Lahenda telu mai raneta ro Abraham
18
Abraham leo nanenea' nai ai huu ina' ara nai Mamre. Nai naa MANETUALAIN natudu ao Na neu' ana. Tutui na leo ia': Fai ria makahana na seli, de Abraham natuu' hai ani nai tenda na matan. 2 Abraham boti' laka na, te nita lahenda telu rapadei rai naa. Boe ma ana nalai neu soru' asa. Ana sunda' undulaka na, 3 ma nae, “Papa kasa! Kalu bisa, sona papa kasa tuli au tenda ka dei. Leo mae minu noi oe hihii' boe, malole. 4 Papa kasa hahae mai' ai lao' ia. Ana' ara dei reni oe mai safe ei mara. 5 Au sadia nanaa-nininu' fee papa kasa, ela hapu mapii-bara'ai' bai', besa' ko papa kasa la'o maroo. Au amaho'o bisa alalau' papa kasa.”Ara rataa rae, “Ria malole a. Makasi dodou'. Ami tuli.”
6 Boe ma Abraham nalai leo tenda na neu' ma nafada Sara nae, “Malale! Hai ma uu' malole ina' saku esa fo tao roti.”a
7 Ana nalai leo sapi nara neu, de heke naa sapi ana mapeta' esa. Ana nadenu ata nara tati sapi ria ma tunu-nasu paa na. 8 Boe ma Abraham hai na sosoe', keju ma paa' fo ri' besa' ko tunu-nasu si, de neni fee fui ra. Ara raa-rinu ma Abraham napadei nai ai a huu na fo nalalau' asa.
9 Ara ratane ni rae, “Abraham! O saom Sara, nai bea?”
Ana nataa nae, “Nai tenda dale'.”
10 Boe ma neme sira telu, esa dedea nae, “Manafali', te Au mai selu'. Fai ria, te o saom Sara boki ana tou' esa so.”
Ara dedea rae leo' naa, te Sara namanene neme tenda dale' mai. 11 Tepo' ria, Abraham no Sara ramalasi raan seli, ma Sara ta namahedi ina so'. 12 Sara namanene si dedea rae leo' naa, boe ma ana hi'a dale' a. Ana afi nae, “Au oo sao ka mamalasi so, ma bei boki bali? Hapu nai bea ami dadi sama leo' mana sao bebeu', fo hapu ana'?”
13 MANETUALAIN natane Abraham nae, “Ubea' taon de Sara hi'a? Ria afi nae hata fo ri' Au dedea ia ta bisa dadi, nana huu ria namalasi, do? 14 Au, MANETUALAIN! Ta hapu hata esa fo Au ta bisa taon! Mafarene matalolole! Manafali' Au fali selu' mai, te Sara boki ana tou' esa so.”
15 Sara namanene leo' naa, boe ma ana bii'. De ana nalena nae, “Au ta hi'a fa!”
Tehuu Manetualain nataan nae, “Tebe bisinaa' a o hi'a!”
Abraham lele'o Manetualain boso' huku lahenda Sodom
16 Boe ma fui katelu' sira saka' leo kota Sodom reu. Abraham nafuli si losa eno talada'. Neme naa' mai, ara bisa lalanda rita kota Sodom. 17 MANETUALAIN afi nai dale Na nae, “Malole lena' Au tui Abraham, Au nau alulutu' kota Sodom. 18 Neu' ko ria tititi-nonosin ramefu, ma dadi lahenda nusa bau-ina'. Ma ria boe dadi ua-nale' soa-neu' basa lahenda nusa' nai dae-bafo'. 19 Au teka-here ni, ela nanori-nafada ana nara ma lahenda feke' ara fo tuka raroo Au eno-dalak, ela rasoda roo-tetu' ma ta rasapepeko. Kalu ara tao leo naa', sona Au atetu hehelu-barataa Ka neu' Abraham.”
20 Boe ma MANETUALAIN nafada Abraham nae, “Leo ia'! Au amanene lahenda dodou' ramumuu la'e-neu' lahenda rai kota Sodom ma Gomora. Sira tadalu nara lena uuku'. 21 Huu ria naa, Au onda ela parisa' mata Ki basa-basan fo ri' Au amanene, tebe do ta'a. Kalu ta'a, neu' ko Au bubulu'.”
22 MANETUALAIN bei dedea no Abraham, te fui kadua' sira la'o raroo leo kota Sodom reu. 23 Abraham nanenea' leo Manetualain neu ma ana lele'o nae, “Leo' bea? Papa nau malulutu' bela' lahenda roo-tetu' a ma lahenda tadalu' a, do? 24 Kalu lahenda roo-tetu' lima hulu rai kota ria dale', Papa bei nau malulutu' kota ria? Do, Papa ta malulutu' kota ria nana huu sira. 25 Papa boso' tao leo naa'! Boso' losa lahenda roo-tetu' sira boe mate, nana huu Papa malulutu' lahenda tadalu' ara. Papa ri' Mana Ee Dedea' nai lalai ma dae-ina' a. Papa bubulu' ria ta beibebera'.”
26 MANETUALAIN nataa nae, “Kalu Au hapu lahenda roo-tetu' lima hulu rai kota Sodom, Au ta huku kota ria, nana huu sira.”
27 Boe ma Abraham dedea bali nae, “Papa, hule ampon, kalu bisa au dedea selu' bai'. Au noi lahenda dae-bafo' pakanaa', ta alela' hata-hata esa boe'. 28 Uni' ko leo lahenda roo-tetu' ta losa lima hulu, tehuu noi haa hulu lima' a, leo' bea? Hai heni noi lima' a, Papa bei nau malulutu' kota ria, do?”
Manetualain nataa nae, “Kalu Au hapu lahenda roo-tetu' haa hulu lima rai naa, Au ta alulutu' kota ria.”
29 Abraham lele'o bali nae, “Kalu noi haa hulu' a, leo' bea Papa?”
Manetualain nataa nae, “Kalu Au hapu haa hulu, Au ta huku si.”
30 Abraham lele'o naroo nae, “Papa! Boso' mamanasa', tehuu uni' ko leo lahenda roo-tetu' noi telu hulu' a, leo' bea?”
Manetualain nataa nae, “Kalu Au hapu telu hulu, Au ta huku si.”
31 Boe ma Abraham naloloe bali nae, “Papa boso' mamanasa' kalu au atane selu' bai'. Kalu hapu noi lahenda dua hulu' a, leo' bea?”
Manetualain nataa nae, “Hapu dua hulu, Au ta alulutu' kota ria.”
32 Abraham dedea nate'e nae, “Papa! Au dedea selu' lai' esa, tehuu boso' mamanasa mo au! Leo' bea kalu lahenda roo-tetu' noi sanahulu' a?”
Manetualain nataa nae, “Kalu Au hapu lahenda roo-tetu' sanahulu rai naa, Au ta alulutu' kota ria.”
33 Ara dedea-rao nara basa leo' naa, MANETUALAIN la'o naroo ma Abraham fali neun.