Abram nasida' no Lot
13
Boe ma Abram la'o ela Masir, de fali leo dae Negeb neu. Ana noo sao na ma basa hata posaka nara. Fadi na anan Lot tuka si. 2 Abram namasu'i naan seli. Banda-manun, ma lilo pilas, lilo fulan dodou-ina'.3 Neme Negeb mai ana rali-rali, fali selu' leo koro Betel no koro Ai talada neu. Maulu na ana parnaa leo nai naa. 4 Ma ana napadedei' mei tutunu-hohotu', fo ana do'o-tabe MANETUALAIN nai naa.
5 Lot, fo ri' tuka no Abram, nanuu banda-manu' dodou' ma ata nara boe dodou'. 6-7 Tehuu mamana' ria ta loa' a soa-neu' Abram no Lot ma basa hata-heto nara, ela leo rabua reu' naa. De Abram no Lot mana foo nara mulai rareresi', nana huu nau-aidoo nai mamana' ria ta dai sira banda nara. (Tepo' ria, lahenda Kana'an ma lahenda Feris ara bei leo rai naa.)
8 Boe ma Abram nafada Lot nae, “Ana ki on! Ita dua toranoo'. Boso' losa ita dua esa ta malole no esa, ma ita mana foo nara rahuu raroo. 9 Malole lena' ita dua tasida'. Mamana' ia loa' a. De kalu o here dae nai ii, sona au soa nai ona. Tehuu kalu o here dae nai ona, sona au soa nai ii.”
10 Lot mete nalelei', boe ma ana nita Yarden bafa' a losa koro Soar, oe-oe mesan. Mamana' ria dae mandadi', sama leo' MANETUALAIN oka Na ma sama leo' dae Masir. (Tepo' ria, MANETUALAIN bei ta nalulutu' Sodom no Gomora. De dae ria bei malole.) 11 De Lot here naa katema' dae nai Yarden bafa' a. Dua si rasida', boe ma Lot leo dulu neu. 12 Tehuu Abram leo nahani' dae Kana'an. Lot leo nai koro' fo ranenea' kota Sodom, nai Yarden bafa' a. 13 Tehuu lahenda Sodom ara tadalu raan seli. Ma ara ta nau ramanene neu' MANETUALAIN.
14 Lot no Abram rasida', boe ma MANETUALAIN nafada Abram nae, “Abram! Soba o mete-relu basa mamana' ara, neme mamana' fo ri' o mapadei' ria. Mete matalolole, dulu-muri, ii-ona'. 15 Basa dae fo ri' o mita si, neu' ko Au fee o ma tititi-nonosi mara, fo dadi emi posakam losa doo na neu. 16 Neu' ko Au fee o tititi-nonosim ramefu sama leo' soroae' nai tasi suu'. Losa' lahenda ra ta bisa reke rala o tititi-nonosi mara dedesi na. 17 Besa' ia o la'o rule-feo dae ria tuka loloa-nanarun. Huu fo basa sira neu' ko Au fee si reu' o!”
18 Boe ma Abram asa rarali, ma reu leo selu' nai mamana' fo ranenea' ai huu ina' ara nai Mamre, nanenea' koro Hebron. Ana lutu mei tutunu-hohotu', fo do'o-tabe MANETUALAIN nai naa.