1-2 Tepo' fo Manetualain adu lahenda dae-bafo', Ana adu na si sama no Ria eilali-limalopen. Ana adu tou' ma ina'. Ana hule si nae, “lahenda dae-bafo'” ma Ana dedea fee si ua-nale'.

3 Adam teun natun esa telu hulu, boe ma ana hapu ana tou' esa, eilali-limalopen sama leo' papa na. Ma ana fee ana' ria, nade Set. 4 Basa de Adam bei nasoda selu' teu' natun falu, ma ana hapu tamba selu' ana tou' ma ana ina'. 5 Ana maten neu' teun natun sio telu hulu.

6 Set teun natun esa lima, boe ma ana hapu ana tou' esa, nade Enos. 7 Basa de Set bei nasoda selu' teu' natun falu hitu, ma ana hapu tamba selu' ana tou' ma ana ina'. 8 Ana maten neu' teun natun sio sanahulu dua.

9 Enos teun sio hulu, boe ma ana hapu ana tou' esa, nade Kenan. 10 Basa de Enos bei nasoda selu' teu' natun falu sanahulu lima, ma ana hapu tamba selu' ana tou' ma ana ina'. 11 Ana maten neu' teun natun sio lima.

12 Kenan teun hitu hulu, boe ma ana hapu ana tou' esa, nade Mahalalel. 13 Basa de Kenan bei nasoda selu' teu' natun falu haa hulu, ma ana hapu tamba selu' ana tou' ma ana ina'. 14 Ana maten neu' teun natun sio sanahulu.

15 Mahalalel teun nee hulu lima, boe ma ana hapu ana tou' esa, nade Yared. 16 Basa de Mahalalel bei nasoda selu' teu' natun falu telu hulu, ma ana hapu tamba selu' ana tou' ma ana ina'. 17 Ana maten neu' teun natun falu sio hulu lima.

18 Yared teun natun esa nee hulu dua, boe ma ana hapu ana tou' esa, nade Henok. 19 Basa de Yared bei nasoda selu' teu' natun falu, ma ana hapu tamba selu' ana tou' ma ana ina'. 20 Ana maten neu' teun natun sio nee hulu dua.

21 Henok teun nee hulu lima, boe ma ana hapu ana tou' esa, nade Metusalak. 22 Henok nasoda dale' esa no Manetualain losa' teu' natun telu. Ma ana hapu tamba selu' ana tou' ma ana ina'. 23-24 Ana nasoda dale' esa no Manetualain la'o naroo. Henok teun natun telu nee hulu lima, boe ma mopo ni nana huu Manetualain so'u noon.

25 Metusalak teun natun esa falu hulu hitu, boe ma ana hapu ana tou' esa, nade Lamek. 26 Basa de Metusalak bei nasoda selu' teu' natun hitu falu hulu dua, ma ana hapu tamba selu' ana tou' ma ana ina'. 27 Ana maten neu' teun natun sio nee hulu sio.

28 Lamek teun natun esa falu hulu dua, boe ma ana hapu ana tou' esa. 29 Lamek fee ana' ria, nade Noh, (sosoa na nae, ‘fee o'oe-nanasi'’), nana huu nae, “Ana' ia neu' ko o'oe-nanasi tao namaho'o ita dale na neme memela-mamaku' nai dae fo ri' Manetualain kutuk ana.” 30 Basa de Lamek bei nasoda selu' teu' natun lima sio hulu lima, ma ana hapu tamba selu' ana tou' ma ana ina'. 31 Ana maten neu' teun natun hitu hitu hulu hitu.