Faa ina' a
7
Boe ma MANETUALAIN dedea no Noh nae, “Au mete basa mamana' lala'en, tehuu Au hapu noi o ri' dale ma roo-tetu'. Huu ria naa, mo sao-ana mara maso' ofa' dale' meu leo. 2-3 Neme basa banda rupa' fo emi bole mia paa nara, muni pasang bei hitu' leo ofa' a dale' neu. Ma neme banda fo emi ta bole mia paa nara, muni noi pasang bei esa'. Neme basa manupui rupa', muni pasang bei hitu'. No ria naa, banda ma manupui' ara ta ramaetu si.4 Mafarerene' matalolole! Selu' fai' hitu, Au aonda uda ta pake hahae' losa leledo' haa hulu ma hatu' haa hulu. No ria naa, Au amate katema' basa-basan fo Au adu a si rasoda rai mada' lain.”
5 Noh tao tuka matetu' MANETUALAIN pareta Na katema'. 6 Fai fo faa ina' a, nana Noh teun natun nee. 7 Noh, sao na ma ana-manafeu nara maso' leo ofa' dale' reu, fo soi ra ao nara reme' faa ina' a mai. 8-9 Noh tuka MANETUALAIN pareta Na, de ana neni manupui rupa', ma banda feke' ara, esa' ko no' pasang na, leo mae banda fo lahenda bole naa paa na, ma lahenda raluli a. 10 Basa fai' hitu, boe ma faa ina' a sikilapa mai, napoti na dae-bafo' a.
11 Naraa la'e Noh teun natun nee, bula' dua ma fai' sanahulu hitu, boe ma fa ina' a mai. Fai ria nonoo' leo lalai natahu'a, de oe a noi sikilapa' a mai. Ma basa oe mata' ara adi si, de oe a nasapura dea' mai. 12 Uda a ta pake hahae' hatu-leledon, fai' haa hulu.
13 Tehuu fai ria Noh, sao na, anan telus, si' Sem, Yafet, Ham ma manafeu nara, basa si maso' leo ofa' dale' reu. 14 Ara maso' sama-sama ro basa banda ra, si' banda ae', banda fui', manalodo-manarae', manupui' ma banda feke madila' ara. 15-16 Basa masoda' ara pasang bei esa', maso' leo ofa' dale' reu sama-sama ro Noh, sama leo' Manetualain pareta ni.
Basa si maso' rala ofa' dale', boe ma MANETUALAIN koe ofa' a lelesu na.
17-19 Uda bau-ina' a mai naroo, losa fai' haa hulu, ma faa a boe-boe namadema losa' ofa' a bonu. Oe a ae naroo losa' seli basa lete madema ra. 20 Oe a ae ta pake hahae', losa' dedema na meter hitu neme lete' ara poi na.