Abraham edi nala' mane' Abimelek
20
Abraham narali neme Mamre leo dae Negeb neu nai ona, ma leo nai koro Kades no koro Syur talada. Tehuu ta doo bea boe', te ana narali leo koro Gerar neu bali. 2 Ana nafada lahenda rai naa nae, Sara nana ria feto na. Huu ria naa, Abimelek, mane' Gerar, nadenu lahenda nara reu rala Sara, roo ni leo mane' a uma mana pareta na neu. 3 Hatu' esa, boe ma Manetualain natudu ao Na neu' mane' a nai meis dale'. Ana dedea nae, “O tonda ma lahenda saon, nana o moi mate ia!”4-5 Tehuu Abimelek dedea nae, “Manetualain! Au ta sala. Au bei ta tototo ina' ria. Abraham nafada aon nae ina' ria nana feto na! Ma ina' ria boe manaku nae leo' naa. Huu ria naa, au adenu reu ralan no dale makamoi'. De Manetualain boso' sale au!”
6 Manetualain nataa nae, “Tebe Au bubulu' o dale ma makamoi'. Au amakee fo o boso' tototo ina' ria. No ria naa, o ta masala neu' Au. 7 Besa' ia fee fali' ina' ria leo sao na neu. Ria sao na nana Au mana nesi mata Ka. De mafada ni hule-haradoi fee o, ela o boso' mate. Tehuu kalu o ta fee fali' ina' ria, sona mafarene matalolole! Neu' ko mate katema' o mo basa lahenda mara.”
8 Balahaa' balahaa anan, boe ma mane' a naloo naa basa pegawe nara, de tui meis na. Basa si bii raan seli. 9 Boe ma mane' a naloo naa Abraham ma natane nae, “Au asala' ubea', losa' o tao soe fee au oo anaraun kara leo' ia? O ta bole tao hihii-nanau' tadalu leo ia'! 10 O afi leo bea', losa' o tao leo ia'?”
11 Abraham nataa nae, “Papa mane'! Au afi ae emi basa ta malela' Manetualain. Tantu emi ruma nau maisa au, ela tonda ma au sao ka. 12 Tebe au dedea tetea' ae, au feto ki ria. Ami dua papa' esa, tehuu esa' ko maman. Huu ria naa, ami masao ao. 13 Tepo' fo Manetualain nadenu ami meu tai-tapa nai lahenda nusa-namon, au afada sao ka ae, ‘Kalu ita leo bea' teu, ma lahenda ratane ita dua tututi-nanaton, kalu o sue au sona mataa mae, ita feto-naa'.’”
14-16 Boe ma mane' Abimelek fee fali' Sara. Ana dedea no Sara nae, “Besa' ia au bae o naa ma doi lilo fula' rifun esa dadi buti, ela basa lahenda ra bubulu' au ta tao asala' o hata-hata esa boe'.”
Mane' a dedea no Abraham nae, “Abraham! Au nusa ki ia mana soi' soa-neu' o. O mahii' leo nai mamana' bea boe, bole.” Ana fee Abraham sapi, kedae' ma bibi-lopo. Ana fee ata tou' ma ina'.
17-18 Tepo fo Abimelek tonda naa Abraham sao na, boe ma MANETUALAIN tao naa ina' fo leo rai Abimelek nusa na tedi si. Tehuu fai fo mane' a fee fali' Sara leo sao na neu, boe ma Abraham hule-haradoi ela Manetualain buka selu' ina' sira mamana ana nara, de ara bisa boki-lae.