Manara Babel
11
Fai a ulu na, basa lahenda nai dae-bafo' a, ara dedea pake dedea' esa' a. 2 Tepo' fo sira ruma rarali dulu reu, ara losa dae maleka' esa nai Sinear,a boe ma leo reu' naa. 3-4 Basa si rala hara' rae, “Toranoo kara emin! Mai ita tafoa kota bau-ina' esa. Ita muste tao batu pilas ma hotun losa namepe. Ma ita tatutule' batu sira pake ter, fo tafoa manara madema esa, poi na losa lalai ela ita hapu nade'. Ela ita dadi lahenda nusa bau-ina' esa, boso' tabika-tabati'.”
5 Boe ma MANETUALAIN onda, ela memete sudi kota ria ma manara fo ri' rafoa ni. 6 Ana dedea nae, “Lahenda dae-bafo' ia ra basa si nusa' esa ma ara pake dedea' esa' a. Hata fo besa' ia ara taon a, besa' ko sau' masososa. Balahaa-binesa' kalu basa si rabua-raesa sama leo' besa' ia, neu' ko ara bisa tao sudi ubea'. 7 Malole lena' Ita onda fo tao fee si esa' ko dedean, ela esa boso' bubulu' esa dedean.”
8 Boe ma MANETUALAIN onda, de tao kaco sira dedean. No ria naa, Ana tao naa lahenda dae-bafo' a kofela leo basa mamana' nai dae-bafo' ia. De ara ta rafoa raroo kota ria so'. 9 Huu ria naa, ara fee kota ria, nade Babel (hii' nae sama no dedea' esa sosoa na nae, ‘ramakokoa’), nana huu MANETUALAIN tao kaco sira dedea na, ma fee si kofela leo basa mamana' nai dae-bafo' a.
Neme Sem losa Abram
10 Sem tititi-nonosin si' ia'. Tepo' fo basa faa ina' a teu' dua, la'e Sem teun natun esa, ana hapu ana tou' esa, nade Arpaksad. 11 Basa de ana bei nasoda selu' teu' natun lima, ma ana hapu tamba selu' ana tou' ma ana ina'.
12 Arpaksad teun telu hulu lima, boe ma ana hapu ana tou' esa, nade Sela. 13 Basa de Arpaksad bei nasoda selu' teu' natun haa telu, ma ana hapu tamba selu' ana tou' ma ana ina'.
14 Sela teun telu hulu, boe ma ana hapu ana tou' esa nade, Eber. 15 Basa de Sela bei nasoda selu' teu' natun haa telu, ma ana hapu tamba selu' ana tou' ma ana ina'.
16 Eber teun telu hulu haa, boe ma ana hapu ana tou' esa, nade Pelek. 17 Basa de Eber bei nasoda selu' teu' natun haa telu hulu, ma ana hapu tamba selu' ana tou' ma ana ina'.
18 Pelek teun telu hulu, boe ma ana hapu ana tou' esa, nade Rehu. 19 Basa de Pelek bei nasoda selu' teu' natun dua sio, ma ana hapu tamba selu' ana tou' ma ana ina'.
20 Rehu teun telu hulu dua, boe ma ana hapu ana tou' esa, nade Seruk. 21 Basa de Rehu bei nasoda selu' teu' natun dua hitu, ma ana hapu tamba selu' ana tou' ma ana ina'.
22 Seruk teun telu hulu, boe ma ana hapu ana tou' esa, nade Nahor. 23 Basa de Seruk bei nasoda selu' teu' natun dua, ma ana hapu tamba selu' ana tou' ma ana ina'.
24 Nahor teun dua hulu sio, boe ma ana hapu ana tou' esa, nade Tera. 25 Basa de Nahor bei nasoda selu' teu' natun esa sanahulu sio, ma ana hapu tamba selu' ana tou' ma ana ina'.
26 Tera teun hitu hulu, boe ma ana hapu ana tou' telu, si' Abram, Nahor, ma Haran.
Tera tititi-nonosin
27 Ia nana Tera tititi-nonosi nara. Tera ana nara si' Abram, Nahor ma Haran. Haran hapu ana tou' esa nade Lot. 28 Haran mate ni nai koro-tadun nade Ur, nai lahenda Kasdim ara daen. Tepo' fo mate ni, nana papan Tera bei nasoda. 29 Abram sao Sarai. Nahor sao Haran ana feto na, nade Milka. Haran hapu ana tou' esa nade Yiska. 30 Tehuu Sarai tedi ni, de ta boki.