Abram neu nala fali' Lot neme natati' a
14
Tepo' ria, mane' haa rabua. Si' Amrafel mane' nusa' Sinear. Ariok, mane' nusa' Elasar. Kedarlaomer, mane' nusa' Elam. Ma Tideal, mane' nusa' Goyim. 2 Tepo' ria boe, mane' feke' lima rabua. Si' Bera, mane' nusa' Sodom. Birsa, mane' nusa' Gomora. Sinab, mane' nusa' Adema. Semeber, mane' nusa' Siboim. Ma mane' nusa' Bela (fo ri' nusa Soar). Mane' kahaa' ara ratati soa' mane' feke kalima' ara. 3 Mane' kalima' sira ro sira soldadu nara rabua rai Sidim bafa' a (besa' ia rae, Tasi' Mates).4 Natati' ria, tute na leo ia': Maulu na mane' kalima' sira, mane' Kedarlaomer pareta si losa teu' sanahulu dua. Tehuu teu kasanahulu telu na, boe ma ara soa' ana.
5 Maso' teu kasanahulu haa na, boe ma mane' Kedarlaomer no tia-lain mane' katelu' sira ro soldadu nara mai. Ara ratati raseki nusa' hida. Si': lahenda Refaim rai nusa' Asterot-Karnaim, lahenda Susim rai nusa' Ham, lahenda Emim rai nusa' Sawe-Kiryataim, 6 ma lahenda Hori fo rai lete' Seir, losa mamana lino-nees El Paran suu na. 7 Basa de ara ratafali leo En Mispat reu (besa' ia nade Kades). Ara ralulutu' lahenda Amalek ara nusa na ma lahenda Amori, fo leo rai nusa' Haseson-Tamar.
8-9 Boe ma mane' kalima' sira ator soldadu nara rai Sidim bafa' a, de ara ratati soa' mane' kahaa' sira. 10 Nai bafa' ria, bobolo' ter dodou'. Fai fo ara ratati, mane' Sodom no Gomora ro basa soldadu nara ralai. Sira ruma tuda rala bobolo' ter dale', ma ruma ralai leo lete' reu. 11 De mane' kahaa' fo ri' raseki, ara ralea reni basa hata-heto ma nanaa' neme Sodom ma Gomora. Boe ma ara fali reus.
12 Tehuu Abram fadi na anan Lot leo nai Sodom. Mane' kahaa' sira hopu roo Lot asa, ma ralea reni hata-heton katema'.
13 Tehuu lahenda esa nalai na aon, de neu tui Abram, lahenda Ibrani ria. Tepo' ria lahenda Amori esa nade Mamre.
Abram leo nanenea' nai Mamre ai huu bau-ina nara. Mamre toranoo nara si' Eskol ma Aner. Sira nana, Abram nonoo nara. 14 Abram namanene rae, lahenda ra hopu ro fadi na ana na, boe ma nabua naa atan fo ri' ratati ralela'. Basa si lahenda natun telu sanahulu falu. Ara usi tuka mane' kahaa' sira, usi reni si losa doo ina' a nai koro Dan poo' ii.
15 Nai naa, Abram bati lahenda nara reu' bubua' hida. Nahatu, boe ma ara reu suu lahenda sira, tehuu ruma ralai. Abram asa usi rahere si, losa koro' Hoba nai kota Damsik poo' ii. 16 Abram sapu naa Lot no lahenda nara, basa hata-heto ra ma lahenda feke' ara.
Melkisedek nana mane', ma malaka agama neme Manetualain. Ana naneta no Abram
17 Abram naseki mane' kahaa' sira de ana fali, boe ma mane' Sodom mai soru' Abram nai Sawe bafa' a (lahenda biasa hule rae, Mane' Bafa' a). 18 Tepo' ria, Melkisedek dadi mane' nai kota Salem.a Ma ria boe malaka agama neme Manetualain Madema Naan Seli. Ana mai neni fee Abram roti ma oe anggor. 19-20 Boe ma ana dedea fee Abram ua-nale' nae, “Ela Manetualain Madema Naan Seli, fo ri' adu lalai ma dae-ina' a, fee o ua-nale'. Io-oa Manetualain, fo ri' tao naa o maseki musu mara.”
Basa de Abram bati fee Melkisedek babati' esa neme babati' sanahulu, neme' basa hata fo ana sapu na.
21 Mane' Sodom naloloe aon neu' Abram nae, “Papa Abram. Basa hata-heto fo ri' papa sapu ma reme au musu-noo kara mai, ela papa soa katema' asa. Tehuu au hule fali' noi au lahenda kara.”
22 Tehuu Abram nataa nae, “Au soo-supa nai Manetualain Madema Naan Seli, mana adu lalai ma dae-ina' a, mata Na 23 ae, neme basa o hata-heto mara mai, au ta hai esa boe', leo mae aba-doo peda ana' esa boe, au ta hai ni. No ria naa, o ta bisa mafada mae, au amasu'i, nana huu o. 24 Au ta parluu hata-hata esa boe'. Noi hata fo au lahenda kara pake heni a, taon neu' basa so. Ma ela au nonoo ki lahenda ia ra telu si, Aner, Eskol ma Mamre, hai ra sira nuu babati nara.”