Hagar no anan Ismael
16
1-3 Tepo' ria, Abram fali neme Masir mai, de leo teu' sanahulu nai Kana'an. Sao ni Sarai bei ta hapu ana'. Sarai nanuu ata ina' lahenda Masir, nade Hagar.Lai' esa boe ma Sarai dedea no Abram nae, “Papa! MANETUALAIN ta fee au boki so'. Malole lena' papa suku moo' au ata ki Hagar, ela ana boki fee au.”
Abram tuka sao na nafada na. Boe ma Sarai fee Hagar leo Abram neu dadi sao muri na. 4 Abram suku no' Hagar, boe ma ina' ria nairu. Tehuu Hagar bubulu' ana nairu, boe ma ana koao, de ta hika-hada' Sarai.
5 Boe ma Sarai dedea no Abram nae, “Au fee o sao ata ria ela boki fee au ana'. Tehuu ina' ria bubulu' nairu, boe ma ana ta hika-hada' au so'. Basa ia ra nana o salam. Neme' naa ela MANETUALAIN naetu' ita dua dedea na. Besa' ko o bubulu'!”
6 Abram nataa nae, “Leo ia'! O nana au sao ka. Tehuu ria nana o atam! O ri' pareta ni, de mae tao ni leo' bea boe, neme o mai!” Boe ma Sarai piru'-piru no Hagar, losa' ana nalai.
7 Hagar nalai losa nai moo' soroae'. Boe ma MANETUALAIN eila'o-limalopen esa neme nusatetu-ikutema' a, hapu ni nanenea' oe mata' nai eno' leo Sur neu. 8 Ana nae, “Hagar, Sarai atan! Ubea' taon de o nai ia? O meme bea' mai ma saka' leo bea' muu?”
Hagar nataa nae, “Au alai ela au ina mane ka!”
9 Boe ma MANETUALAIN eila'o-limalope Na lele'o ni nae, “Leo ia'! Malole lena' o fali selu' leo ina mane ma muu. Ana tao o leo' bea boe, moi sipo-sipo' a. 10 O boso' bii. Neu' ko au tao a o tititi-nonosi mara ramefu, losa' lahenda ta bisa reke rala si. 11 Besa' ia o mairu. Ta doo' a so' te o boki ma ana tou' esa. O muste foin nade, Ismael (hii' nae sama leo' dedea feke' esa sosoa na nae, ‘Manetualain namanene’), nana huu MANETUALAIN namanene o dodola ma. 12 Tehuu ana' ria nambau-ina, ana nasoda doo' a neme toranoo nara mai. Huu fo ria sama leo' dara fui', de ta namanene pareta. Ana soa' sudi bea a, ma basa lahenda ra boe soa' ana.”
13 Hagar namanene leo' naa, boe ma ana dodoo nai dale na nae, “Au ita MANETUALAIN, fo ri' Ana relu-natanae au.” Boe ma ana mulai naloo Manetualain pake nade, “Manetualain fo ri' nafaduli au.” 14 Huu ria naa, lahenda ra hule oe mata' ria rae, Beer Lahai Roi, sosoa na nae, “Oe mata' neme Ria masoda', fo ri' nafaduli au.” Oe mata' ria nai koro' Kades no Beret talada, losa' besa' ia.