Manetualain nahelu' no Abram
15
Boe ma MANETUALAIN natudu ao Na neu' Abram. Ana nae, “Abram! O boso' bii, huu fo Au anea-asala'e o neme musu a. Ma Au fee o ua-nale bau-ina'.”2-3 Tehuu Abram nae, “Oo Manetualain! Leo mae Manetualain fee au hata dodou' boe, sosoa-raraa' ta'a. Huu fo au ta anuu ana' ela fee au tititi-nonosi'. De hapu posaka' dodou-ina', fo tao ubea'? Mae tao leo' bea boe, au ata ki Eliasar lahenda Damsik ria ri' hapu katema' asa.”
4 Tehuu MANETUALAIN nataa nae, “Ta leo naa'! Huu fo o ana boki ma ri' neu' ko hapu basa posaka' sira, ta ata ria.”
5 Boe ma Ana noo Abram dea' neu, ma Ana nae, “Besa' ia o mete leo lalai mu. Soba o mete ruu' sira. O bisa reke mala si, do? Neu' ko o tititi-nonosi mara desi ruu' sira!”
6 Huu no Abram sipo' MANETUALAIN dedean ria ma namahere Ni, de Ana tao Abram neu' lahenda dale roo-tetu'.
7 Boe ma MANETUALAIN dedea naroo nae, “Au ia, Manetualain. Au ri' oo ko kalua meme koro Ur nai lahenda Kasdim ara dae na. Ma Au ri' fee dae ia dadi o posakam.”
8 Tehuu Abram natane nae, “Leo bea' MANETUALAIN? Tao leo' bea fo au bisa bubulu' ae, neu' ko dae ia dadi neu' au posaka ka?”
9 Manetualain nataa nae, “Leo ia'! Mai ita tao hehelu-barataa' esa neu' bisinaa' a Au dedea a. Besa' ia o muni fee Au banda: sapi ina' fadi telu' esa, kedae ina' fadi telu' esa ma bibi-lopo mane fadi telu' esa. Ma o muni manupui kateu esa ma manupui kalasi esa.”
10 Boe ma Abram neu hai basa banda sira. Ana seseri bati dua sapi a, kedae' a ma bibi-lopo a. Ana ator bati dua paa' sira reu' dae a, fee si rasasare mata', dadi reu' baris dua. Tehuu ana ta seseri manupui' sira. 11 Boe ma manupui manaa popora' ara mai saka' raa paa' sira. Tehuu Abram usi heni si.
12 Ledo a tena, boe ma Abram suku namanee. Ana nalamei maiu ina' a napoti naan, losa' bii naan seli.
13-15 Ma Manetualain nafada ni nae,
“Abram! Neu' ko o masoda losa' mamalasi maan seli, o mate no mole-dame ma ratoi o no malole.
Tehuu o tititi-nonosi mara neu' ko reu tai nai lahenda feke' ara nusa-namon.
Neu' ko lahenda nusa' ria tao si reu' ata, ese-rumu tao doidoso si losa teu' natun haa.
Tehuu neu' ko Au huku lahenda nusa' ria.
Basa te Au o fali' tititi-nonosi mara kalua reme naa' mai, ma reni hata posaka' dodou-ina'.a
16 Neu' ko Au ator fo o tititi-nonosim dope tada kalima, fali selu' leo ia' mai.
Besa' ia lahenda Amori ra leo rai dae ia lain. Lahenda ia ra tadalu', tehuu bei kafa' a.
Upu-ana mara fali leo ia' mai, sona Au pake si fo huku alulutu' lahenda Amori ra. Huu fo tepo' ria sira tadalu nara seli uuku' a.”
17 Nahatu boe ma kekeneu te rao dae pilas esa namasu, ma obor esa pila nesi' paa baris kadua' sira talada. 18 Fai ria boe, MANETUALAIN tao hehelu-barataa' no Abram. Ana nafada nae, “Au helu, neu' ko Au fee o tititi-nonosim nusa' ia, mulai neme lee Masirb losa lee Efrat, 19 ma lahenda Keni, Kenas, Kadmon, 20 Het, Feris, Refaim, 21 Amori, Kana'an, Girgasi ma Yebus dae nara.”