Manetualain naloo Abram
12
Tepo' ria, MANETUALAIN dedea no Abram nae, “Abram! O la'o ela kileo-boboki mara, papa ma uma-loon, ma o koro-tadum. O leo mamana' esa muu, neu' ko Au atudun neu' o.2 Neu' ko Au fee o ua-nale'.
Ma o tititi-nonosi mara neu' ko ramefu,
ma ara dadi lahenda nusa kahere', losa' basa lahenda ra ralela' o nade ma.
Ma neu' ko o dadi ua-nale' fee lahenda feke'.
3 Neu' ko Au fee ua-nale' neu' lahenda fo fee o ua-nale'.
Tehuu Au kutuk lahenda fo ri' kutuk o.
Nenene matalolole!
Neu' ko basa lahenda nusa' nai dae-bafo' a hapu ua-nale' nana huu o.”
4-5 Tepo' ria, Abram teun hitu hulu lima. Ana noo saon Sarai, fadi na ana manen Lot, basa hata posaka nara, ma basa lahenda mana noi fo ana hapu nai kota Haran. Abram asa la'o ela Haran, leo mamana' fo ri' MANETUALAIN nafada ni. De ara la'o raroo losa mamana' esa, nade Kana'an.
6 Losa naa, boe ma Abram la'o rule-feo dae ria, losa' nananea' koro' esa nade Sikem. Ara leo lalai reu' naa, ranenea' ai huu ina' esa nai More. Tepo' ria, lahenda Kana'an ara leo rai naa. 7 Nai naa, MANETUALAIN natudu ao Na neu' Abram. Ana nae, “Neu' ko Au fee o tititi-nonosi mara nusa' ia.” Boe ma Abram lutu batu mei tutunu-hohotu' soa-neu' MANETUALAIN fo ri' Ana natudu ao Na nai naa.
8 Boe ma Abram asa rarali leo lete' esa nai ona, de ara leo lalai reu' koro Betel no koro Ai talada. Nai naa, ana napadedei' mei tutunu-hohotu' esa, ma ana do'o-tabe MANETUALAIN. 9 Ana rali-rali mamana', losa dae Negeb nai Kana'an ona.
Abram leo nusa' Masir neu
10 Lai' esa de, fai laa-roes ina' nai dae Kana'an. Huu ria naa, Abram asa la'o leo doo' a reu nai ona, losa nusa' Masir. Ara leo lalai reu' naa. 11 Ara saka' maso' nusa' Masir, Abram nafada sao na nae, “Sarai. O napu' mesan. 12 De kalu lahenda Masir a rita o napu ma leo' ia, tantu ara raisa au, nana huu au nana o saom. No ria naa, ara bisa tonda ra o. 13 Malole lena', o mafada si mae, au nana o naa ma. No ria naa ara ta raisa au, tehuu neu' ko malole ro au nana huu o.”
14 Abram asa losa Masir, lahenda ra rita Sarai napu' mesan. 15 Mane' Masir pegawe nara rita ni, boe ma ara io ina' ria napu na nai mane' a matan. Boe ma ara roo ina' ria leo mane' a uma na neu. 16 De mane' a malole no Abram, nana huu Sarai. Mane' a parseen Abram banda, leo-leo' bibi-lopo, kedae', sapi, keledei ma onta. Ana parseen fee ni ata tou' ma ata ina'.
17 Tehuu no mane' a tonda na lahenda saon leo ria uman dale' neu, de MANETUALAIN feen no uma isi nara huhuku rupa'. 18 Boe ma mane' naloo na Abram de natane ni nae, “Abram! O tao au leo' bea ia? Ubea' taon de o ta mafada mae, ina' ia nana o sao ma? 19 Tehuu o mae ina' ia nana o feto ma. Kura bai' au sao ni! Moo fali' sao ma! Besa' ia mo ni maheo' meme au mata ka mai leo!” 20 Boe ma mane' a pareta pegawe nara, usi heni Abram no sao na ma basa hata-heto nara reme' nusa ria mai.