Lahenda dae-bafo' a tadalu nara
6
Tepo' ria, lahenda dae-bafo' a boe-boe tamba. Ara kofela basa mamana' rai dae-bafo' a. Ara boki ra ana ina' boe. 2 Manetualain ana tou naraa rita lahenda dae-bafo' a ana feto nara lole nara seli. De ara sao ra ana feto' fo ri' rahii' asa. 3 Boe ma MANETUALAIN nae, “Au sota' no lahenda dae-bafo' ara masoda taohiro-taoharin. Au Dula-dale Ka fo ri' fee si soda' a, ta nau fee si rasoda raroo so'.b Ara muste mate. De neu' ko ara rasoda losa noi teu' natun esa dua hulu.”4 Tepo-lele' ria ma tepo-lele' mabui' ara, lahenda parnaka rai dae-bafo'.c Manetualain ana tou nara sao lahenda dae-bafo' a ana feto nara, boki ra lahenda kahere' ara, si' parani musu manade nai tutui fai ulu' ara.
5 Tepo' ria, MANETUALAIN nita lahenda dae-bafo' a tadalu raan seli. Sira dale nara afi noi tadalu' la'o naroo. 6 Boe ma MANETUALAIN nasaledale adu naa lahenda leo rai dae-bafo' ia. Hihii-nanau' ria ri' tao nahehedi' na dale Na seli. 7 Huu ria naa Ana dedea nae, “No ria naa, neu' ko Au tao alulutu' lahenda fo ri' Au adu aa si rai dae-bafo' ia. Manupui' ara ma banda feke' ara boe, Au tao alulutu' katema' asa. Huu fo Au asaledale adu a si.” 8 Tehuu noi Noh tao namaho'o MANETUALAIN dale Na.
Noh tutui na
9-10 Noh tutui na leo ia': Ria ana toun telu, si' Sem, Yafet ma Ham. Noh nasoda roo-tetu', ta tao tadalu'. Tepo' ria noi ria ri' roo-tetu'. Ana nasoda dale' esa no Manetualain.
11-12 Tehuu Manetualain nita lahenda feke' ara basan tadalu'. Nai bea-bea oo, lahenda eno masoda nara tadalu raan seli. Manetualain nita noi lahenda dae-bafo' a tadalu nara. 13 Manetualain nafada Noh nae, “Nai mamana' bea-bea oo, Au ita noi lahenda dae-bafo' a tadalu nara. De Au aetu' nau tao alulutu' dae-bafo' ia no basa oe-isin. 14 De leo ia', Noh! Besa' ia o tao ofa bau-ina' esa neme ai matea a. Nai ofa' a dale', o tao kama dodou' ma dudu dama neu' ofa' a. 15 O tao ofa' a nanaru naa meter natun esa telu hulu telu; loloa na meter dua hulu dua; ma dedema na meter sanahulu telu. 16 Sini etu ofa' ria, tehuu tao maan doo' a bai' neme ofa' a suu' lai na, bate meter seseri' esa. O tao ofa' a tada' telu, tada' esa nai dae', tada' esa nai talada ma tada' esa nai lain. Ma tao lelesu esa nesi' ofa' a poo na.
17 Mafarerene' matalolole! Neu' ko Au aonda faa ina' a, namate basa-basa masoda' ara rai dae-bafo' ia, losa' ta ela hata esa boe'. 18 Tehuu Au tao hehelu-barataa ia neu' o. Neu' ko o maso' leo ofa' a dale' muu, sama-sama mo sao ma, ma ana-manafeu mara.
19-20 Neme basa banda ra, o muste muu hai ma pasang bei esa', muni si leo ofa' dale' reu, ela ara rasoda sama-sama ro o. Leo-leo' basa banda-manu', manupui' ara ma banda manalodo-manarae' ara, ela basa si rasoda. 21 O muste muni nanaa rupa' ara, leo ofa' a dale' neu soa-neu' emi ma soa-neu' banda-manu' ara.”
22 Noh namanene leo' naa, boe ma ana tao tuka Manetualain pareta Na katema'.