Dae a namara'u
8
Tehuu Manetualain ta nafarene heni Noh ma basa banda fo rai ofa' dale'. Ana fee ani a fufuu nare'e' faa ria. 2 Ana tutu' etu basa oe mata' rai dae-ina', ma fee uda a hai. 3 Boe ma oe re'e naroo. Basa fai' natun esa lima hulu, oe a ta dema' a so'. 4 La'e bula kahitu na fai' sanahulu hitu, ofa' a hara nai nai lete malelepi' Ararat. 5 Oe a re'e naroo, losa bula kasanahulu na fai' esa, boe ma lete poi' ara mulai nana nita'. 6 Basa fai' haa hulu, boe ma Noh soi ofa' a jandelan esa. 7 Ana po'i manupui kaa' esa. Manupui' ria laa neu-mai, losa' faa a re'e matetu'. Ana ta fali leo ofa' a neu so'. 8 Boe ma Noh po'i kalasi esa, ela memete sudi oe ria metin so, do bei'. 9 Tehuu no oe a bei lifu na katema' dae-bafo' a, de manupui' a ta hapu mamana tetena'. Boe ma ana fali leo ofa' a neu. Noh loo' lima na neu de sipo' na manupui' a leo ofa' dale' neu.
10 Noh nahani selu' fai' hitu, boe ma ana po'i selu' manupui' ria. 11 Ledo leodae', boe ma manupui' ria fali leo Noh neu, ma seu neni ai saitun doo' esa. Noh bubulu' oe a re'e matetu'. 12 Ana nahani fai' hitu bali, boe ma ana po'i selu' kalasi ria. Tehuu oe' ia, manupui' a ta fali so'.
13 Noh teun natun nee esa, la'e bula kaesa na fai' esa, oe a re'e matetu'. Boe ma Noh soi ofa' a jandela na, de ana mete nalelei', te dae a mada so. 14 Losa bula kadua na fai' dua hulu hitu, te dae a mada matetu'.
15 Boe ma Manetualain dedea no Noh nae, 16 “Noh! Besa' ia emi basa onda meme ofa' ia lain mai leo. 17 Po'i banda sira katema' asa! Si' banda ae', banda fui', banda manalodo-manarae' ma manupui' ara, ela ramefu nai dae-bafo' ia.”
18-19 Boe ma Noh, sao na ma ana-manafeu nara, basa si kalua reme ofa' a mai. Basa banda sira boe kalua, esa' ko no' bubuan.
Noh fee tutunu-hohotu' neu' Manetualain
20 Boe ma Noh lutu batu tao mei tutunu-hohotu' soa-neu' MANETUALAIN. Neme basa banda fo bole pake si dadi tutunu-hohotu', Noh hai naa bei esa'. Ana hala si fo tunu si reu' mei tutunu-hohotu' ria lain, ela dadi tanda makasi neu' MANETUALAIN. 21 MANETUALAIN hae na tutunu-hohotu' ria boo meni na, boe ma dale Na namaho'o. Ana afi nae,
“Mulai neme besa' ia, leo mae leo' bea boe Au ta kutuk dae-bafo' ia nana huu lahenda dae-bafo' ara tadalun. Leo mae reme aana nara mai, afi noi tadalu' a, tehuu Au ta alulutu' basa masoda' ara, sama leo' Au tao ia. 22 Losa neu' dae-bafo' a bei nahere, ledo-fai ia ra la'o raroo tuka ria atoran a. Si' fai sesele' ma fai o'oru', fai masufu' fai hanas, fai fandu' fai oe faa', leledo' ma hatu'.”