Kaen no Habel tutuin
4
Adam suku no' saon Hawa, boe ma ina' a nairu. Ana boki na ana tou' esa. Ana nae, “Au boki a ana tou' esa, nana huu MANETUALAIN tulu-fali au.” Ana foi ana' ria nade, Kaen (sosoa na nae, ‘kalua henin’). 2 Basa de Hawa boki selu' ana tou' esa. Ana foin nade, Habel.Dua si rambau-ina, Habel foo banda, ma Kaen tao oka-tine. 3 Lai' esa de, Kaen neni oka-tinen buna-boan ruma fee MANETUALAIN. 4 Habel boe neni ria bibi-lopo nara ana ulu na. Ana pau bibi-lopo sira, de neni paa' malole ina' fee Manetualain. MANETUALAIN nita leo' naa, dale Na namaho'o neu' Habel ma tutunu-hohotun. 5 Tehuu MANETUALAIN ta namaho'o neu' Kaen ma tutunu-hohotun. Kaen namanasa naan seli, losa' mata-idun rutu'-rutu.
6 MANETUALAIN dedea no Kaen nae, “Kaen! Ubea' taon de o mamanasa leo' naa? Ubea' taon de o mata-idum rutu'-rutu? 7 Kalu o tao malole, tantu Au sipo' o no malole. Tehuu besa-besa! Kalu o tao tadalu', neu' ko tadalu' ria nala selu' o. De kalu o mahii' tao tadalu', malole lena' tipa henin mema'!”
8 Lai' esa de, Kaen lele'o Habel nae, “Fadi! Mai dua kata lala'o leo oka' teu.”a Ara losa naa, kekeneu te Kaen naisa fadi na.
9 Boe ma MANETUALAIN natane Kaen nae, “Kaen! O fadi ma nai bea?”
Kaen nataa nae, “Au ta bubulu' ana nai bea. Ee mae au homu ei na, do?”
10 Manetualain dedea nae, “Ubea' taon de o tao tadalu' leo' naa? Boso' mae o bisa mafuni fadi ma daa na nai dae a, huu fo Au ita katema' asa so! 11 Besa' ia o hapu kutuk. Fai fo o maisa fadi ma, dae a nasamusi naa daa na. De besa' ia, dae a ta neni fee o soda' so'. 12 Kalu o tao oka-tine, dae a ta neni fee o buna-boa' hata esa boe'. Mulai neme besa' ia mai, o masararala sama leo' lahenda kasian a saka soda' nai dae-bafo' ia.”
13 Tehuu Kaen nadedea laka no MANETUALAIN nae, “Manetualain! Ubea' taon de Manetualain fee au kutuk mabera ina, losa' au ta bisa lepa abe'in? 14 Huu no Manetualain usi heni au eme mamana' ia, neu' ko au doo' a eme Manetualain mai. Au asararala nai basa mamana' ain. Boe ma sudi bea a raneta ro au, tantu raisa au.”
15 Tehuu MANETUALAIN nataa ni nae, “Ta leo naa'! Bea naisa o, neu' ko Au huku ni bera lena lai' hitu!” Boe ma MANETUALAIN tao tanda neu' Kaen, ela lahenda ra bubulu', fo ara ta bole raisa ni. 16 Basa de Kaen la'o ela mamana' ria, doo' a neme MANETUALAIN. Ana la'o losa mamana' esa nai oka Eden poo' dulu. Mamana' ria nade Nod. Sosoa na nae, ‘Masararala'’, ana leo neu' naa.
Kaen tititi-nonosi nara
17 Boe ma Kaen sao, sao na nairu, de ana boki ana tou' esa, ara foin nade, Henok. Kaen nafoa koro' esa boe, feen nade Henok, tuka ana na nade na. 18 Henok ana na, ri' Irad. Irad ana na, ri' Mehuyael. Mehuyael ana na, ri' Metusael. Ma Metusael ana na, ri' Lamek.
19 Lamek saon dua. Esa nade Ada, ma esa nade Sila. 20 Ada ana na, nade Yabal. Ria tititi-nonosi nara dadi mana foo. Ara rali-rali ma leo rai tenda. 21 Fadi na, nade Yubal. Yubal tititi-nonosi nara mana mamina musik, fuu suling ma ramina musik pake sanaar leo' sasandu.
22 Lamek saon Sila boki Tubal Kaen. Ria tititi-nonosi nara mana tutu besi, ara tao hata rupa' reme besi ma riti. Tubal Kaen feto na, nade Na'ama.
23 Lai' esa de, Lamek dedea koao' nai saon dua si mata nara nae, “Emi nenene! Bisinaa' a ana tou' esa boa fee au, tehuu au popo'o aisa ni. 24 Lahenda bea naisa Kaen, hapu huhuku' lai' hitu. Tehuu kalu bea balas napeda dale na neu' au, ara hapu huhuku' lai' hitu hulu hitu.”
Adam ana feke na, ri' Set
25 Adam saon Hawa boki selu' ana tou' esa. Ara foi ana' ria nade, Set (sosoa na nae, ‘loo fee’), huu fo Hawa nae, “Manetualain loo fee au ana' ia kati Habel fo ri' Kaen naisa ni.” 26 Set nambau-ina de sao boe ma hapu ana tou' esa, nade Enos.
Tepo' ria, besa' ko lahenda ra mulai do'o-tabe MANETUALAIN.