3 Abram namanene leo' naa, boe ma sunda' undulaka na, naloe laka na losa dae a. Manetualain dedea naroo nae, 4-5 “Au tao hehelu-barataa' oo ko, leo ia': neu' ko o dadi lahenda nusa' dodou' bei-ba'in. Huu ria naa, o ta nade Abram so' (sosoa na nae, ‘ama' fo nade na bau-ina'’), tehuu nade Abraham (sosoa na nae, ‘lahenda nusa' dodou' bei-ba'in’). 6 Neu' ko Au tao o tititi-nonosi mara ramefu. Neu' ko Au afoa nusa' dodou' reme sira mai, ma so'u mane' dodou' reme tititi-nonosi' sira mai.

7 Au homu ahere hehelu-barataa Ka neu' o ma tititi-nonosim. Hehelu-barataa' ia ta etu-basan, huu fo Au nana o mo tititi-nonosim Manetualain ma. 8 Neu' ko Au fee dae Kana'an ia katema' neu' o mo tititi-nonosi mara. Besa' ia o leo lalai ada' ia. Tehuu neu' ko o tititi-nonosim ranuu dae Kana'an ia losa doo na neu. Ma Au dadi sira Manetualain na. 9-10 Tehuu o mo tititi-nonosim muste homu mahere hehelu-barataa' ia no dale katematua. Basa tou' ara muste sunat. 11-13 Neme besa' ia losa doo na neu, basa tou' ara mulai neme boki basan fai' falu sona muste sunat. O kileo-boboki mara, ata fo rai umam dale', ma ata fo o asa neme nusa feke' a, basan muste sunat. Sunat ia dadi tanda neu' ita dua hehelun, fo ri' nana nita' nai emi ao-ina mara. 14 Tou' bea ta sunat, sona ana nalena-laka Au hehelu-barataa Ka, de ta bisa dadi Au lahenda Ki.”

15 Boe ma Manetualain dedea naroo nae, “Mulai besa' ia, o boso' boe maloo sao ma mae Sarai, tehuu maloon mae Sara. 16 Neu' ko Au fee ua-nale' dodou' neu' Sara, ela ana boki fee o ana tou' esa. Tebe! Neu' ko Sara dadi neu' lahenda nusa' dodou' bei-ba'in. Ma neu' ko Au so'u mane' dodou' reme ria tititi-nonosin mai.”

17 Abraham namanene leo' naa, boe ma sunda' undulaka na, naloe laka na losa dae a. Tehuu ana hi'a dale' a. Ana afi nae, “Tou lasi kumulou' teu' natun esa leo' au ia, bei hapu ana' bali? Ma Sara namalasi kokoo, teun sio hulu so. Hapu nai bea bisa boki?” 18 Ana nafada Manetualain nae, “Manetualain. Neme' naa ela Ismael hapu au hata posaka kara boe, ta hata-hata.”

19 Tehuu Manetualain nataan nae, “Ta'a! Neu' ko o saom Sara boki ana tou' esa. O foin nade, Isak. Au hehelu-barataa Ka neu' ko onda neu' ana no ria tititi-nonosin losa doo na neu. 20 Tehuu Au amanene hata fo o hulen soa-neu' Ismael. Huu ria naa, Au fee ni ua-nale' ma Au tao ria tititi-nonosin ramefu. Neu' ko mane leo sanahulu dua dadi reme ria tititi-nonosin. Ma ria tititi-nonosin neu' ko dadi lahenda nusa bau-ina' esa. 21 Leo mae Au tao leo naa' soa-neu' Ismael, tehuu Au hehelu-barataa Ka nana heke' noi neu' o anam Isak. Teu mana mai' ia, bate leo' ledo-fai ia, te Sara boki ana' ria.” 22 Manetualain dedea basa leo' naa, boe ma Ana la'o ela Abraham mesa' ana neu' naa.

23-27 Fai ria boe, Abraham tuka mema' Manetualain pareta Na, de ana sunat. Ana sunat Ismael ma basa tou' fo rai uman dale'. Ana sunat ata tou' ara boe. Tepo' ria, Abraham teun sio hulu sio ma Ismael teun sanahulu telu.