hehelu-barataa' no au nae, ‘Neu' ko Au fee katema' dae ia neu' o tititi-nonosim.’ O dale ma boso' doda'! O muu leo. Neu' ko Manetualain nadenu eila'o-limalopen nai nusatetu-ikutema' a soi eno' fee o bisa maneta mo ana feto' fo neu' ko dadi au ana ka sao na. 8 Tehuu kalu ana feto' ria ta nau tuka leo ia' mai, sona o soi ma aom meme sosoo-susupa' ria. Leo mae leo' bea boe, ta bole moo au ana ka leo naa' neu.”
9 Boe ma ata ria soo-supa neu' Abraham nae, neu' ko ana tao tuka Abraham hihii-nanaun katema'.
10 Boe ma ata ria here naa onta sanahulu. Ana fua hata malole rupa' reu' onta sira lain. Basa de ana leo Nahor kota na neu nai Mesopotamia.b
11 Mate'e na, ata a losa kota ria. Ana fee onta nara hahae reu' kota a suu na, nanenea' oe dodolu' esa. Fai ria ledo leodae' so, naraa la'e ana feto' ara reu aso oe nai oe dodolu' ria. 12 Ata a hule-haradoi nae, “MANETUALAIN, fo ri' au malaka ki Abraham Manetualain na. Soi eno' ela au leleo-lala'o ki ia neni ua-nale'. Manetualain matudu dale malole ma neu' au malaka ka, ma mafarene hehelu na neu' au. Ela au aneta o ana feto' fo ri' neu' ko dadi Isak sao na. 13 Manetualain, au apadei nai oe dodolu' ia suu na. Ma ana feto' ara reme kota dale' mai aso oe nai ia. 14 Au hule leo ia': Kalu au dedea o ana feto' esa ae, ‘Ana feto ana' on! Maonda ure oe ma fee au oe bai' inu dei.’ Kalu ana nataa nae, ‘Papa ka minu leo. Ma neu' ko papa ka onta mara boe au hani si.’ Ria dadi tanda nae, ana feto' ria ri' Manetualain teka-here ni dadi Isak sao na. No tanda leo naa' a, au bubulu' Manetualain matudu susue Ma neu' au malaka ki Abraham.”
Abraham ata na naneta no ana feto Ribka
15-16 Abraham ata na bei ta hule-haradoi basa boe', te ana feto' esa nade Ribka mai. Ria nana, Nahor no saon Milka upu na. Nahor nana, Abraham fadin. Ribka papa na nade Betuel. Ribka lole na seli ma bei ao tema. Ana onda neu aso oe nahenu ure na nai oe dodolu' ria, basa de ae lain mai.
17 Ribka losa lain, boe ma Abraham ata na nalai neu soru' ana. Ana hule nae, “Ana feto ana' on, fee au oe bai' inu dei.”
18 Ana feto ana' a nataa nae, “Minu leo, to'o!” Ana naonda lai-lai ure oe na, de fee ata a ninu. 19 Ninu basa boe ma, ana feto' a nae, “Neme' naa ela au hela oe fee to'o onta mara rinu losa' rabete.” 20 Ana po'a oe lena' a neu' ha'o ra dale'. Ana nalai, onda-ae aso oe neme oe dodolu' ria, fee basa onta ra rinu losa' rabete. 21 Abraham ata na napadei nee-nee, ma nanilu nahere ana feto' a nonoi na. Ana aafi nae, “Ana feto' ia ri' Manetualain teka-heren, do?”
22 Basa onta sira rinu losa' rabete. Boe ma ata a hai na rereli idu lilo pilas ma sue' lilo pilas pasang esa, de olu si reu' ana feto' a liman duas.c 23 Ata a natane nae, “Ana feto ana' on, papa ma nade bea? Kalu bisa, au tuli fo suku nai papa ma uma na.”
24 Ana feto' a nataa nae, “Au papa ka, nade Betuel. Au ba'i ka, ri' Nahor. Ma au besa ka, ri' Milka. 25 Nai ami uma ma mamana susuku' dai fee to'o kasa. Ma nau-aidoo dodou' fee to'o banda mara.”
26 Boe ma ata ria sunda' undulaka na do'o-tabe MANETUALAIN. 27 Ana dedea nae, “Io-oa Manetualain! Manetualain soi eno' fee au, losa' aneta oo malaka Abraham kileo-boboki nara rai ia. Manetualain matudu dale malole Ma neu' au malaka ki Abraham, ma tao natetu hehelu-barataam neu' au.”
28 Ana feto' a nalale nalai neun, tui basa uma isi nara hata mana dadi' ria. 29-30 Ribka naa na, nade Laban. Laban nita lilo pilas sira ma namanene Ribka tutui na, boe ma ana nalai neu dama ata fo ri' bei no onta nara rapadei ranenea' nai oe dodolu' ria. 31 Laban dedea nae, “To'o! MANETUALAIN napipipi-nalala'o noo to'o losa ia no soda-mole'. Boso' mapadei' mahani' ia! Mai leo ami umam teu, ami sadia ma kama so. Nanaa' soa-neu' to'o onta mara boe heta.”
Abraham ata na natane Ribka fee Isak
32 Abraham ata na tuka Laban, leo Betuel uma na neu. Laban asa fali si raonda hata ra reme onta ra mai. Ara hani onta ra nau. Ara reni oe fo ata a no lahenda nara safe ei nara. 33 Ara mulai sadia nanaa-nininu' nai mei a, boe ma ata ria nae, “Ami saka' mia-minu ria' so, tehuu au hule parmisi fo afada maksud esa dei.”
Laban nataa nae, “To'o dedea leo.”
34 Ata ria nae, “Au ia, emi ba'im Abraham atan. 35 MANETUALAIN fee au malaka ka ua-nale' dodou', de namasu'i naan seli. Manetualain bati-pala feen onta, keledei, sapi, bibi-lopo, kedae', lilo pilas, lilo fula', ata tou' ma ata ina'. 36 Au malaka ki dua si ina-tou' ramalasi, besa' ko mama Sara boki ana tou' esa. Ana' ria neu' ko sipo malaka ki Abraham posaka nara katema'. 37 Malaka ki Abraham nadenu au soo-supa, ‘boso' au atane ana feto Kana'an feen sao anan Isak. 38 Tehuu o muste matane ana feto' neme au kileo-boboki kara fo dadi Isak sao na.’
39 Au atane malaka ka ae, ‘Kalu ana feto' ria ta nau tuka au, sona leo bea'?’
40 Tehuu ana nataa au nae, ‘MANETUALAIN fo ri' au oi tuka-tuka' Ria hihii-nanaun, neu' ko nadenu eila'o-limalope nara la'o sama-sama ro o. De o lala'om ia soi fee o eno', ela o bisa hapu ana feto' esa neme au kileo-boboki kara, dadi au ana ka sao na. 41 Tehuu kalu o losa au kileo-boboki kara, ma ara ta nau po'i ana feto' ria, sona soi ma aom meme sosoo-susupa' ria.’
42 De bisinaa' a au losa oe dodolu' a, au hule-haradoi ae, ‘MANETUALAIN, fo ri' au malaka ki Abraham Manetualain na. Ela leo' bea na soi eno' fo au lala'ok ia naua-nanale. Ela au aneta oo ana feto' fo ri' dadi Isak sao na. 43 Manetualain, au apadei' nai oe dodolu' ia. Ma ana feto' ara reme kota dale' mai aso oe nai ia. De au hule leo ia': Neu' ko au dedea oo ana feto' esa ae, “Ana feto ana' on! Fee au oe bai' inu dei.” 44 Kalu nataa nae, “Papa minu leo! Ma au fee papa onta mara rinu boe.” Sona ana feto' ria ri' MANETUALAIN teka-here ni dadi au malaka ka ana na saon!’
45 Au bei ta hule-haradoi basa boe', te ana feto Ribka mai neni ure oe na, onda neu aso oe nai oe dodolu' a. Ana ae losa lain, boe ma au hulen ae, ‘Ana feto ana' on, fee au oe bai' inu dei.’ 46 Ana naonda lai-lai ure oe na, de nae, ‘To'o minu leo. Ma au fee to'o onta nara rinu boe.’ Boe ma au inu ma au onta kara rinu boe.
47 Boe ma au atane ni ae, ‘Ana feto ana' on, papa ma nade bea?’
Ana nataa nae, ‘Au papa ka, nade Betuel. Au ba'i ka, ri' Nahor. Ma besa ka, ri' Milka.’ Boe ma au fee ni pake rereli neu' idu na, ma olu sue lilo pilas dua reu' lima nara.
48 Boe ma au aloe ao ka do'o-tabe MANETUALAIN ae, ‘Io-oa MANETUALAIN! MANETUALAIN soi fee au eno', de au aneta oo malaka ki Abraham kileo-boboki nara rai ia. Ma au aneta oo ana feto', fo ri' dadi mane ana' Isak sao na.’ 49 De besa' ia, kalu papa kasa matudu dale susue mara neu' au malaka ki Abraham, sona tui neu' tea na, ma kalu ta'a boe tui neu' tea na, ela au bubulu' muste tao ubea'.”
Ribka kileo-boboki nara sipo' oli' a
50 Ata a dedea basa, boe ma Laban no Betuel rataa rae, “Kalu MANETUALAIN ator naan leo' naa, sona ami bei mae ubea' bali. 51 Ana feto Ribka nai ia. De moo ni neu leo, ela ana dadi ba'i Abraham manafeun tuka hata fo ri' MANETUALAIN ator.”
52 Abraham ata na namanene leo' naa, boe ma ana natele losa dae a, fo hule makasi neu' MANETUALAIN. 53 Boe ma ana hai fee Ribka lilopilas-lilofula' ma kakao-papake malole ra. Ana fee Ribka naa na ma mama na, hadia mabeli. 54 Boe ma Abraham ata na no lahenda nara ratuu' raa-rinu, ma ara suku reu' naa. Balahaa' balahaa anan, ara foa boe ma ata a nafada manuu uma' a nae, “Au hule parmisi, kalu bisa sona besa' ia ami fali leo au malaka ka meu.”
55 Tehuu Ribka naa na ma mama na rae, “Te mapue maroo' fafali' a tao ubea'? Neme' naa ela Ribka leo no ami fai' sanahulu leo' naa dei. Basa dei moo ni.”
56 Tehuu ata a nataa nae, “Adoo! Boso' ena au! MANETUALAIN tulu-fali au, de au hapu ana mane ana' a sao na. De mama kasa po'i ami fali meu tui malaka a dei.”
57 Ara rataa rae, “Leo ia'! Mai ita tatane mata' Ribka. Ria hihii na leo bea'?”
58 Boe ma ara raloo raan de ratane ni rae, “Ribka! Besa' ia neme o dale ma mai. O nau tuka mema' lahenda ia, do leo' bea?”
Ana feto' a nataa nae, “Au nau!”
Rapora—Ribka leo saon Isak neu
59-60 Boe ma ara po'i Ribka, ma ria ata inan fo ri' anutun neme aanan ria, ela ro Abraham ata na reu bela' a. Ara dedea fee Ribka ua-nale' rae, “Ribka! Ami mamahehena' Manetualain fee o boki ma dodou', ela o tititi-nonosim dadi rifu-natun. Ma ami mamahehena' o tititi-nonosi mara raseki musu ra.”
61 Boe ma Ribka no ata ina nara rafafau sira bua-loan, de ara sa'e onta la'o tuti' a tuka Abraham ata nara.
62 Isak leo nai dae Negeb. Ana besa' ko fali neme oe dodolu' Beer Lahai Roi mai. 63 Ledo leodae' esa, ana kalua neme tenda na mai, lala'o' hai ani. Ana boti' laka na, te nita onta ra mai.
64 Ribka nita Isak, boe ma ana nalale bo'e neme onta na mai. 65 Ana natane Abraham ata na nae, “Papa! Ana tou' fo la'o mai ri' ele' a nana, bea ria?”
Ata ria nataa nae, “Au malaka ka ana na ri naa' so te.” Boe ma Ribka hai naa lafa ana na, de poti mata-idun.