Manetualain tao hehelu-barataa' no Noh
9
Manetualain fee ua-nale' neu' Noh ma ana nara, Ana dedea nae, “Emi boki-lae mamefu dae-bafo' ia. 2 Neu' ko basa banda-manu', manupui' ma ika' ara, bii' emi. Emi muste ator asa. 3 Emi bole mia basa banda sira paa nara, sama leo' emi bole mia huu mana rerebi' ma doo mana sesepe' ara buna-boan. Basa ia ra, Au fee si reu' emi.4 Noi paa' fo bei no daa na ta bole emi mia ni, nana huu banda a nasoda neme daa a mai. 5-6 Au adu-tao lahenda dae-bafo' tuka Au elilali-limalope Ka. Huu ria naa, emi ta bole maisa lahenda dae-bafo'. Kalu lahenda, do banda raisa lahenda dae-bafo', muste maisa si boe. Atoran ia neme' Au mai. 7 Emi muste boki-lae mamefu dae-bafo' ia.”
8 Manetualain dedea naroo nae, 9 “Besa' ia Au tao hehelu-barataa Ka oo emi, losa tititi-nonosi mara. 10 Hehelu-barataa' ia soa-neu' basa masoda' ara, si' banda ae', banda fui' ma manupui' ara. Eetu dedea na, basa-basan fo ri' kalua sama-sama ro emi meme ofa' ria mai. 11 Au hehelu-barataa Ka leo ia': Au ta fee faa ina' a mai selu', fo namate basa masoda' ara ma nalutu dae-bafo' ia.
12-13 Au tao elus Ka nai lalai, fo dadi tanda nafarerene' neu' Au hehelu-barataa mana basa taa' Ka neu' emi, ma basa masoda' ara, ma dae-bafo' ia. 14-17 Kalu oa uda a nai lalai, ma elus a dadi, sona Au afarene hehelu-barataa Ka neu' lahenda ma basa masoda' ara ae: neu' ko faa ina' a ta nalulutu' basa masoda' ara so'. No ria naa, Au hehelu-barataa mana basa taa' Ka nana heke' neu' emi mo basa masoda' ara.”
Noh mafu'
18 Noh anan fo ri' ara kalua reme ofa' a mai, si' Sem, Yafet ma Ham. (Ham nana, Kana'an papa na). 19 Basa lahenda rai dae-bafo' a tititi-nonosin reme Noh anan sira telu.
20 Noh lahenda maue-maosa. Ria ri' tao masososa oka anggor. 21 Lai' esa de, ana ninu oe anggor losa' mafu' naan seli. Ana olu heni bua-loan, de suku poi'rao' nai tenda na dale'. 22 Ham nita papa na poi'rao', boe ma ana nalai neu nafada a'an Sem no Yafet. 23 Boe ma dua si hai ra lafa esa, ara rapela raan fuan neu' aru nara lain. Ara la'o rasadedea' a maso' leo tenda ria dale' reu, de ralusen neu' papa na. No ria naa, ara ta rita papa na po'irao'. Basa boe ma dua si kalua.
24 Noh mamafu na mulai mopon, besa' ko bubulu' ana mate'a tei-susu na nonoi-tataon. 25 Ana dedea nae, “Ham! Kana'an papa na!Au kutuk o! Neu' ko o dadi ata soa-neu' a'am dua si!
26 Io-oa MANETUALAIN! Ela Ana fee ua-nale' neu' Sem!
Tehuu ela Kana'an dadi Sem atan.
27 Ela Manetualain namaloa-namanaru Yafet oe-daen;
Ma ria tititi-nonosin rasoda mole-dame ro Sem tititi-nonosin.
Tehuu ela Kana'an dadi Yafet atan.”